தமிழ்நாட்டிலிருந்து பிற மாநிலங்களுக்குக் கற்கள், ஜல்லி கொண்டு செல்ல விதிக்கப்பட்ட தற்காலிகத் தடையை மேலும் 3 மாதங்களுக்கு நீட்டித்து புவியியல் மற்றும் சுரங்கத்துறை இயக்குனர் உத்தரவிட்டுள்ளார்
தமிழ்நாட்டில் இருந்து அண்டை மாநிலங்களுக்குக் கற்கள் (Rough Stone) மற்றும் ஜல்லி உள்ளிட்ட கட்டுமானக் கனிமப் பொருட்களை (Aggregates) ஏற்றிச் செல்வதற்கான தற்காலிகத் தடையை மேலும் மூன்று மாதங்களுக்கு நீட்டித்து மாநில அரசு அதிரடி உத்தரவு பிறப்பித்துள்ளது. புவியியல் மற்றும் சுரங்கத்துறை இயக்குனர் டாக்டர் த. பிரபுசங்கர், இ.ஆ.ப., இதற்கான விரிவான செயல்முறை ஆணைகளை வெளியிட்டுள்ளார்.
பின்னணியும் விதிகளும்
முன்னதாக, ‘தமிழ்நாடு சட்டவிரோத சுரங்கத் தொழில், கனிமங்கள் போக்குவரத்து மற்றும் சேமிப்புத் தடுப்பு மற்றும் கனிம விற்பனையாளர்கள் விதிகள் 2011’-ன் விதி 3(A)-ன்கீழ் வழங்கப்பட்ட அதிகாரங்களின்படி, கடந்த ஜூலை 27, 2026 அன்று இந்தத் தடை முதன்முதலில் விதிக்கப்பட்டது. இந்தத் தடையின் முக்கிய நோக்கங்களாக மூன்று காரணங்கள் முன்வைக்கப்படுகின்றன: மாநிலத்திற்குள் தங்கு தடையின்றி கனிமங்கள் கிடைப்பதை உறுதி செய்தல். சுற்றுச்சூழல் மற்றும் இயற்கை சமநிலையைப் பாதுகாத்தல். சட்டவிரோத சுரங்கத் தொழில் மற்றும் கனிமக் கடத்தலை முற்றிலுமாகத் தடுத்தல்.
நீட்டிப்புக்கான காரணம்
அரசாணை எண் 15 (இயற்கை வளங்கள் துறை, நாள் 09.07.2026)-ன் தொடர்ச்சியாக விதிக்கப்பட்ட இந்தத் தடை, அக்டோபர் 26, 2026 அன்றுடன் முடிவடைய இருந்தது. எனினும், இந்தத் தடைக்காலத்தில் கனிமக் கடத்தலைத் தடுப்பதற்கான நோக்கங்கள் இன்னும் முழுமையாக எட்டப்படவில்லை என்று புவியியல் மற்றும் சுரங்கத்துறை நடத்திய ஆய்வில் தெரியவந்துள்ளது. இதன் காரணமாகவே, மாநில நலன் கருதி அக்டோபர் 27, 2026 முதல் மேலும் மூன்று மாதங்களுக்கு இந்தத் தடையை நீட்டிப்பது அவசியமாகியுள்ளது என்று இயக்குனர் தனது உத்தரவில் குறிப்பிட்டுள்ளார்.
விலக்கு மற்றும் எல்லைகள்
இந்தத் தடையிலிருந்து புதுச்சேரி யூனியன் பிரதேசத்திற்கு மட்டும் பிரத்யேக விலக்கு அளிக்கப்பட்டுள்ளது. புதுச்சேரி மற்றும் காரைக்கால் மாவட்டங்களின் உள்நாட்டுத் தேவைகளுக்கான போக்குவரத்து அனுமதிக்கப்படும். ஆனால், கேரளா, கர்நாடகா, ஆந்திரா உள்ளிட்ட பிற அண்டை மாநிலங்களுக்குக் கனிமப் பொருட்களைக் கொண்டு செல்ல முற்றிலும் தடை விதிக்கப்பட்டுள்ளது.
எல்லையோரங்களில் தீவிரக் கண்காணிப்பு
இந்த உத்தரவை மிகத் தீவிரமாகச் நடைமுறைப்படுத்த அரசு இயந்திரம் முடுக்கிவிடப்பட்டுள்ளது. அண்டை மாநிலங்களுடன் எல்லைகளைப் பகிர்ந்து கொள்ளும் மாவட்டங்களின் ஆட்சியர்கள் (District Collectors) மற்றும் காவல் கண்காணிப்பாளர்கள் (SP) எல்லையோரச் சோதனைச் சாவடிகளில் 24 மணி நேரமும் தீவிரக் கண்காணிப்பில் ஈடுபட வேண்டும் என்று அறிவுறுத்தப்பட்டுள்ளனர். சம்பந்தப்பட்ட துறை அதிகாரிகள் கனிமப் போக்குவரத்துகளைத் தணிக்கை செய்து, விதிமீறல்களில் ஈடுபடும் நபர்கள் மற்றும் நிறுவனங்கள் மீது சட்டப்படி கடுமையான கிரிமினல் மற்றும் நிர்வாக நடவடிக்கைகள் எடுக்க உத்தரவிடப்பட்டுள்ளது.
இந்த உத்தரவின் நகல்கள் தகுந்த நடவடிக்கைக்காகக் கூடுதல் தலைமைச் செயலாளர், தலைமைச் செயலாளர் மற்றும் இயற்கை வளங்கள் துறை முதன்மைச் செயலாளர் ஆகிய உயர் அதிகாரிகளுக்குச் சமர்ப்பிக்கப்பட்டுள்ளன.