செப்டம்பர் 25 முதல் திரையரங்குகளில்
‘அவெஞ்சர்ஸ் எண்ட்கேம்: என்கோர்’ திரைப்படம் செப்டம்பர் 25ஆம் தேதி இந்திய திரையரங்குகளில் வெளியாகிறது. ஆங்கிலம், இந்தி, தமிழ் மற்றும் தெலுங்கு ஆகிய மொழிகளில் இப்படத்தை ரசிகர்கள் மீண்டும் பெரிய திரையில் காணலாம். குறிப்பாக, ஐமேக்ஸ், மார்வெல் ஸ்டுடியோஸின் இன்ஃபினிட்டி விஷன், 4DX, MX4D, SCREENX, DOLBY VISION, HDR BARCO மற்றும் ICE உள்ளிட்ட பிரீமியம் திரையிடல் வடிவங்களில் இப்படம் வெளியாகிறது.
‘டூம்ஸ்டே’ படத்தின் பிரத்யேக காட்சி
‘எண்ட்கேம்’ திரைப்படத்தை மீண்டும் திரையரங்கில் பார்க்கும் வாய்ப்பு மட்டுமின்றி, ரசிகர்களுக்கு மற்றொரு சிறப்பு அனுபவமும் காத்திருக்கிறது. மிகவும் எதிர்பார்க்கப்படும் ‘அவெஞ்சர்ஸ்: டூம்ஸ்டே’ திரைப்படத்தின் பிரத்யேக காட்சியும் ‘எண்ட்கேம்: என்கோர்’ திரையிடலுடன் இடம்பெறும் என தெரிவிக்கப்பட்டுள்ளது. ‘அவெஞ்சர்ஸ்: டூம்ஸ்டே’ திரைப்படம் டிசம்பர் 18ஆம் தேதி திரையரங்குகளில் வெளியாகும் என அறிவிக்கப்பட்டுள்ள நிலையில், அதற்கு முன்னதாக பிரத்யேக காட்சியைப் பார்க்கும் வாய்ப்பு ரசிகர்களிடையே எதிர்பார்ப்பை அதிகரித்துள்ளது.
பிரம்மாண்ட திரை… சிறப்பான அனுபவம்
‘அவெஞ்சர்ஸ் எண்ட்கேம்: என்கோர்’ படத்தை பிரீமியம் வடிவங்களில் வெளியிடுவதன் மூலம், படத்தின் பிரம்மாண்டமான காட்சிகளையும் ஒலியமைப்பையும் ரசிகர்கள் மேலும் சிறப்பாக அனுபவிக்க முடியும். மார்வெல் ஸ்டுடியோஸின் இன்ஃபினிட்டி விஷன் சான்றிதழ் பெற்ற திரையரங்குகளில் பெரிய திரைகள், அதிக ஒளிர்வு மற்றும் மேம்பட்ட ஒலி அமைப்பு உள்ளிட்ட அம்சங்களுடன் திரைப்படம் திரையிடப்பட உள்ளது.
மீண்டும் தானோஸுக்கு எதிரான இறுதிப்போர்:
‘அவெஞ்சர்ஸ்: எண்ட்கேம்’ திரைப்படத்தின் கதையில், தானோஸின் செயலால் உலக மக்கள் தொகையில் பாதி பேர் அழிந்த பின்னர், மீதமுள்ள சூப்பர் ஹீரோக்கள் அந்த இழப்பிலிருந்து மீண்டு தங்கள் வாழ்க்கையைத் தொடர போராடுகின்றனர். இழந்தவர்களை மீட்டெடுத்து உலகில் மீண்டும் அமைதியையும் ஒழுங்கையும் கொண்டுவருவதற்காக அவெஞ்சர்ஸ் குழு ஒன்றிணைகிறது. இதன் தொடர்ச்சியாக தானோஸுக்கு எதிரான பிரம்மாண்டமான இறுதிப் போரில் சூப்பர் ஹீரோக்கள் களமிறங்குகின்றனர். பல ஆண்டுகளுக்குப் பிறகும் ரசிகர்களிடையே நீடித்து வரும் இந்தப் படத்தின் வரவேற்பை மீண்டும் திரையரங்கில் கொண்டாடும் வகையில் தற்போது ‘எண்ட்கேம்: என்கோர்’ வெளியாகிறது.
யார் இயக்கம்?
‘அவெஞ்சர்ஸ்: எண்ட்கேம்’ படத்தை ஆண்டனி ரூஸோ மற்றும் ஜோ ரூஸோ இயக்கியுள்ளனர். கெவின் ஃபெஜ் தயாரித்துள்ள இப்படத்திற்கு லூயிஸ் டி’எஸ்போசிட்டோ, விக்டோரியா அலோன்சா, மைக்கேல் கிரில்லோ, டிரின் ட்ரான், ஜான் ஃபேவ்ரோ, ஜேம்ஸ் கன் மற்றும் ஸ்டான் லீ உள்ளிட்டோர் நிர்வாகத் தயாரிப்பாளர்களாகப் பணியாற்றியுள்ளனர்.
இதனால், மார்வெல் ரசிகர்களுக்கு ஒரே நேரத்தில் ‘எண்ட்கேம்’ படத்தை மீண்டும் பெரிய திரையில் அனுபவிக்கும் வாய்ப்பும், ‘டூம்ஸ்டே’ குறித்த பிரத்யேக காட்சியைப் பார்க்கும் வாய்ப்பும் கிடைக்கிறது. செப்டம்பர் 25 முதல் திரையரங்குகளில்… மார்வெல் ரசிகர்களுக்கு மீண்டும் ஒரு ‘எண்ட்கேம்’ அனுபவம்!