சென்னை சர்வதேச விமான நிலையத்தின் செயல்பாடு, நிர்வாகம் மற்றும் எதிர்கால வளர்ச்சிப் பணிகளைத் தனியார் நிறுவனங்களிடம் ஒப்படைக்க வேண்டும் என்ற தமிழக முதலமைச்சர் சி. ஜோசப் விஜய்யின் கோரிக்கை குறித்து இந்திய விமான நிலையங்கள் ஆணையத்தின் (AAI) கருத்துக்காக மத்திய அரசு காத்திருக்கிறது. தகவல் அறியும் உரிமைச் சட்டத்தின் (RTI) கீழ் கேட்கப்பட்ட கேள்விக்கு மத்திய விமானப் போக்குவரத்து அமைச்சகம் அளித்துள்ள பதிலில் இந்த விவரம் தெரிவிக்கப்பட்டுள்ளது. கடந்த ஆகஸ்ட் 5ஆம் தேதி, சென்னை விமான நிலையத்தின் நிர்வாகம் மற்றும் மேம்பாட்டுப் பணிகளைத் தனியார் நிறுவனத்திடம் ஒப்படைப்பது தொடர்பாக பிரதமர் நரேந்திர மோடிக்குத் தமிழக முதலமைச்சர் கடிதம் எழுதியிருந்தார். பிரதமர் அலுவலகம் அந்தக் கடிதத்தைப் பரிசீலனைக்காக மத்திய விமானப் போக்குவரத்து அமைச்சகத்துக்கு அனுப்பியிருந்தது.
இதுகுறித்து அமைச்சகம் அளித்துள்ள பதிலில், “இந்த விவகாரம் தற்போது அமைச்சகத்தின் பரிசீலனையில் உள்ளது. இந்திய விமான நிலையங்கள் ஆணையத்தின் கருத்துகள் கோரப்பட்டுள்ளன. அவை இன்னும் கிடைக்கவில்லை. கருத்துகள் கிடைத்த பிறகு அடுத்தகட்ட நடவடிக்கைகள் மேற்கொள்ளப்படும்” என்று தெரிவிக்கப்பட்டுள்ளது. இதன் மூலம் தமிழக அரசின் கோரிக்கை மத்திய அரசின் பரிசீலனையில் இருப்பது உறுதியாகியுள்ளது. இருப்பினும், இந்தக் கோரிக்கையை மத்திய அரசு ஏற்குமா, இறுதி முடிவு எப்போது எடுக்கப்படும் என்பது குறித்து இதுவரை எந்த அறிவிப்பும் வெளியாகவில்லை.
சென்னை விமான நிலையத்தில் பயணிகளின் எண்ணிக்கை, விமானங்களின் இயக்கம் மற்றும் சரக்குகளைக் கையாளும் திறன் ஆகியவை தொடர்ந்து முக்கியத்துவம் பெற்று வரும் நிலையில், விமான நிலையத்தின் உள்கட்டமைப்பை மேம்படுத்த வேண்டியதன் அவசியத்தை முதலமைச்சர் தனது கடிதத்தில் சுட்டிக்காட்டியிருந்தார். தமிழகத்தின் தொழில் வளர்ச்சி, முதலீடுகளை ஈர்த்தல் மற்றும் சர்வதேசப் போக்குவரத்துத் தேவைகளைப் பூர்த்தி செய்தல் ஆகியவற்றுக்கு நவீன விமான நிலைய வசதிகள் அவசியம் என்றும் அவர் வலியுறுத்தியிருந்தார். இதற்கிடையில், விவசாயிகள் மற்றும் உள்ளூர் மக்களின் எதிர்ப்புகள் காரணமாக பரந்தூரில் புதிய பசுமைவெளி விமான நிலையம் அமைக்கும் திட்டத்தைத் தமிழக அரசு ஆகஸ்ட் மாதம் கைவிட்டது.
இதையடுத்து, இரண்டாவது விமான நிலையத்துக்கான மாற்று இடங்களைத் தேடுவதுடன், தற்போதுள்ள சென்னை விமான நிலையத்தை விரிவுபடுத்துவதற்கான வழிகளையும் அரசு ஆராய்ந்து வருகிறது. சென்னை விமான நிலையத்தைத் தனியார் நிறுவனங்களிடம் ஒப்படைக்கும் யோசனைக்கு திமுக மற்றும் இடதுசாரிக் கட்சிகள் எதிர்ப்புத் தெரிவித்துள்ளன. இது பொதுத்துறை நிறுவனங்களைத் தனியார்மயமாக்கும் முயற்சி என அவை விமர்சிக்கின்றன. அதேவேளையில், தமிழக சட்டத்துறை அமைச்சர் ஆர். நிர்மல்குமார், பொதுத்துறை நிறுவனங்களைத் தனியார்மயமாக்குவது அரசின் நோக்கமல்ல என்றும், பராமரிப்புப் பணிகளில் தனியார் நிறுவனங்களின் பங்களிப்பைப் பெறுவதே நோக்கம் என்றும் தெரிவித்துள்ளார். இந்நிலையில், இந்திய விமான நிலையங்கள் ஆணையத்தின் கருத்துகள் கிடைத்த பிறகே இந்த விவகாரத்தில் அடுத்தகட்ட நடவடிக்கை என்ன என்பது தெரியவரும்.