எழுதியவர்:முகமது தாக்கர்
பாலிவுட் நடிகர் டைகர் ஷெரஃப் மீது துப்பாக்கிச்சூடு நடத்திய சம்பவம் பெரும் பரபரப்பை ஏற்படுத்தியுள்ள நிலையில், இந்த சம்பவம் தொடர்பாக கைது செய்யப்பட்டவர்களுக்கு மர்மநபர் ஒருவர் தகவல் கொடுத்ததாக போலீசார் விசாரணையில் தெரியவந்துள்ளது.
இந்த செய்தியை ஆங்கிலத்தில் படிக்க இங்கே க்ளிக் செய்யவும்:
மும்பை ஜுஹு பகுதியில் கடந்த அக்டோபர் 18-ந் தேதி மாலை 7 மணிக்கு, நடிகர் டைகர் ஷெராஃப் காரின் மீது மர்மநபர்கள் துப்பாக்கிச்சூடு நடத்தினர். துப்பாக்கியால் சுட்டுவிட்டு, மோட்டார் சைக்கிளில் தப்பிய மர்மநபர்களுக்கும் அவர்களை கைது செய்ய துரத்திய மும்பை காவல்துறைக்கும் இடையிலான ‘பூனை-எலி’ சேஸிங்கில், தப்பி ஓடியவர்களுக்கு ஒரு சாதகமான அம்சம் இருந்தது.
துப்பாக்கிச்சூடு சம்பவம் குறித்து செய்தி சேனல்களில் ஒளிபரப்பப்படும் தகவல்களின் அடிப்படையில், காவல்துறையின் விசாரணை எந்த அளவிற்கு முன்னேறியுள்ளது என்பதைப் பற்றி அவர்களுக்குத் தொடர்ந்து தகவல் தெரிவிக்கப்பட்டு வந்தது. ஒரு கட்டத்தில், துப்பாக்கிச்சூடு சம்பவம் தொடர்பான வீடியோக்களில் இருந்து எடுக்கப்பட்ட அவர்களின் புகைப்படங்கள் டிவியில் ஒளிபரப்பப்பட்டபோது, தாக்குதல் நடத்தியவர்களில் ஒருவருக்கு தெளிவான அறிவுறுத்தலுடன் கூடிய செய்தி வந்தது:
அந்த செய்தியில் “உங்களின் முகங்கள் வெளியாகிவிட்டன, அங்கிருந்து உடனே வெளியேறுங்கள்” (Tumhare chehre aa gaye hain, nikal jao waha se) என்று மெசேஜ் அனுப்பப்பட்டுள்ளது. இது குறித்த கருத்து கேட்டு அனுப்பப்பட்ட செய்திக்கு இணை ஆணையர் (குற்றம்) அணில் கும்பரே பதிலளிக்கவில்லை.
இந்தத் தாக்குதலில் ஷெராஃப் காயமின்றி தப்பினார்; ஆனால் அவரது டிரைவரும் ஒரு வால்கரும் (vlogger) காயமடைந்தனர். இந்த துப்பாக்கிச்சூட்டை நடத்திய ஃபோல் சிங் (18), ரெஹான் ரஹிசுதீன் அன்சாரி (18), மற்றும் ரித்திக் மஹதோ (22) ஆகிய மூன்று பேரும் அடுத்த நாள் ராஜஸ்தானில் கைது செய்யப்பட்டு அக்டோபர் 31 வரை தடுப்பு காவலில் வைக்கப்பட்டுள்ளனர். இந்த சம்பவம் தொடர்பாக காவல்துறை இதுவரை 10 பேரை கைது செய்துள்ளது. மேலும், இந்த சம்பவத்தில் லாரன்ஸ் பிஷ்னோய் கும்பலுடன் தொடர்பிருப்பதாகக் கூறிக்கொள்ளும் அணில் பண்டிட் என்பவர், சரிபார்க்கப்படாத ஒரு சமூக ஊடகப் பதிவில் இந்தத் தாக்குதலுக்குப் பொறுப்பேற்றுள்ளார்.
இந்நிலையில், டிவி செய்தி அப்டேட்களை துப்பாக்கிச்சூடு நடத்தியவர்களுக்குத் தெரிவித்து வந்தது யார் என்பதை காவல்துறை இன்னும் உறுதி செய்யவில்லை என்று வட்டாரங்கள் தெரிவித்தன. ஆனால், இந்த சம்பவத்தில் சந்தேக நபர்களில் ஒருவரான ரெஹான் அன்சாரிக்கு தகவல் தொடர்பு செயலி மூலம் வழிகாட்டிய நபர்கள், அமெரிக்காவில் பதுங்கியிருப்பதாக நம்பப்படும் பிஷ்னோய் கும்பலின் ஆளான அணில் பண்டிட் அல்லது சமீபத்தில் சோனிபட்டில் கைது செய்யப்பட்ட அங்கீத் கதக் மற்றும் சமீர் கத்ரி ஆகியோராக இருக்கலாம் என்று புலனாய்வாளர்கள் சந்தேகிக்கின்றனர். இவர்களே தாக்குதல்தாரிகளுக்கும் பண்டிட்டிற்கும் இடையில் தொடர்பாக செயல்பட்டதாகக் கூறப்படுகிறது.
