விவசாயத்தை வாட்டும் எல் நினோ; உர விற்பனை சரிவுக்கு இதுதான் காரணமா?

நாட்டில் தென்மேற்குப் பருவமழை குறைவாகப் பெய்ததும், எல் நினோ தாக்கத்தால் வறண்ட வானிலை நிலவுவதும் விவசாயத்தைப் பாதித்துள்ளதற்கான அறிகுறியாக, கடந்த ஆண்டுடன் ஒப்பிடும்போது நடப்பு நிதியாண்டின் முதல் ஆறு மாதங்களில் யூரியா உள்ளிட்ட அனைத்து வகை உரங்களின் உள்நாட்டு விற்பனையும் குறைந்துள்ளது. ஏப்ரல் முதல் செப்டம்பர் வரையிலான காலகட்டத்தில், நைட்ரஜன், பாஸ்பரஸ், பொட்டாசியம் மற்றும் சல்பர் ஆகிய சத்துகளின் வெவ்வேறு விகிதங்களைக் கொண்ட கலப்பு உரங்களின் விற்பனை 22.2 சதவீதம் சரிந்துள்ளது. பொட்டாசியம் குளோரைடு (MOP) விற்பனை 11.7 சதவீதம் குறைந்துள்ளது. டை-அமோனியம் பாஸ்பேட் (DAP) மற்றும் ஒற்றை சூப்பர் பாஸ்பேட் (SSP) விற்பனையில் முறையே 0.6 சதவீதம், 1.4 சதவீதம் மட்டுமே சரிவு ஏற்பட்டுள்ளது. இந்தக் காலகட்டம், பெரும்பாலும் காரீஃப் எனப்படும் தென்மேற்குப் பருவமழைக் காலப் பயிர்களுக்கான விதைப்புப் பருவத்துடன் ஒத்துப்போகிறது.

குறிப்பாக, விவசாயிகளிடம் யூரியா பயன்பாட்டுக்கான தேவை குறைந்திருப்பது கவனிக்கத்தக்கது. இந்திய உர உற்பத்தியாளர்கள் சங்கத்தின் (FAI) தரவுகளின்படி, ஏப்ரல்-செப்டம்பர் 2026 காலகட்டத்தில் யூரியா உற்பத்தி 4.3 சதவீதமும், இறக்குமதி 40.5 சதவீதமும் அதிகரித்துள்ளன. கடந்த ஆண்டு இதே காலகட்டத்துடன் ஒப்பிடும்போது இந்த உயர்வு பதிவாகியுள்ளது.

இந்த செய்தியை ஆங்கிலத்தில் படிக்க இங்கே க்ளிக் செய்யவும்

உள்நாட்டு யூரியா உற்பத்தியாளர்களுக்குத் தேவையான மூலப்பொருளான இயற்கை எரிவாயு தட்டுப்பாடின்றிக் கிடைப்பதை உறுதிசெய்ய, திரவமாக்கப்பட்ட இயற்கை எரிவாயு (LNG) இறக்குமதியை அதிகரிக்க மத்திய அரசு தொடர்ந்து நடவடிக்கை எடுத்தது. ஈரான் போர் மற்றும் ஹார்முஸ் ஜலசந்தி மூடப்பட்டதால் கத்தார், ஐக்கிய அரபு அமீரகம் ஆகிய நாடுகளிலிருந்து எரிவாயு விநியோகம் குறைந்தது. இதை ஈடுகட்ட, அமெரிக்கா, நைஜீரியா, ஓமன், அங்கோலா, கேமரூன், ஆஸ்திரேலியா, நார்வே ஆகிய நாடுகளிலிருந்து கூடுதல் எரிவாயுவைப் பெற அரசுக்குச் சொந்தமான நிறுவனங்கள் அறிவுறுத்தப்பட்டன. மேலும், வெளிநாடுகளிலிருந்து யூரியாவை நேரடியாக இறக்குமதி செய்வதற்கான சர்வதேச ஒப்பந்தப்புள்ளிகளையும் வெளியிடுமாறு வலியுறுத்தப்பட்டன.

