பிஎஃப் பணத்தை ஏடிஎம் மற்றும் யூபிஐ மூலம் எடுக்கும் வசதி இன்னும் ஓருரு மாதங்களில் அமலுக்கு வரும் என்று எதிர்பார்க்கப்படுகிறது. அதன் பிறகு பிஎஃப் பணத்தை அனைவரும் எந்த சிரமமும் இல்லாமல் உடனடியாக எடுக்கலாம்.
வருங்கால வைப்பு நிதி (PF) கணக்கிலிருந்து பணத்தை எடுக்கும் செயல்முறை இனி முன்னெப்போதையும் விட எளிதாகவும் வேகமாகவும் இருக்கும். படிவங்களை நிரப்புதல், நிறுவனத்தின் மனிதவளத் துறையிடம் (HR) ஒப்புதல் பெறுதல் மற்றும் வாரக் கணக்கில் காத்திருத்தல் போன்ற சிக்கலான நடைமுறைகளில் பெரிய மாற்றம் வரவுள்ளது. தொழிலாளர் வருங்கால வைப்பு நிதி அமைப்பு (EPFO) தனது முழு தகவல் தொழில்நுட்பக் கட்டமைப்பையும் நவீனப்படுத்தி ‘EPFO 3.0’ அமைப்பைச் செயல்படுத்தத் தயாராகி வருகிறது. இது PF கணக்கை ஒரு வங்கி சேமிப்புக் கணக்கைப் போலவே செயல்பட வைக்கும் என்று கூறப்பட்டுள்ளது.
ரூ. 5 லட்சம் வரை எளிதாக எடுக்கலாம்!
PF உறுப்பினர்களுக்குக் கிடைக்கவுள்ள மிகப்பெரிய நன்மை அவசரக்கால முன்பணக் கோரிக்கைகள் தொடர்பானதாகும். நோய், திருமணம் அல்லது வீடு கட்டுதல் போன்ற அவசரத் தேவைகளுக்காகக் கோரப்படும் ரூ. 5 லட்சம் வரையிலான முன்பணத் தொகையை இனி அதிகாரிகள் ஆய்வு செய்ய வேண்டிய தேவை இருக்காது. இந்த புதிய அமைப்பு செயற்கை நுண்ணறிவு (AI) மற்றும் தானியங்கி தரவு சரிபார்ப்பு ஆகியவற்றின் அடிப்படையில் செயல்படும். முன்பெல்லாம் கோரிக்கைகள் பரிசீலிக்கப்பட்டு பணம் கிடைக்க 15 முதல் 20 நாட்கள் வரை ஆன நிலையில், இனி வெறும் 3 முதல் 4 நாட்களிலேயே அந்தத் தொகை சந்தாதாரரின் வங்கிக் கணக்கில் நேரடியாகச் செலுத்தப்படும்.
UPI மற்றும் ATM மூலம் பணம் எடுக்கும் வசதி!
EPFO 3.0 திட்டத்தின் மிக முக்கியமான அம்சம், பிஎஃப் கணக்குகளை நவீன வங்கி நெட்வொர்க்குகள் மற்றும் டிஜிட்டல் பணப் பரிவர்த்தனை தளங்களுடன் இணைப்பதாகும். இந்த புதிய அமைப்பின் கீழ், மருத்துவ அவசரநிலைகளின் போது BHIM UPI அல்லது நேரடியாக ஏடிஎம் மூலம் ஒரு குறிப்பிட்ட வரம்பு வரை பணத்தை எடுக்க முடியும். பாதுகாப்புக் காரணங்களுக்காக ஆரம்பத்தில் இந்த வசதி அரசு டிஜிட்டல் தளமான ‘BHIM UPI’ தளத்தில் மட்டுமே இணைக்கப்படும். அதன் பிறகு மற்ற தனியார் பணப் பரிவர்த்தனை செயலிகளும் இதில் சேர்க்கப்படலாம். முழு செயல்முறையும் காகிதமற்றதாக (paperless) மாற்றப்பட்டுள்ளது. எனவே இதற்கு நிறுவனத்திடமிருந்து முன் அனுமதி எதுவும் தேவையில்லை.
இணையதள முடக்கப் பிரச்சனை இருக்காது!
இதுவரை, பிராந்திய அளவில் பல்வேறு சர்வர்களில் தரவுகள் சிதறிக்கிடந்ததால் அதிகாரப்பூர்வ EPFO இணையதளம் அடிக்கடி முடங்கியது அல்லது வேகம் குறைந்தது. EPFO 3.0 முழுமையாக கிளவுட் அடிப்படையிலானதாகவும், மையமாக நிர்வகிக்கப்படும் வகையிலும் உருவாக்கப்படுகிறது. இது கணினி முடக்கத்தை ஏற்படுத்தும் தொழில்நுட்பக் கோளாறுகளை நீக்கும் என்று கூறப்பட்டுள்ளது. இந்த அமைப்பு தற்போது தீவிர சோதனைக்கு உட்படுத்தப்பட்டு, அதன் இறுதிக்கட்டத்தில் உள்ளது. முதலில் ஜூலை-ஆகஸ்ட் மாதங்களில் அறிமுகப்படுத்தத் திட்டமிடப்பட்டிருந்தாலும், தொழில்நுட்ப மேம்பாடுகள் காரணமாக காலக்கெடு தள்ளிவைக்கப்பட்டுள்ளது.
இந்த புரட்சிகரமான அமைப்பு இப்போது பண்டிகைக் காலத்தையொட்டி, அதாவது செப்டம்பர் மாத இறுதியில் அல்லது தீபாவளி சமயத்தில் அதிகாரப்பூர்வமாக அறிமுகப்படுத்தப்படும் என்று எதிர்பார்க்கப்படுகிறது. இதனால் ஊழியர்கள் மத்தியில் எதிர்பார்ப்புகள் அதிகரித்துள்ளன. எனினும், இதற்கான அதிகாரப்பூர்வ அறிவிப்பு அரசிடமிருந்து வரும்வரை காத்திருக்கத்தான் வேண்டும்.
Source link