இந்திய ரிசர்வ் வங்கி (RBI), ரூ.10 மற்றும் ரூ.20 மதிப்புகளிலான பிளாஸ்டிக் (பாலிமர்) நோட்டுகளைக் களப்பரிசோதனை முறையில் அறிமுகப்படுத்தத் திட்டமிட்டுள்ளது. இதன் கீழ் தலா 100 கோடி நோட்டுகள் வீதம், மொத்தம் ரூ.3,000 கோடி மதிப்பிலான 200 கோடி பிளாஸ்டிக் நோட்டுகள் அச்சடிக்கப்படவுள்ளன.
அதேவேளையில், தற்போதைய காகித நோட்டுகளை முழுமையாகத் திரும்பப் பெற்று பிளாஸ்டிக் நோட்டுகளாக மாற்றும் திட்டம் எதுவும் அரசிடம் இல்லை என்று மத்திய அரசு தெளிவுபடுத்தியுள்ளது.
மக்களவையில் மத்திய அரசு விளக்கம்
மக்களவையில் எழுப்பப்பட்ட கேள்விக்கு எழுத்துப்பூர்வமாகப் பதிலளித்த நிதியமைச்சக இணை அமைச்சர் பங்கஜ் சௌத்ரி, “ஆர்பிஐ மத்திய வாரியத்தின் பரிந்துரையைத் தொடர்ந்து, இந்த இரண்டு மதிப்பிலான பாலிமர் நோட்டுகளைக் களப்பரிசோதனை செய்யவும், அது வெற்றியடைந்தால் வழக்கமான புழக்கத்திற்குக் கொண்டுவரவும் மத்திய அரசு அனுமதி அளித்துள்ளது” என்று தெரிவித்தார்.
மேலும், “காகித நோட்டுகளுக்குப் பதிலாக பிளாஸ்டிக் நோட்டுகளைக் கொண்டுவரும் திட்டம் இல்லை. காகித நோட்டுகளுடன் இணைந்தே பாலிமர் நோட்டுகளும் புழக்கத்தில் இருக்கும்” என்றும் அவர் குறிப்பிட்டார்.
நாட்டின் மொத்த ரூபாய் நோட்டுகளின் எண்ணிக்கையில் ரூ.10 மற்றும் ரூ.20 நோட்டுகள் கிட்டத்தட்ட 25% (நான்கில் ஒரு பங்கு) பங்களிப்பைக் கொண்டுள்ளன. ஆனால், புழக்கத்தில் உள்ள மொத்த பணத்தின் மதிப்பில் (Value of notes in circulation) இவை வெறும் 1.3% மட்டுமே வகிக்கின்றன.
பிளாஸ்டிக் நோட்டுகளைப் பரிசோதிக்கும் ஆர்பிஐ-யின் இரண்டாவது முயற்சி இதுவாகும்.
2009 செப்டம்பர்: கொச்சி, மைசூர், சிம்லா, ஜெய்ப்பூர் மற்றும் புபனேஷ்வர் ஆகிய 5 மாறுபட்ட காலநிலை கொண்ட நகரங்களில் 100 கோடி எண்ணிக்கையிலான ரூ.10 பிளாஸ்டிக் நோட்டுகளைப் பரிசோதிக்க ஆர்பிஐ திட்டமிட்டது.
இருப்பினும், சில தொழில்நுட்பச் சிக்கல்கள் காரணமாக அந்த முயற்சி கைவிடப்பட்டது.
பிளாஸ்டிக் நோட்டுகளின் நன்மைகள்
1988-இல் ஆஸ்திரேலியாவில் முதன்முதலில் அறிமுகப்படுத்தப்பட்ட பிளாஸ்டிக் நோட்டுகள், தற்போது 50-க்கும் மேற்பட்ட நாடுகளில் பயன்படுத்தப்பட்டு வருகின்றன.
காகித நோட்டுகளை விட பாலிமர் நோட்டுகளின் ஆயுட்காலம் மிக அதிகம் என்பது சர்வதேச ஆய்வுகளில் தெரியவந்துள்ளது.
தண்ணீரில் நனையாது, எளிதில் கிழியாது என்பதால் சிறிய மதிப்பு கொண்ட நோட்டுகளுக்கு இது மிகவும் ஏற்றது.