இவ்வாறு யூரியா கிடைப்பது அதிகரித்தபோதிலும், அதன் உள்நாட்டு விற்பனை கடந்த ஆண்டுடன் ஒப்பிடும்போது 4.1 சதவீதம் குறைந்துள்ளது. 2021-22-க்குப் பிறகு யூரியா விற்பனையில் சரிவு ஏற்படுவது இதுவே முதல்முறை. 2025-26 நிதியாண்டில் (ஏப்ரல்-மார்ச்) யூரியா விற்பனை 3.96 கோடி டன்னாகப் பதிவாகி சாதனை படைத்திருந்த நிலையில், தற்போது இந்தச் சரிவு ஏற்பட்டுள்ளது.

“தென் மாநிலங்கள், மகாராஷ்டிராவின் மராத்வாடா மற்றும் விதர்பா பகுதிகள், குஜராத்தின் சௌராஷ்டிரா மற்றும் கட்ச் பகுதிகள், ராஜஸ்தான், தெற்கு பிகார், அசாம் ஆகிய இடங்களில் போதிய மழை பெய்யாததே இதற்கு முக்கியக் காரணம். இதனால் விவசாயிகளிடமிருந்து உரங்களுக்கான தேவை குறைந்துள்ளது. கடந்த ஆண்டு பல விவசாயிகள் 45 கிலோ யூரியா மூட்டையை ரூ.350 முதல் ரூ.450 வரை கொடுத்து வாங்கினர். ஆனால், அதன் அதிகாரபூர்வ அதிகபட்ச சில்லறை விலை (MRP) ரூ.266.50 மட்டுமே. இந்த ஆண்டு கள்ளச்சந்தை விலைகூட ரூ.300-க்குள் உள்ளது. உரங்களுக்கு நேரடித் தட்டுப்பாடு இல்லாததாலும், அவற்றை முன்கூட்டியே வாங்கிச் சேமிக்க வேண்டிய அவசியம் விவசாயிகளுக்கு அதிகம் இல்லாததாலும் இந்த நிலை ஏற்பட்டுள்ளது” என்று தொழில்துறை வட்டாரத்தைச் சேர்ந்த ஒருவர் தி இந்தியன் எக்ஸ்பிரஸ் நாளிதழிடம் தெரிவித்தார்.

ஜூன் முதல் செப்டம்பர் வரையிலான தென்மேற்குப் பருவமழைக் காலத்தில், நாடு முழுவதும் பெய்த மழையின் அளவு நீண்டகால சராசரியைவிட 12.6 சதவீதம் குறைவாக இருந்தது. அக்டோபர் மாதத்திலும் இதுவரை மழைப் பற்றாக்குறை 51.8 சதவீதமாகப் பதிவாகியுள்ளது.

உலகின் பெரும்பாலான வானிலை ஆய்வு அமைப்புகள், தற்போது நிலவும் எல் நினோ நிகழ்வு 2027 ஜனவரி முதல் மார்ச் வரையிலான காலம் வரை வலுவானது முதல் மிக வலுவானது வரையிலான நிலையில் நீடிக்கும் என்றும், ஏப்ரல்-மே மாதங்களில் மிதமானது முதல் பலவீனமான நிலைக்கு மாறும் என்றும் கணித்துள்ளன. எல் நினோவால் குளிர்காலத்தில் வழக்கத்தைவிடக் குறைவான மழைப்பொழிவும் அதிக வெப்பநிலையும் நிலவக்கூடும். இதன் காரணமாக, அடுத்த ரபி பருவத்தில் (குளிர்காலம் மற்றும் வசந்த காலப் பயிர்கள்) விதைப்புப் பணிகளும் உரங்களுக்கான தேவையும் பாதிக்கப்பட வாய்ப்புள்ளது.