துப்பாக்கிச்சூடு நடத்தியவர்களுக்கு செய்திகள் அனுப்ப எந்த மெசேஜிங் செயலி பயன்படுத்தப்பட்டது என்பதை காவல்துறை வட்டாரங்கள் வெளிப்படுத்தவில்லை என்றாலும், பிஷ்னோய் கும்பல் அமெரிக்க நிறுவனத்தால் உருவாக்கப்பட்ட ‘சிக்னல்’ (Signal) அல்லது பதிவு செய்ய மொபைல் எண் தேவையில்லாத அர்மீனியாவில் உருவாக்கப்பட்ட ‘ஜாங்கி’ (Zangi) செயலியைப் பயன்படுத்துகிறார்கள் என்பது தெரிந்த ஒன்று.
சிசிடிவி (CCTV) காட்சிகளில் ரெஹான் தொடர்ந்து போனில் பேசுவது தெரிந்ததாக கூறியுள்ள கால்துறை வட்டாரங்கள், “இது ‘வாய்ஸ் ஓவர் இன்டர்நெட் புரோட்டோகால்’ (VoIP) பயன்படுத்திய ஒரு செயலி என்பது எங்களுக்குத் தெரிந்திருந்தது, ஆனால் எங்களால் அதைக் கண்டுபிடிக்க முடியவில்லை,” என்று தெரிவித்தது. தற்போது குற்றம் சாட்டப்பட்டவர்கள் காவலில் இருக்கும் நிலையில், இரு தரப்பினருக்கும் இடையிலான சில தொடர்புகளை காவல்துறை கைப்பற்றியுள்ளது.
“சில வீடியோக்கள் மற்றும் புகைப்படங்களைத் தவிர, காவல்துறை தங்களை அடையாள காண்பதில் எந்த நிலையை உள்ளது என்பது குறித்து அந்த நபரால் அவர்களுக்கு வழிகாட்டப்பட்டு வந்ததை நாங்கள் கண்டறிந்துள்ளோம். மறுமுனையில் இருந்த நபர் செய்தி சேனல்களைக் கண்காணித்து, ஏதேனும் தகவல்கள் ஒளிபரப்பப்படும் போது, அவர் ரெஹானை எச்சரித்திருப்பார் என்று நாங்கள் சந்தேகிக்கிறோம்,” என்று காவல்துறை வட்டாரம் தெரிவித்தது.
ஒரு கட்டத்தில், பூங்காவிற்கு வெளியே பப்பராசி (paparazzi) மற்றும் வால்கர்கள் எடுத்த வீடியோக்களைப் பயன்படுத்தி செய்தி சேனல்கள் அவர்களின் முகங்களைத் துல்லியமாகக் காட்டியபோது, ரெஹானுக்கு எச்சரிக்கை செய்தி அனுப்பப்பட்டது. காவல்துறையின் விசாரணை எந்த நிலையில் உள்ளது என்பதைப் பற்றிய தகவல்களை வழங்கி, பிற செய்திகளும் இதே வழியிலேயே வந்ததாக வட்டாரங்கள் தெரிவித்தன. அந்தேரியில் அவர்களின் பைக்கை காவல்துறை கண்டுபிடித்துவிட்டதாகவும், அவர்கள் ரயிலில் ஏறியதை அறிந்துகொண்டதாகவும் அவர்களுக்குத் தெரிவிக்கப்பட்டது.
“பைக்கிலிருந்து ரயில், பின்னர் கேப் (Cab) எனப் பயண முறைகளை அவர்கள் தொடர்ந்து மாற்றிக்கொண்டே இருந்ததற்கும், பின்னர் சூரத் பஸ் நிலையத்திலிருந்து பஸ்ஸைப் பிடிக்க முயன்றதற்கும் இதுவே ஒரு காரணமாக இருக்கலாம். ஆனால் அதற்கு அதிக நேரம் எடுத்ததால், அவர்கள் மற்றொரு ரயிலைப் பிடிக்க முடிவு செய்தனர்,” மும்பை காவல்துறையின் கோரிக்கையின் பேரில் செயல்பட்ட கோட்டா காவல்துறை, அந்த ரயிலில் வைத்து அவர்களைப் பிடித்தது என்று காவல்துறை வட்டாரங்கள் தெரிவித்துள்ளது.
குற்றம் சாட்டப்பட்டவர்கள் தப்பிச் செல்லும்போது, மொபைல் நெட்வொர்க்கிற்குப் பதிலாக இன்டர்நெட் மூலமாக மட்டுமே போன் கால் செய்ததாக ‘தி இந்தியன் எக்ஸ்பிரஸ்’ முதலில் அக்டோபர் 20 அன்று செய்தி வெளியிட்டது. இத்தகைய அழைப்புகள் கால் ரெக்கார்டுகளில் காட்டாததால், அவற்றைக் கண்டுபிடிப்பது கடினம். காவல்துறை வட்டாரங்களின்படி, குற்றம் சாட்டப்பட்டவர்கள் ஒரு போன் கால் மட்டுமே சாதாரணமாக செய்துள்ளனர்.
அந்த கால் மும்பையின் வடக்கு புறநகர்ப் பகுதியான போரிவலியிலிருந்து சூராத்திற்கு தங்களை அழைத்துச் சென்ற கேப் டிரைவருக்குச் செய்யப்பட்டது. இந்த ஒரு அழைப்பே இறுதியில் காவல்துறையைச் சூரத்திற்கும், அங்கிருந்து அவர்கள் ஜெய்ப்பூருக்கு ரயிலில் ஏறிய ரயில் நிலையத்திற்கும் அழைத்துச் சென்றது.