சென்னை: ‘ஆயுஷ்’ படிப்புகளுக்கு ஆன்லைனில் விண்ணப்பிக்க நாளை மறுநாள் கடைசி நாள் ஆகும். சித்தா, ஆயுர்வேத, யுனானி, ஓமியோபதி (பிஎஸ்எம்எஸ், பிஏஎம்எஸ், பியுஎம்எஸ், பிஎச்எம்எஸ்) பட்டப்படிப்புகளுக்கு 2026-27-ம் கல்வி ஆண்டு மாணவர் சேர்க்கை விண்ணப்பம் கடந்த 13-ம் தேதி www.tnayushselection.org என்ற சுகாதாரத்துறை இணையதளத்தில் தொடங்கியது.
நீட் தேர்வு மதிப்பெண் அடிப்படையில் மாணவர் சேர்க்கை நடைபெறும் இந்த 4 படிப்புகளுக்கும் அரசு பள்ளி மாணவர்களுக்கு 7.5 சதவீத உள் இடஒதுக்கீடு வழங்கப்படுகிறது. இதுவரை 6 ஆயிரத்துக்கும் மேற்பட்டோர் விண்ணப்பித்துள்ளனர். ஆன்லைன் விண்ணப்பம் ஜூலை 31-ம் தேதி மாலை 5 மணியுடன் நிறைவடைகிறது.
அதேபோல், இளநிலை யோகா மற்றும் இயற்கை மருத்துவ பட்டப்படிப்புக்கு (பிஎன்ஒய்எஸ்) 2026-27-ம் கல்வி ஆண்டு மாணவர் சேர்க்கைக்கு www.tnayushselection.org என்ற இணையதளத்தில் விண்ணப்பிப்பது கடந்த 13-ம் தேதி தொடங்கியது.
இதற்கு பிளஸ் 2 மதிப்பெண் அடிப்படையில் மாணவர் சேர்க்கை நடைபெறும். இந்த படிப்புக்கு இதுவரை 2,500 பேர் விண்ணப்பித்துள்ளனர். இதற்கும் 31-ம் தேதி மாலை 5 மணியுடன் விண்ணப்பம் நிறைவடைகிறது. இந்த படிப்புக்கு அரசு பள்ளி மாணவர்களுக்கான 7.5 சதவீத உள் இடஒதுக்கீடு கிடையாது.