சென்னை பெரம்பூரில் நிலத்தடி கழிவுநீர்க் குழாய்களைச் சுத்தம் செய்வதற்காக 13 நவீன இயந்திரங்களை வாங்க தமிழ்நாடு அரசு டெண்டர் கோரியுள்ளது. முதலமைச்சர் விஜய்யின் உத்தரவைத் தொடர்ந்து இந்த நடவடிக்கை எடுக்கப்பட்டுள்ளதாகவும், தொகுதி ஒதுக்கீட்டு நிதியின் மூலம் இதற்கான கொள்முதல் மேற்கொள்ளப்படும் எனவும் மாலை மலர் செய்தி வெளியிட்டுள்ளது.
சென்னையில் பாதாள சாக்கடைகளில் மனிதர்கள் இறங்காமல் இயந்திரங்கள் மூலம் கழிவுநீர் சுத்திகரிப்புப் பணிகளை விரிவுபடுத்தும் முயற்சியின் ஒரு பகுதியாக, சென்னை பெருநகரக் குடிநீர் வழங்கல் மற்றும் கழிவுநீரகற்று வாரியம் இந்த டெண்டர் நடைமுறையைத் தொடங்கியுள்ளது. இந்த டெண்டர் இரு-உறை நடைமுறையைப் (Two-cover procedure) பயன்படுத்தி, தேசிய போட்டி ஏல முறை மூலம் செயல்படுத்தப்படுகிறது.
நிலத்தடி கழிவுநீர் அமைப்புகளைச் சுத்தம் செய்வதற்காகச் தூய்மைப் பணியாளர்கள் நேரடியாக இறங்குவதைக் குறைப்பதை நோக்கமாகக் கொண்டு இந்த இயந்திரங்கள் வாங்க டெண்டர் விடப்பட்டுள்ளது. பாதாள சாக்கடை சுத்திகரிப்புப் பணிகள் தொழிலாளர்களை நச்சு வாயுக்கள், அபாயகரமானப் பொருட்கள் மற்றும் உயிருக்கு ஆபத்தானச் சூழல்களுக்கு ஆளாக்குகின்றன. இந்தநிலையில், இத்தகைய சிறப்பு இயந்திரங்களின் பயன்பாட்டை விரிவுபடுத்துவது அபாயங்களைக் கட்டுப்படுத்த உதவுவதோடு, கழிவுநீர் பராமரிப்பின் பாதுகாப்பையும் திறனையும் மேம்படுத்துகிறது. மேலும், ஆபத்தான முறையில் மனிதர்கள் பாதாள சாக்கடைகளில் இறங்கி கழிவுகளை அகற்றும் முறைகளைச் சார்ந்திருப்பதைக் குறைக்கிறது.
இந்த டெண்டர் மூலம் மூன்று சக்கர மற்றும் நான்கு சக்கர வண்டிகள் கொண்ட கழிவு அகற்றும் இயந்திரங்கள் (Desilting machines), ஜெட்-ரோடிங் இயந்திரங்கள் (Jet-rodding machines) மற்றும் சூப்பர் சக்கர் இயந்திரங்கள் (Super sucker machines) வாங்க திட்டமிடப்பட்டுள்ளன.