டெல்லி: இந்தியாவில் வாக்காளர் பட்டியலைச் சீரமைக்கும் சிறப்பு தீவிர திருத்தப் பணி தொடர்பாக எழுந்த சர்ச்சைகளுக்கு இந்திய தேர்தல் ஆணையம் உச்ச நீதிமன்றத்தில் விரிவான பதில் மனுவைத் தாக்கல் செய்துள்ளது. தலைமைத் தேர்தல் ஆணையர் ஞானேஷ் குமார் தன்னிச்சையாக முடிவெடுத்ததாகக் கூறப்பட்ட குற்றச்சாட்டுகளை தேர்தல் ஆணையம் திட்டவட்டமாக மறுத்துள்ளது.
இந்திய தேர்தல் ஆணையத்தில் உள்ள மற்ற இரண்டு ஆணையர்களின் எதிர்ப்பையும் மீறி, தலைமைத் தேர்தல் ஆணையர் ஞானேஷ் குமார் 14 முக்கிய முடிவுகளைத் தன்னிச்சையாக எடுத்ததாக நாளிதழ் ஒன்றில் செய்தி வெளியானது. இதன் அடிப்படையில் வழக்கறிஞர் ராகேஷ் குமார் சிங் என்பவர் உச்ச நீதிமன்றத்தில் பொதுநல மனு ஒன்றைத் தாக்கல் செய்தார். அதில் தலைமைத் தேர்தல் ஆணையரின் செயல்பாடுகள் குறித்து கேள்வி எழுப்பப்பட்டதுடன், அவர் மீது நடவடிக்கை எடுக்கக் கோரப்பட்டது.
தேர்தல் ஆணையத்தின் பதில்: “அனைத்து முடிவுகளும் ஒருமனதாக எடுக்கப்பட்டவை”
துணை தேர்தல் ஆணையர் பானு பிரகாஷ் எடுரு தாக்கல் செய்துள்ள பதில் மனுவில், இந்த குற்றச்சாட்டுகள் அனைத்தும் ஆதாரமற்றவை என்று தெரிவிக்கப்பட்டுள்ளது.
வாக்காளர் பட்டியல் திருத்தம் தொடர்பாக 2025 ஜூன் 24, 2025 அக்டோபர் 27 மற்றும் 2026 மே 14 ஆகிய தேதிகளில் வெளியிடப்பட்ட மூன்று முக்கிய உத்தரவுகளும் ஆணையத்தின் அனைத்து உறுப்பினர்களாலும் ஒருமனதாக எடுக்கப்பட்ட முடிவுகளே ஆகும் என்று விளக்கப்பட்டுள்ளது. தலைமைத் தேர்தல் ஆணையர் மற்றும் மற்ற இரண்டு ஆணையர்களான சுக்பீர் சிங் சாந்து, விவேக் ஜோஷி ஆகிய மூவரின் முழு ஒப்புதலுடனேயே இந்த பதில் மனு நீதிமன்றத்தில் தாக்கல் செய்யப்பட்டுள்ளது.
ஒரு கோப்பு பரிசீலனையில் இருக்கும்போது, ஆணையர்கள் எழுதும் கருத்துகள், கேள்விகள் அல்லது ஆலோசனைகள் வெறும் உள் விவாதங்களே தவிர, அவை தேர்தல் ஆணையத்தின் இறுதி முடிவு ஆகாது என்று மனுவில் குறிப்பிடப்பட்டுள்ளது. சட்டம் மற்றும் நடைமுறைப்படி ஒரு கோப்பு முதலில் ஒரு தேர்தல் ஆணையருக்கும், பின்னர் மற்றொரு தேர்தல் ஆணையருக்கும் சென்று, இறுதியாகவே தலைமைத் தேர்தல் ஆணையரின் ஒப்புதலுக்கு வரும். எனவே கருத்து வேறுபாடுகள் இருந்தாலும், விவாதங்களுக்குப் பின்னரே சட்டப்படி முடிவுகள் இறுதி செய்யப்படுகின்றன.
புதிய வாக்காளர் சேர்க்கைக்கான படிவம் 6-ல் ஆணையம் எந்த மாற்றமும் செய்யவில்லை. தேர்தல் விதிகளின்படி இந்தப் படிவத்தை மாற்றும் அதிகாரம் மத்திய அரசுக்கு மட்டுமே உண்டு.
பழைய வாக்காளர் பட்டியலுடன் தற்போதைய தகவல்களை ஒப்பிட்டு சரிபார்க்கவே கூடுதல் உறுதிமொழி ஆவணம் பெறப்பட்டது. ஆன்லைனில் விண்ணப்பிக்கும் போது ஏற்பட்ட தொழில்நுட்பக் குழப்பத்தால் படிவம் மாற்றப்பட்டது போன்ற தோற்றம் உருவானது. இதைச் சரிசெய்யும் வகையில், 2026 அக்டோபர் 21 முதல் ஆன்லைன் விண்ணப்பத்தில் படிவம் 6 மற்றும் கூடுதல் உறுதிமொழி ஆவணம் ஆகிய இரண்டும் தனித்தனிப் பிரிவுகளாகப் பிரிக்கப்பட்டு நடைமுறைப்படுத்தப்பட்டுள்ளது.
பழைய பட்டியலுடன் பெயர் பொருந்தாத வாக்காளர்கள் நேரில் சென்று விசாரணைக்கு ஆஜராக வேண்டிய அவசியமில்லை என்று தேர்தல் ஆணையம் தெளிவுபடுத்தியுள்ளது.
வாக்குச்சாவடி நிலை அலுவலர்களே நேரடியாக வாக்காளர்களின் வீட்டிற்கே சென்று உரிய ஆவணங்களைச் சேகரிப்பார்கள். மிகக் குறிப்பிட்ட காரணங்களுக்கு மட்டுமே விசாரணை நடத்தப்படும், அதுவும் ஆன்லைன் மூலமாகவே முன்னுரிமை கொடுத்து நடத்தப்படும்.
வாக்காளர் பட்டியலில் பெயரைச் சேர்க்கவோ அல்லது நீக்கவோ சம்பந்தப்பட்ட தேர்தல் பதிவு அதிகாரியின் உத்தரவு இல்லாமல் யாருக்கும் அனுமதி கிடையாது. இந்த அமைப்பின் நம்பகத்தன்மையை உறுதி செய்ய சென்னை ஐஐடி (IIT Madras) மற்றும் பெங்களூரு இந்திய அறிவியல் கழக நிபுணர்கள் அடங்கிய உயர்மட்டக் குழு அமைக்கப்பட்டுள்ளது.
அரசியலமைப்புச் சட்டம் 324(5)-ன் படி, தலைமைத் தேர்தல் ஆணையரை உச்ச நீதிமன்ற நீதிபதியை நீக்கும் நடைமுறையின் மூலமாகவே பதவி நீக்கம் செய்ய முடியும்; எனவே வெறும் பத்திரிகைச் செய்தியை அடிப்படையாகக் கொண்டு தொடுக்கப்பட்ட இந்த மனு விசாரணைக்கு உகந்தது அல்ல என்றும் தேர்தல் ஆணையம் திட்டவட்டமாகத் தெரிவித்துள்ளது. தலைமை நீதிபதி சூர்யா காந்த் தலைமையிலான அமர்வு இவ்வழக்கை விசாரிக்கிறது.