வளர்ச்சியடைந்த இந்தியா – ஊரக வாழ்வாதார (VB-G RAM G) இயக்கத்தின் கீழ் வேலைவாய்ப்பு உருவாக்கம் குறித்த விவரங்களை மத்திய அரசு வெளியிட்டுள்ளது. மத்திய ஊரக வளர்ச்சி அமைச்சகம் வெளியிட்டுள்ள செய்திக்குறிப்பின்படி, கடந்த 5 நிதி ஆண்டுகளில் மகாத்மா காந்தி தேசிய ஊரக வேலைவாய்ப்பு உறுதித் திட்டத்தின் ( Mahatma Gandhi NREGS ) கீழ் மாநிலங்கள் மற்றும் யூனியன் பிரதேசங்களில் உருவாக்கப்பட்ட வேலை நாட்கள் குறித்த விவரங்கள் நாடாளுமன்றத்தில் சமர்ப்பிக்கப்பட்டுள்ளன. இத்திட்டத்தின் கீழ், வேலை கோரிய அனைத்து ஊரகக் குடும்பங்களுக்கும் விதிகளின்படி வேலைவாய்ப்பு வழங்கப்பட்டு வந்துள்ளது.
மாநிலங்கள் மற்றும் யூனியன் பிரதேசங்களின் தேவையைப் பொறுத்து ஒவ்வொரு நிதி ஆண்டிலும் உருவாக்கப்பட்ட வேலை நாட்களின் எண்ணிக்கையில் மாற்றங்கள் ஏற்பட்டுள்ளன. மத்திய அரசு மாநிலங்கள் மற்றும் யூனியன் பிரதேசங்களுடன் இணைந்து இத்திட்டத்தின் செயல்பாடுகளைத் தொடர்ந்து ஆய்வு செய்து வருகிறது. மேலும், அமலாக்கம் தொடர்பான சிக்கல்களைத் தீர்க்க உரிய நடவடிக்கைகளும் எடுக்கப்பட்டு வருகின்றன. பயனாளிகளுக்கு ஊதியம் தாமதமின்றி வழங்குவதை உறுதி செய்வதற்காக, தேசிய மின்னணு நிதி மேலாண்மை அமைப்பு (NeFMS) மற்றும் நேரடிப் பயனாளி பரிமாற்றம் (DBT) முறைகள் நடைமுறைப்படுத்தப்பட்டுள்ளன.
இதன் மூலம் ஊதியம் நேரடியாகப் பயனாளிகளின் வங்கிக் கணக்குகளில் வரவு வைக்கப்படுகிறது. இதற்கிடையே, கடந்த 2025ஆம் ஆண்டு இயற்றப்பட்ட ‘வளர்ச்சியடைந்த இந்தியா – ஊரக வாழ்வாதார இயக்க (VB-G RAM G) சட்டம்’ நாடு முழுவதும் உள்ள அனைத்து ஊரகப் பகுதிகளிலும் கடந்த ஜூலை 1 முதல் நடைமுறைக்கு வந்துள்ளது. இச்சட்டம் ஒரு நிதி ஆண்டில் ஊரகக் குடும்பம் ஒன்றுக்கான சட்டப்பூர்வ வேலைவாய்ப்பு உத்தரவாதத்தை 100 நாட்களில் இருந்து 125 நாட்களாக உயர்த்தி, ஊரக வேலைவாய்ப்பு கட்டமைப்பை மேலும் வலுப்படுத்துகிறது.
இத்திட்டத்தைச் சிறப்பாகச் செயல்படுத்துவதற்காக மத்திய அரசு போதுமான பட்ஜெட் ஒதுக்கீட்டைச் செய்துள்ளது. நடப்பு 2026-27 நிதி ஆண்டில் இத்திட்டத்திற்காக மத்திய அரசின் பங்காக ரூ. 95,692.31 கோடி வழங்கப்பட்டுள்ளது. இது ஊரக வேலைவாய்ப்பு வரலாற்றில் இதுவரை இல்லாத மிக அதிகபட்ச பட்ஜெட் மதிப்பீடாகும். மாநிலங்களின் மதிப்பிடப்பட்ட பங்களிப்பையும் சேர்த்து இத்திட்டத்தின் ஒட்டுமொத்த செலவு ரூ. 1.51 லட்சம் கோடியைத் தாண்டும் என்று எதிர்பார்க்கப்படுகிறது.
ஊதியப் பணிகளைத் தடையின்றி கண்காணிக்கவும், நிலுவையில் உள்ள கட்டணங்களை உடனுக்குடன் தீர்க்கவும் தொழில்நுட்ப அடிப்படையிலான மேலாண்மை தகவல் அமைப்புகள் (MIS) பயன்படுத்தப்படுகின்றன. மேலும், திறன் மேம்பாட்டு மையங்கள், ஊரக நூலகங்கள் மற்றும் டிஜிட்டல் கற்றல் மையங்கள் போன்ற கிராமப்புற உள்கட்டமைப்பு வசதிகளை உருவாக்குவதற்கு இச்சட்டம் உயிரியல் மற்றும் வாழ்வாதாரம் சார்ந்த முக்கியப் பகுதிகளில் அதிக முன்னுரிமை அளிக்கிறது.
இத்திட்டத்தின் கீழ் 2026 ஜூலை 16 நிலவரப்படி, நாடு முழுவதும் உள்ள மாநிலங்கள் மற்றும் யூனியன் பிரதேசங்களுக்கு மொத்தம் ரூ. 93,841.69 கோடி இடைக்கால நிதியாக ஒதுக்கீடு செய்யப்பட்டுள்ளது. இதில் முதற்கட்டமாக ரூ. 25,495.32 கோடி நிதி விடுவிக்கப்பட்டுள்ளது. மேலும், சமூகத் தணிக்கை மற்றும் மத்திய நிர்வாகச் செலவினங்களுக்காக ஒதுக்கப்பட்ட ரூ. 1,850.62 கோடியையும் சேர்த்து, நடப்பு 2026-27 நிதியாண்டில் இதுவரை இத்திட்டத்திற்காக மொத்தம் ரூ. 95,692.31 கோடி நிதி ஒதுக்கப்பட்டுள்ளது.
குறிப்பாக, தமிழகத்திற்கு இடைக்கால ஒதுக்கீடாக மொத்தம் ரூ. 7,585.49 கோடி நிதியை மத்திய அரசு ஒதுக்கியுள்ளது. இதில் முதற்கட்டமாக ரூ. 2,176.84 கோடி நிதி விடுவிப்பதற்கான முதன்மை ஒப்புதல் வழங்கப்பட்டுள்ளது. அதேபோல, புதுச்சேரி யூனியன் பிரதேசத்திற்கு ரூ. 40.56 கோடி இடைக்கால நிதி ஒதுக்கப்பட்டதில், முதற்கட்டமாக ரூ. 12.88 கோடி நிதி விடுவிக்கப்பட்டுள்ளது. இது தவிர, கடந்த ஐந்து நிதியாண்டுகளில் (2021-22 முதல் 2025-26 வரை) மகாத்மா காந்தி தேசிய ஊரக வேலைவாய்ப்பு உறுதித் திட்டத்தின் கீழ் மாநிலங்கள் வாரியாக விடுவிக்கப்பட்ட நிதி, வேலைவாய்ப்பு பெற்றவர்களின் எண்ணிக்கை மற்றும் உருவாக்கப்பட்ட வேலை நாட்கள் (Person-days) குறித்த விரிவான இணைப்புகளையும் மத்திய அரசு நாடாளுமன்றத்தில் சமர்ப்பித்துள்ளது.