ஓய்வு பெறுவது என்பது நிதி சார்ந்த பல புதிய முடிவுகளை எடுக்க வேண்டிய ஒரு தருணமாகும். குறிப்பாக, உங்களின் இ.பி.எஃப் (EPF) சேமிப்புத் தொகையை என்ன செய்வது என்பது மிகப்பெரிய கேள்வியாக இருக்கும். நீங்கள் 58 வயதில் ஓய்வு பெற்றால், உங்கள் பணத்திற்கு எந்த வயது வரை தொடர்ந்து வட்டி கிடைக்கும்?
58 வயதில் ஓய்வு பெறும்போது, உங்களது பி.எஃப். (EPF) சேமிப்பை உடனடியாக எடுக்க வேண்டும் என்ற அவசியமில்லை. உங்களால் அந்தப் பணத்தை உங்கள் கணக்கிலேயே தொடர்ந்து வைத்து வட்டி பெற முடியும். இருப்பினும், வட்டி வரவு வைக்கப்படுவதற்கு ஒரு காலவரையறை உள்ளது. இந்த வரம்பை மிஸ் செய்வது உங்கள் ஓய்வூதியத் திட்டமிடலைப் பாதிக்கலாம்.
ஓய்வு பெற்ற ஊழியரின் இ.பி.எஃப் கணக்கு எப்போது வரை வட்டி ஈட்டுவதைத் தொடரும், எப்போது சேமிப்பைத் திரும்பப் பெறுவது நல்லது என்பது குறித்து ஊழியர்களின் வருங்கால வைப்பு நிதி அமைப்பு எக்ஸ் தளத்தில் விளக்கம் அளித்துள்ளது.
ஓய்வுக்குப் பிறகு உங்கள் இபிஎஃப் கணக்கு எப்போது வரை வட்டி ஈட்டும்?
இ.பி.எஃப்.ஒ. பகிர்ந்துள்ள தகவலின்படி, 58 வயதில் ஓய்வு பெறும் ஒரு ஊழியர், அடுத்த மூன்று ஆண்டுகளுக்கு அதாவது தனது 61 வயது வரை தனது இ.பி.எஃப் இருப்புத் தொகைக்கு தொடர்ந்து வட்டி பெற முடியும்.
இதன் மூலம், ஓய்வு பெற்றவர்கள் 58 வயது ஆனவுடன் முழு இ.பி.எஃப் சேமிப்பையும் உடனடியாகத் திரும்பப் பெற வேண்டியதில்லை என்பது தெளிவாகிறது. அவர்கள் இந்த மூன்று ஆண்டு காலத்திற்குள் பணத்தை கணக்கிலேயே விட்டுவிட்டு வட்டி பெறலாம். இருப்பினும், இந்தக் காலக்கெடு முடிந்து கணக்கு செயல்படாத நிலைக்கு (Inoperative Account) சென்றதும், அதற்கு மேல் வட்டி வழங்கப்படாது.
61 வயதுக்குப் பிறகு உங்கள் இ.பி.எஃப் கணக்கிற்கு என்ன நடக்கும்?
58 வயதில் ஓய்வு பெறுபவர்களுக்கு, இந்த 3 ஆண்டு காலம் என்பது தங்களது ஓய்வூதிய சேமிப்பை எங்கு முதலீடு செய்வது அல்லது எப்படிப் பயன்படுத்துவது என்பதைத் தீர்மானிக்க ஒரு அவகாசத்தை வழங்குகிறது. ஆனால், 61 வயதுக்குப் பிறகும் பணத்தை எடுக்காமல் அப்படியே வைத்திருந்தால், அதன் பிறகு வட்டி பலனை இழக்க நேரிடும்.
எனவே, ஓய்வு பெற்றவர்கள் தங்களின் இ.பி.எஃப் கணக்குகளைக் கண்காணித்து, கணக்கு செயல்படாமல் முடங்கும் முன்பாகவே அதற்குரிய தொகையைத் திட்டமிட்டுத் திரும்பப் பெறுவது மிகவும் அவசியமாகும்.
உங்கள் இ.பி.எஃப் பணத்தை எப்போது எடுக்க வேண்டும்?
இ.பி.எஃப் சேமிப்பை எப்போது திரும்பப் பெறுவது என்பது ஒவ்வொருவரின் தனிப்பட்ட நிதித் தேவைகள், ஓய்வூதிய வருமானம் மற்றும் பிற முதலீடுகளைப் பொறுத்தது. சிலருக்கு அன்றாடச் செலவுகளைச் சமாளிக்கப் பணம் தேவைப்படலாம், வேறு சிலருக்கு ஓய்வூதியம் அல்லது இதர சேமிப்பு கைகொடுக்கலாம்.
எப்படியிருப்பினும், பணத்தைத் திரும்பப் பெறுவதை முடிவு இல்லாமல் தள்ளிப்போடக் கூடாது என்பதை இ.பி.எஃப்.ஒ-வின் வழிகாட்டுதல்கள் வலியுறுத்துகின்றன. ஓய்வூதியதாரர்கள் தங்கள் கணக்கின் நிலையைச் சரிபார்த்து, விதிகளின்படி கணக்கு முடங்கும் முன்பாகவே தங்கள் இபிஎஃப் தொகையைத் திரும்பப் பெறத் திட்டமிட வேண்டும்.