சென்னைப் புறநகர் ரயில் போக்குவரத்து வரலாற்றில் புதிய மைல்கல்லாக, சென்னை சென்ட்ரல் – அரக்கோணம் வழித்தடத்தில் முதன்முறையாக ஏசி வசதி கொண்ட (AC EMU) மின்சார ரயில் சேவை இயக்கப்பட்டுள்ளது.
சென்னைப் புறநகர் ரயில்வே நெட்வொர்க்கில் அறிமுகமாகும் இரண்டாவது ஏசி மின்சார ரயில் சேவை இதுவாகும். இதற்கு முன்பு, கடந்த 2025 ஏப்ரல் 19 அன்று சென்னை பீச் – செங்கல்பட்டு பிரிவில் முதல் ஏசி மின்சார ரயில் சேவை தொடங்கப்பட்டது குறிப்பிடத்தக்கது. இந்தப் புறநகர் நெட்வொர்க்கை ரயில்வேயின் தெற்கு மண்டல நிர்வாகம் பராமரித்து இயக்குகிறது.
தெற்கு ரயில்வேயின் தலைமை மக்கள் தொடர்பு அதிகாரி (CPRO) எஸ்.என். நாராயண் இது குறித்துப் பேசுகையில்,
“சென்னை சென்ட்ரல் – அரக்கோணம் பிரிவில் இந்த ஏசி மின்சார ரயில் சேவை அக்டோபர் 23 முதல் வரும் டிசம்பர் 24, 2026 வரை சோதனை அடிப்படையில் இயக்கப்படும். இந்த ரயில்கள் வாரத்தில் திங்கள் முதல் வெள்ளி வரை ஐந்து நாட்கள் மட்டுமே இயங்கும். சனி மற்றும் ஞாயிற்றுக்கிழமைகளில் இந்த சேவை இருக்காது.
சென்னை பீச் – செங்கல்பட்டு ஏசி ரயில் சேவைக்கு மக்களிடையே கிடைத்த நல்ல வரவேற்பைத் தொடர்ந்தே இந்த புதிய சேவை தொடங்கப்பட்டுள்ளது. புறநகர் மக்களுக்கு நவீன, வசதியான மற்றும் நம்பகமான பயண அனுபவத்தை வழங்குவதில் தெற்கு ரயில்வே உறுதியுடன் செயல்பட்டு வருகிறது” என்று தெரிவித்துள்ளார்
சென்னை சென்ட்ரல் – ஆவடி – அரக்கோணம் தடத்தில் மொத்தம் 3 ஜோடி ஏசி மின்சார ரயில்கள் (மொத்தம் 6 சேவைகள்) இயக்கப்படுகின்றன. இதில் சென்னை சென்ட்ரல் – ஆவடி, சென்னை சென்ட்ரல் – அரக்கோணம் மற்றும் ஆவடி – அரக்கோணம் ஆகிய பாதைகளில் தலா ஒரு ஜோடி ரயில்கள் இயங்கும். இதில் 2 சேவைகள் விரைவு ரயில்களாகும்.
ஆவடி – அரக்கோணம் / சென்னை நோக்கி செல்லும் ரயில்கள்:
காலையில் ஆவடியிலிருந்து காலை 6:30 மணிக்குக் புறப்படும் ரயில் (49051) காலை 7:45 மணிக்கு அரக்கோணம் சென்றடையும். சென்னை சென்ட்ரலில் இருந்து காலை 9:40 மணிக்குக் புறப்படும் ரயில் (49053) காலை 10:25 மணிக்கு ஆவடியைச் சென்றடையும். மாலையில் சென்னை சென்ட்ரல் சப்அர்பனில் இருந்து மாலை 6:30 மணிக்குக் புறப்படும் அதிவேக ரயில் (49055) இரவு 7:55 மணிக்கு அரக்கோணம் சென்றடையும்.
சென்னை சென்ட்ரல் நோக்கி திரும்பும் ரயில்கள்:
அரக்கோணத்தில் இருந்து காலை 8:00 மணிக்குக் புறப்படும் அதிவேக ரயில் (49052) காலை 9:30 மணிக்கு சென்னை சென்ட்ரலை வந்தடையும். மாலையில் ஆவடியிலிருந்து மாலை 5:25 மணிக்குக் புறப்படும் ரயில் (49054) மாலை 6:10 மணிக்கு சென்னை சென்ட்ரல் சப்அர்பன் வந்தடையும். இரவு 8:10 மணிக்கு அரக்கோணத்தில் இருந்து புறப்படும் ரயில் (49056) இரவு 9:10 மணிக்கு ஆவடியைச் சென்றடையும்.
மெட்ரோ தரத்திலான நவீன வசதிகள்
சென்னையில் உள்ள ஒருங்கிணைந்த பெட்டி தொழிற்சாலையில் (ICF) தயாரிக்கப்பட்ட இந்த 12 பெட்டிகள் கொண்ட ஏசி மின்சார ரயில், மெட்ரோ ரயில்களுக்கு நிகரான வசதிகளைக் கொண்டுள்ளது. ஒரே நேரத்தில் சுமார் 5,000 பயணிகள் வரை பயணிக்கும் வகையில் அதிகக் கொள்ளளவு கொண்டதாக இது வடிவமைக்கப்பட்டுள்ளது.
ஆட்டோமெடிக் ஸ்லைடிங் கதவுகள், பெட்டிகளுக்கு இடையே பயணிகள் தடையின்றி நடந்து செல்ல சீல் வைக்கப்பட்ட வழித்தடங்கள் (Sealed Gangways), ஸ்டெயின்லெஸ் ஸ்டீல் இருக்கைகள், அகலமான கண்ணாடி ஜன்னல்கள், அழகிய விளக்குகள், ஜிபிஎஸ் அடிப்படையிலான எல்இடி திரை அறிவிப்புகள், சிசிடிவி கேமரா கண்காணிப்பு மற்றும் அவசரகாலத்தில் ஓட்டுனரிடம் பேசும் வசதி ஆகியவை இதில் இடம்பெற்றுள்ளன.
கூடுதலாக, 35 சதவீதம் வரை மின்சாரத்தைச் சேமிக்கும் ஆற்றல் திறன் கொண்ட பிரேக்கிங் சிஸ்டம் மற்றும் மென்மையான, அதிர்வில்லாத பயணத்தை உறுதி செய்யும் ஏர் ஸ்பிரிங் சஸ்பென்ஷன் வசதிகளும் இந்த ரயிலில் அமைக்கப்பட்டுள்ளன.