‘பாரா’ ஆசியா… இந்தியா அசத்தல்: ஒரே நாளில் 29 பதக்கம்

ஜப்பானின் அய்ச்சி–நகோயாவில், மாற்றுத்திறனாளிகளுக்கான ‘பாரா’ ஆசிய விளையாட்டு 5வது சீசன் நடக்கிறது. இந்தியா சார்பில் 168 பேர் பங்கேற்றுள்ளனர். முதல் இரண்டு நாளில் 35 பதக்கம் கைப்பற்றிய இந்திய நட்சத்திரங்கள் நேற்றும் தனது பதக்க வேட்டையை தொடர்ந்தனர்.

பார்வை குறைபாடு உள்ள பெண்களுக்கான 100 மீ., ‘டி 12’ பைனல் நடந்தது. இந்தியா சார்பில் சிம்ரன் சர்மா, 26, பங்கேற்றார். போட்டி துவக்கத்தில் இருந்து முந்திய சிம்ரன், முடிவில் 12.02 வினாடி நேரத்தில் வந்தார். புதிய பாரா ஆசிய சாதனை படைத்து, தங்கப்பதக்கம் வென்றார். நடப்பு தொடரில் இவர் வென்ற இரண்டாவது தங்கம் ஆனது.

முன்னதாக, 200 மீ., ஓட்டத்திலும் சிம்ரன் தங்கம் வென்றிருந்தார். தவிர, அன்குர், ஷீத்தல் தேவி, நிஷாத்திற்குப் பின், ஒரே பாரா ஆசிய விளையாட்டில் 2 தங்கம் வென்ற நான்காவது இந்தியர் ஆனார் சிம்ரன்.

பெண்களுக்கான 100 மீ., ஓட்டம் ‘டி 35’ பிரிவில் இந்தியாவின் பிரீத்தி பால், 13.98 வினாடி நேரத்தில் வந்து, வெள்ளிப்பதக்கம் வென்றார். சீனாவின் ஜியா (13.57), ஈராக்கின் பாத்திமா (14.68) தங்கம், வெண்கலம் வசப்படுத்தினர்.

ஆண்களுக்கான 100 மீ., ஓட்டம், ‘டி 64’ பிரிவு பைனலில் இந்தியாவின் பிரனவ் தேசாய், 11.96 வினாடியில் வர, வெண்கலப் பதக்கம் கிடைத்தது. ஜப்பானின் கெங்கோ (11.39), தாய்லாந்தின் தென்பூம் (11.78) முதல் இரு இடம் பிடித்தனர்.

திலிப் கலக்கல்

ஆண்களுக்கான 100 மீ., ஓட்டம் ‘டி 47’ பிரிவில் பைனல் நடந்தது. இந்தியா சார்பில் களமிறங்கிய திலிப் மகது காவிட், 10.69 வினாடி நேரத்தில் வந்து முதலிடம் பெற்று, தங்கப்பதக்கம் கைப்பற்றினார். இந்தியாவின் மற்றொரு வீரர் முகமது மோர்சிங்கனாகத், 10.72 வினாடியில் வர, வெள்ளிப்பதக்கம் கிடைத்தது.

ஆண்களுக்கான 1500 மீ., ‘டி 12/13’ பிரிவில் இந்தியாவின் ஷரத் மகனஹள்ளி பங்கேற்றார். இவர், 4 நிமிடம், 11.01 மீ., நேரத்தில் வந்து இரண்டாவது இடம் பெற்று, வெள்ளிப் பதக்கம் கைப்பற்றினார். ஜோர்டானின் நபீல் (4:07.97), பிலிப்பைன்சில் சைரில் (4:23.19) தங்கம், வெண்கலம் வென்றனர்.

400 மீ., ஓட்டத்தில் இந்தியாவின் அகிரா பனோது (‘டி 35/38’), 100 மீ., ஓட்டம் ‘டி 47’ பிரிவில் முகமது பாசில் (), ஆண்கள் நீச்சலில் ரவி புதிகினா () வெள்ளிப்பதக்கம் வசப்படுத்தினர்.

இரண்டு பதக்கம்

ஆண்களுக்கான உயரம் தாண்டுதலில் (‘டி 64’) இந்தியா சார்பில் பிரவீன் குமார், பான்டி பங்கேற்றனர். இதில் 2.05 மீ., உயரம் தாண்டிய பிரவீன் குமார், ஆசிய பாரா சாதனையுடன் தங்கப்பதக்கம் வசப்படுத்தினார். 1.92 மீ., தாண்டிய பான்டிக்கு வெள்ளிப்பதக்கம் கிடைத்தது. உஸ்பெகிஸ்தானின் ஜியாஜோவ் (1.86) வெண்கலம் வென்றார்.