“தற்போது மத்திய அரசின் கவனம் யூரியா மற்றும் டிஏபி உரங்கள் மீதுதான் உள்ளது. இந்த இரு உரங்களுக்கும் தட்டுப்பாடு ஏற்படுவதை அரசு விரும்பவில்லை. குறிப்பாக, பிப்ரவரி-மார்ச் மாதங்களில் சட்டப்பேரவைத் தேர்தலை எதிர்கொள்ளவுள்ள உத்தரப் பிரதேசம், பஞ்சாப் மாநிலங்களில் இவை அரசியல் ரீதியாக அதிக முக்கியத்துவம் வாய்ந்தவை” என்று அந்தத் தொழில்துறை வட்டாரம் தெரிவித்தது.

டிஏபி உரத்தைப் பொறுத்தவரை, அதன் விநியோக நிலை திருப்திகரமாக உள்ளது. 50 கிலோ மூட்டை சுமார் ரூ.1,350 என்ற அரசின் கட்டுப்படுத்தப்பட்ட அதிகபட்ச சில்லறை விலையில் அல்லது அதைவிடச் சற்றே அதிக விலையில் விற்பனை நடைபெறுகிறது.

இருப்பினும், இந்த விலை நிலவரம் கலப்பு உரங்களின் விற்பனையைப் பாதிக்கிறது. ‘20:20:0:13’ வகை கலப்பு உரத்தின் 50 கிலோ மூட்டை சுமார் ரூ.2,100-க்கும், ‘12:32:16’, ‘10:26:26’ ஆகிய NPKS வகை உரங்களின் மூட்டைகள் சுமார் ரூ.2,400-க்கும் விற்பனை செய்யப்படுகின்றன.

“கலப்பு உரங்களின் விற்பனை, தேவை மற்றும் விநியோகம் ஆகிய இரு தரப்பிலிருந்தும் பாதிப்பைச் சந்திக்கிறது. ஒருபுறம் வறட்சி நிலவுகிறது. மறுபுறம், பாஸ்பரஸ் 46 சதவீதமும் நைட்ரஜன் 18 சதவீதமும் கொண்ட டிஏபி உரத்துக்கு அரசு செயற்கையாகக் குறைந்த விலையை நிர்ணயித்துள்ளது. இதனால் கலப்பு உரங்களுக்கான தேவை பாதிக்கப்படுகிறது. அதே நேரத்தில், சல்பருக்குக் கடுமையான தட்டுப்பாடு நிலவுகிறது. சல்பர் இல்லாமல் பாஸ்பரஸ் கொண்ட கலப்பு உரங்களையோ, எஸ்எஸ்பி உரத்தையோ உற்பத்தி செய்ய முடியாது” என்று அந்தத் தொழில்துறை வட்டாரம் தெரிவித்தது.

இந்திய உர உற்பத்தியாளர்கள் சங்கத்தின் தரவுகளின்படி, ஏப்ரல்-செப்டம்பர் 2026 காலகட்டத்தில் கலப்பு உரங்களின் உள்நாட்டு உற்பத்தி 35.5 சதவீதமும், எஸ்எஸ்பி உர உற்பத்தி 10.4 சதவீதமும் சரிந்துள்ளன. இதற்கு முக்கியக் காரணமாக சல்பர் இறக்குமதி விலை கடுமையாக உயர்ந்திருப்பது குறிப்பிடப்படுகிறது. கடந்த ஆண்டு ஒரு டன் சல்பர் 300 முதல் 400 அமெரிக்க டாலர் வரை விற்பனையான நிலையில், தற்போது அதன் விலை 1,000 முதல் 1,100 டாலராக உயர்ந்துள்ளது.

