அணுசக்தி ஒப்பந்தத்துக்கு சம்மதிக்காவிட்டால் கடும் விளைவை சந்திக்க நேரிடும்; ஈரானுக்கு அதிபர் டிரம்ப் மிரட்டல்

மேற்காசிய நாடான ஈரானுடன், 2015ல் கையெழுத்தான அணுசக்தி ஒப்பந்தத்தில் இருந்து, 2018ல், அமெரிக்கா விலகியது. இதைத் தொடர்ந்து ஈரானுக்கு எதிராக பொருளாதாரத் தடை, அணு ஆயுதம் தயாரிப்பதாகக் கூறி தாக்குதல் போன்ற நடவடிக்கைகளில் அமெரிக்கா ஈடுபட்டது.

இந்நிலையில், அணுசக்தி தொடர்பான ஒப்பந்தத்தில் கையெழுத்திடும்படி, ஈரானுக்கு அமெரிக்கா நெருக்கடி கொடுத்தது. இதன்படி, மேற்காசிய நாடான ஓமன் தலை நகர் மஸ்கட்டில் பேச்சு நடந்தது. இது நேரடியாக இல்லாமல், ஓமன் வெளியுறவுத் துறை அமைச்சர் சயீத் பத்தர் பின் ஹமத் அல் புசைதி உடன், அமெரிக்க, ஈரான் பிரதிநிதிகள் தனித்தனியாக பேச்சு நடத்தினர் .

இந்நிலையில், அமெரிக்க அதிபர் டொனால்டு டிரம்ப் கூறியுள்ளதாவது:புதிதாக ஒரு ஒப்பந்தத்தை எட்ட வேண்டிய கட்டாயத்தில் ஈரான் உள்ளது. இந்த ஒப்பந்தத்திற்கு சம்மதிக்காவிட்டால் அதன் விளைவுகள் மிகவும் கடுமையாக இருக்கும் என்பது ஈரானுக்கு தெரியும். கடந்தாண்டு ஜூனில், ஈரானின் அணுசக்தி தளங்கள் மீது அமெரிக்கா நடத்திய தாக்குதலை விட இது மிக கடுமையானதா க இருக்கும்.

தற்போது, அமெரிக்காவின் பிரமாண்ட கடற்படை ஈரானை நோக்கி சென்று கொண்டிருக்கின்றன. ஈரான் சரியான முடிவை எடுக்காவிட்டால், ராணுவ தாக்குதல் நடத்த தயங்க மாட்டோம்.இவ்வாறு அவர் கூறினார்.

ஈரான் தன் மண்ணில் யுரேனியம் செறிவூட்டலை முற்றிலுமாக நிறுத்த வேண்டும், ஏவுகணை திட்டங்களுக்கு தடை விதிக்க வேண்டும் என, அமெரிக்கா நிபந்தனை விதித்துள்ளதாகக் கூறப்படுகிறது. ஆனால், இவற்றை ஈரான் நிராகரித்துள்ளதாக தெரிகிறது.

அடுத்தக்கட்ட பேச்சு அடுத்த வார துவக்கத்தில் நடைபெற உள்ளதாக தகவல்கள் தெரிவிக்கின்றன. பேச்சு நடக்கும் நிலையில், டிரம்ப் ஒரு புதிய அதிரடி உத்தரவில் கையெழுத்திட்டுள்ளார்.

இதன்படி, ஈரானுடன் வணிகம் மற்றும் வர்த்தக தொடர்பு வைத்துள்ள எந்தவொரு நாட்டின் பொருட்களும், அமெரிக்காவில் இறக்குமதியாகும் போது, அதன்மீது கூடுதலாக 25 சதவீதம் வரி விதிக்கப்படும் என தெரிவிக்கப்பட்டுள்ளது.