தீவுத்திடலில் புதிய தலைமை செயலகம்; பட்டினப்பாக்கத்தை கைவிட தமிழக அரசு முடிவு

நவீன வசதிகளுடன் கூடிய சட்டசபை, தலைமை செயலக வளாகம், சென்னையில், 20 லட்சம் சதுரடி பரப்பளவில், 1,200 கோடி ரூபாய் மதிப்பீட்டில் உருவாக்கப்படும் என சட்டசபையில் முதல்வர் விஜய் அறிவித்தார். பட்டினம்பாக்கத்தில் முதல்வர் விஜய் வீடு அருகே உள்ள இடத்தில், தலைமை செயலகம் கட்டுவதற்கான அரசாணை வெளியிடப்பட்டது. அந்த இடத்தில் கட்டுவதற்கு, பட்டினம் பாக்கத்தை சுற்றியுள்ள மீனவர் கிராமங்கள் எதிர்ப்பு தெரிவித்து, தொடர் போராட்டத்தில் ஈடுபட்டு வருகின்றன.

தற்போது பட்டினம்பாக்கத்தில் புதிய தலைமை செயலகம் அமைக்கும் முடிவை தமிழக அரசு கைவிட முடிவு செய்துள்ளது. தீவுத்திடலில் 13.22 ஏக்கர் பரப்பளவு கொண்ட பல்லவன் ஹவுஸ் வளாகத்தை மாற்று இடமாக தமிழக அரசு பரிசீலித்து வருகிறது. இங்கு பெருநகரப் போக்குவரத்துக் கழகம், மாநில விரைவுப் போக்குவரத்துக் கழகம் ஆகிய இரண்டின் தலைமையகங்களும், இரண்டு பணிமனைகளும் செயல்படுகின்றன.

அதிகாரிகள் கூறியதாவது: கட்டடங்களுடன் சேர்த்து 13.22 ஏக்கர் நிலப்பரப்பைக் கொண்ட இந்தப் பகுதி, புதிய செயலக வளாகத்திற்குப் பொருத்தமானதாக இருக்கும். தலைமை செயலக ஊழியர்கள் பஸ், ரயில் மற்றும் மெட்ரோ ரயில் மூலமாக எளிதாக வந்து செல்ல முடியும். ஏற்கனவே அரசிற்கு சொந்தமானது என்பதால், கூடுதலாக எந்த நிலத்தையும் கையகப்படுத்தத் தேவையில்லை. மக்களை வெளியேற்றும் அவசியம் இருக்காது.

அந்த இடத்தைத் தேர்ந்தெடுப்பது அரசியல் ரீதியாக வசதியானது.பல்லவன் ஹவுஸ் வளாகம் தேர்ந்தெடுக்கப்பட்டால், எம்டிசி தலைமையகத்திற்கு அரசு ஒரு மாற்று இடத்தைக் கண்டறிய வேண்டியிருக்கும். கோயம்பேட்டில் உள்ள சென்னை புறநகர் பஸ் நிலையத்தை (சிஎம்பிடி) போக்குவரத்துக் கழகங்களின் தலைமையகமாக இடமாற்றம் செய்வதற்குப் பரிசீலிக்கலாம். இவ்வாறு அவர்கள் கூறினர்.

இந்த இடம் ஓமந்தூரார் அரசு வளாகத்திற்கு அருகில் அமைந்துள்ளது. அங்கு தான் முந்தைய திமுக அரசு ஒரு புதிய தலைமைச் செயலக வளாகத்தைக் கட்டி இருந்தது. 1,000 கோடி ரூபாய்க்கும் அதிகமான செலவில் கட்டப்பட்ட ஓமந்தூரார் வளாகம், பின்னர் அரசு மருத்துவமனையாக மாற்றப்பட்டது. 2003ம் ஆண்டில், அப்போதைய முதல்வர் ஜெயலலிதா, குயின் மேரி கல்லூரி வளாகத்தில் ஒரு புதிய தலைமைச் செயலகம் கட்டும் திட்டத்தை அறிவித்தார்.

கல்லூரி வளாகத்தின் ஒரு பகுதியை இடிக்க வேண்டி இருந்தது. மாணவர்களின் போராட்டத்தை தொடர்ந்து முடிவு கை விடப்பட்டது. 2004ம் ஆண்டில் கொட்டூர்புரம் ஒரு மாற்று இடமாக ஆராயப்பட்டது. இறுதி முடிவு எடுக்காமல் கைவிடப்பட்டது. தற்போது புதிய தலைமை செயலகத்தை கட்டுவதற்கு தவெக அரசு முனைப்புடன் செயல்பட்டு வருகிறது.