கடந்த சில ஆண்டுகளில் இந்தியாவில் வீடுகளின் விலையும், வீடு கட்டும் நிலத்துக்கான விலையும் கடுமையாக உயர்ந்துள்ளது. இதனால் சாமானிய மக்கள் சொந்த வீட்டில் குடியேறுவது எட்டா கனவாக மாறியுள்ளது.
சொந்தமாக ஒரு வீடு வாங்குவது என்பது இப்போது மிகவும் கடினமாகிவிட்டது. விலை எல்லாம் உயர்ந்துவிட்டது. கட்டி முடிக்கப்பட்ட ஒரு வீட்டை வாங்குவது பலருக்கும் இன்னும் கனவாகவே இருக்கிறது. இந்நிலையில் அனராக் நிறுவனம் வெளியிட்டுள்ள அறிக்கையின்படி, நம் நாட்டின் முதல் ஏழு நகரங்களில் வீடுகளின் விலை 2021 மற்றும் 2025ஆம் ஆண்டுக்கு இடைப்பட்ட காலத்தில் 59 சதவீதம் அதிகரித்துள்ளது. ஆச்சரியப்படும் விதமாக, இக்காலத்தில் கட்டுமானச் செலவுகள் 34 சதவீதம் மட்டுமே அதிகரித்துள்ளன. அதாவது, வீடுகளைக் கட்டுவதற்கான செலவை விட விற்பனை விலை மிக வேகமாக உயர்ந்துள்ளது.
உயர்வுக்கான காரணங்கள்!
ஒரு பொதுவான குடியிருப்புத் திட்டத்தைப் பொறுத்தவரையில், 2021ஆம் ஆண்டில் சராசரி கட்டுமானச் செலவு ஒரு சதுர அடிக்கு ரூ. 2,681 ஆக இருந்தது. இது 2025ஆம் ஆண்டில் ஒரு சதுர அடிக்கு ரூ. 3,604 ஆக அதிகரித்தது. மறுபுறம், அதே நகரங்களில் வீடுகளின் விற்பனை விலை ஒரு சதுர அடிக்கு 5,826 ரூபாயில் இருந்து ரூ. 9,260 ஆக உயர்ந்தது. இது 59 சதவீதம் என்ற மிகப்பெரிய உயர்வாகும். வீடுகளின் விலை உயர்வில் கட்டுமானச் செலவுகள் 66 சதவீதம் பங்களிக்கின்றன. மீதமுள்ள 34 சதவீத உயர்வுக்கான காரணங்களாக அதிக நிலத்தின் விலை, கட்டுமான நிறுவனங்களின் லாப வரம்பு மற்றும் சந்தையில் வீடுகளுக்கான பெரும் தேவை ஆகியவை இருக்கின்றன.
நிலத்தின் விலை உயர்வு முக்கிய காரணம்!
சிமெண்ட், இரும்புக்கம்பி மற்றும் தொழிலாளர் கூலி ஆகியவற்றின் செலவுகள் அதிகரித்திருந்தாலும், நிலத்தின் விலையில்தான் மிகப்பெரிய உயர்வு காணப்பட்டது. 2021 மற்றும் 2026ஆம் ஆண்டின் முதல் பாதிக்கு இடைப்பட்ட காலத்தில், முதல் ஏழு நகரங்களில் நிலத்தின் விலைகள் 50 சதவீதம் முதல் 120 சதவீதம் வரை உயர்ந்துள்ளன. டெல்லி-என்சிஆர் பகுதியில் நிலத்தின் விலைகள் 70 சதவீதம் முதல் 130 சதவீதம் வரையிலும், பெங்களூருவில் 60 சதவீதம் முதல் 120 சதவீதம் வரையிலும் உயர்ந்துள்ளன. விரைவுச் சாலைகள் மற்றும் மெட்ரோ ரயில் போன்ற புதிய உள்கட்டமைப்பு மேம்பாடுகள், கட்டுமானத் திட்டங்கள் தொடங்குவதற்கு முன்பே நிலத்தை மிகவும் விலை உயர்ந்ததாக மாற்றியுள்ளன. இதனால் டெவலப்பர்களால் மலிவு விலையில் வீடுகளை வழங்குவது கடினமாகியுள்ளது.
மூலப்பொருட்களின் விலையேற்றம்!
மத்திய கிழக்குப் பகுதியில் அமெரிக்கா மற்றும் ஈரான் இடையே நிலவும் பதற்றம் காரணமாக கட்டுமானச் செலவுகள் 8 முதல் 10 சதவீதம் வரை அதிகரித்துள்ளன. கட்டுமான இரும்புக் கம்பிகளின் விலை 20 சதவீதம் உயர்ந்து, ஒரு டன்னுக்கு 72,000 ரூபாயை எட்டியுள்ளது. சரக்கு மற்றும் போக்குவரத்துச் செலவுகள் 15 முதல் 20 சதவீதம் வரை அதிகரித்துள்ளன. டைல்ஸ், கண்ணாடி, பிளம்பிங் மற்றும் மின்சாரப் பணிகளுக்குப் பயன்படுத்தப்படும் தாமிரம் மற்றும் அலுமினியம் ஆகியவற்றின் விலையேற்றத்தால் ஒட்டுமொத்தச் செலவுகள் 9 முதல் 13 சதவீதம் வரை உயர்ந்துள்ளன. தொழிலாளர் கூலி 5 முதல் 6 சதவீதம் வரையிலும், சிமெண்ட் விலை 4 முதல் 5 சதவீதம் வரையிலும் சற்று அதிகரித்துள்ளன.
லாப வரம்பு சார்ந்த நெருக்கடி!
கட்டுமானச் செலவுகளில் ஏற்பட்டுள்ள இந்த புதிய உயர்வு என்பது புதிய மற்றும் ஏற்கனவே நடைபெற்று வரும் திட்டங்களில் வெவ்வேறு விதமான தாக்கங்களை ஏற்படுத்துகிறது. ஏற்கனவே தொடங்கப்பட்டு விற்பனை செய்யப்பட்ட திட்டங்களுக்கு வாங்குபவர்களிடமிருந்து கூடுதல் கட்டணத்தை வசூலிக்க முடியாததால், டெவலப்பர்களின் லாபம் குறைகிறது. அதேவேளையில், வரவிருக்கும் புதிய திட்டங்களில் அதிகரித்த செலவுகளை வாடிக்கையாளர்கள் மீது சுமத்த அவர்கள் முயற்சிப்பார்கள். ஆடம்பர மற்றும் உயர்தர வீட்டுத் திட்டங்களில் உள்ள வாங்குபவர்களால் இந்த விலை உயர்வைச் சமாளிக்க முடிந்தாலும், மலிவு விலை மற்றும் நடுத்தர வருவாய் பிரிவினருக்கான வீடுகளின் விலை உயர்வு சாமானிய, மிடில் கிளாஸ் மக்களின் பட்ஜெட்டில் கடுமையான தாக்கத்தை ஏற்படுத்துகிறது.
Source link