எண்ணெய் சுத்திகரிப்பு மற்றும் இயற்கை எரிவாயு பதப்படுத்தும் செயல்முறைகளில் சல்பர் துணைப் பொருளாகக் கிடைக்கிறது. போர் தொடங்குவதற்கு முன்பு, இந்தியா பெரும்பாலும் சவுதி அராம்கோ, கத்தார் எனர்ஜி, அபுதாபி தேசிய எண்ணெய் நிறுவனம் (ADNOC) ஆகியவற்றிடமிருந்து சல்பரை இறக்குமதி செய்து வந்தது. ஈரானின் ஏவுகணை மற்றும் ட்ரோன் தாக்குதல்களால் இந்த நிறுவனங்களின் சில உற்பத்தி வசதிகள் சேதமடைந்துள்ளன. விவசாயத் துறையில் ஏற்பட்டுள்ள இந்தச் சரிவு உரங்களுடன் மட்டும் நின்றுவிடவில்லை.

கடந்த ஆண்டு செப்டம்பரில் 1,46,180 ஆக இருந்த டிராக்டர்களின் உள்நாட்டு விற்பனை, இந்த ஆண்டு செப்டம்பரில் 18.1 சதவீதம் குறைந்து 1,19,667 ஆக உள்ளது. 2025-26 நிதியாண்டில் டிராக்டர் விற்பனை 11.60 லட்சம் அலகுகளாக உயர்ந்து வரலாற்றுச் சாதனை படைத்தது. நடப்பு நிதியாண்டின் முதல் ஆறு மாதங்களிலும், அதாவது ஏப்ரல்-செப்டம்பர் 2026 காலகட்டத்தில், முந்தைய ஆண்டின் இதே காலத்துடன் ஒப்பிடும்போது ஒட்டுமொத்த விற்பனை 8 சதவீதம் அதிகரித்திருந்தது.

இருப்பினும், செப்டம்பர் மாத விற்பனைச் சரிவுக்கு வறட்சியை மட்டுமே காரணமாகக் கூற முடியாது என்று முன்னணி டிராக்டர் மற்றும் விவசாய உபகரண நிறுவனத்தின் நிர்வாகி ஒருவர் தெரிவித்தார். பண்டிகைக் கால அட்டவணையில் ஏற்பட்ட மாற்றமும், முந்தைய ஆண்டின் உயர்ந்த விற்பனை அடிப்படையும் இதற்குக் காரணமாக இருக்கலாம் என்று அவர் கூறினார்.

“கடந்த ஆண்டு ஆகஸ்ட் 9-ம் தேதி ரக்ஷா பந்தன் வந்ததால் பண்டிகைக் காலம் முன்கூட்டியே தொடங்கியது. நவராத்திரி, தசரா ஆகிய பண்டிகைகளும் அக்டோபர் 2-ம் தேதிக்குள் முடிந்துவிட்டன. ஆனால், இந்த ஆண்டு ரக்ஷா பந்தன் ஆகஸ்ட் 28-ம் தேதியும், தசரா அக்டோபர் 20-ம் தேதியும் வந்தன. மேலும், டிராக்டர்களுக்கான ஜிஎஸ்டி வரி 12 சதவீதத்திலிருந்து 5 சதவீதமாகக் குறைக்கப்பட்டது கடந்த ஆண்டு செப்டம்பரில்தான் அமலுக்கு வந்தது. இந்த இரு காரணங்களால் கடந்த ஆண்டு செப்டம்பரில் டிராக்டர் நிறுவனங்களின் மொத்த விநியோகம் ஆண்டுக்கு ஆண்டு 45.4 சதவீதம் அதிகரித்தது” என்று அவர் தெரிவித்தார்.

இருப்பினும், வறட்சி தொடர்ந்து கவலை அளிப்பதாகக் குறிப்பிட்ட அந்த நிர்வாகி, “நடப்பு நிதியாண்டின் எஞ்சிய மாதங்களில் எங்கள் விற்பனை எந்த அளவுக்குப் பாதிக்கப்படும் என்பதைப் பொறுத்திருந்துதான் பார்க்க வேண்டும்” என்றார்.