வீட்டில் எந்தப் பொருளை எங்கு வைக்க வேண்டும் என்பதில் வாஸ்து சாஸ்திரத்தைப் பின்பற்றுபவர்கள் பலர் உள்ளனர். அந்த வகையில், வீட்டில் மாட்டப்படும் புகைப்படங்களுக்கும் முக்கியத்துவம் இருப்பதாக வாஸ்து நம்பிக்கைகள் கூறுகின்றன. குறிப்பிட்ட சில வகை படங்களை வீட்டில் வைப்பது எதிர்மறையான சூழலை உருவாக்கும் என இந்த நம்பிக்கைகள் குறிப்பிடுகின்றன.
அந்த வகையில், வீட்டின் சுவர்களில் போர் அல்லது சண்டைக் காட்சிகள் இடம்பெறும் புகைப்படங்களை வைப்பதைத் தவிர்க்க வேண்டும் என வாஸ்து சாஸ்திரம் கூறுகிறது. இதுபோன்ற படங்கள் வன்முறை, கோபம் மற்றும் மோதலை பிரதிபலிப்பதால், வீட்டின் அமைதியான சூழலுக்கு ஏற்றதாக இருக்காது என்ற நம்பிக்கை உள்ளது. இதற்கு பதிலாக இயற்கைக் காட்சிகள் அல்லது மகிழ்ச்சியான குடும்பப் புகைப்படங்களை வைக்கலாம்.
அதேபோல், புலி, சிங்கம், சிறுத்தை போன்ற ஆக்ரோஷமான விலங்குகளின் படங்களையும் வீட்டில் வைக்க வேண்டாம் என வாஸ்து நம்பிக்கைகள் கூறுகின்றன. குறிப்பாக ஹால் போன்ற முக்கிய இடங்களில் இத்தகைய படங்களை அலங்காரத்திற்காக வைப்பதைத் தவிர்க்கலாம். விலங்குகளின் படங்களை விரும்புபவர்கள் அமைதியான விலங்குகள் அல்லது அழகான பறவைகளின் படங்களைத் தேர்வு செய்யலாம்.
முள் நிறைந்த தாவரங்களின் புகைப்படங்களுக்கும் இதே கட்டுப்பாடு கூறப்படுகிறது. கற்றாழை, கள்ளி போன்ற முள் செடிகளின் படங்களை வீட்டில் வைப்பது உறவுகளில் விரிசல் மற்றும் பண விஷயங்களில் சிக்கலை ஏற்படுத்தும் என்ற வாஸ்து நம்பிக்கை உள்ளது. இதற்கு பதிலாக பசுமையான மரங்கள், பூக்கள் நிறைந்த தோட்டங்கள் போன்ற இயற்கைக் காட்சிகளைத் தேர்வு செய்வது நல்லது எனக் கருதப்படுகிறது.
அப்படியானால் வீட்டில் எந்த மாதிரியான புகைப்படங்களை வைக்கலாம் என்ற கேள்வி எழும். நேர்மறையான எண்ணங்களை உருவாக்கும் இயற்கைக் காட்சிகள், ஓடும் நீர், உதய சூரியன், பசுமையான தோட்டம், மலர்கள் மற்றும் சிரிக்கும் குழந்தைகள் போன்ற படங்களை வைக்கலாம். தெய்வங்களின் புகைப்படங்களையும் உரிய இடத்தில் வைத்து வழிபடலாம்.
வீட்டின் சூழல் மனநிலையிலும் குடும்ப உறவுகளிலும் தாக்கத்தை ஏற்படுத்தும் என்பதால், நமக்கு மகிழ்ச்சியையும் அமைதியையும் தரும் புகைப்படங்களைத் தேர்வு செய்வது நல்ல பழக்கமாக இருக்கும். வாஸ்து நம்பிக்கைகளைப் பின்பற்றுபவர்கள் வீட்டில் ஏற்கெனவே வைக்கப்பட்டுள்ள புகைப்படங்களையும் ஒருமுறை கவனித்து, தங்களுக்கு ஏற்ற வகையில் மாற்றி அமைத்துக் கொள்ளலாம்.
Also Read: சீட் பெல்ட் அணிவது கட்டாயம்.. ஏற்கெனவே சட்டம் இருக்கு! விதிகளை அமல்படுத்துவது யார் பொறுப்பு? உச்சநீதிமன்றம் அதிரடி..