கே.ஆர். புரம் – சில்க் போர்டு மெட்ரோ பாதை எப்போது திறக்கப்படும்? வெளியான முக்கிய அப்டேட்

பெங்களூரு நகரில் போக்குவரத்து நெரிசலைக் குறைக்கும் நோக்கில் நம்ம மெட்ரோ திட்டப் பணிகள் தீவிரமாக நடைபெற்று வருகின்றன. இந்த நிலையில், பெங்களூருவின் முக்கிய ஐடி மண்டலமும், கடுமையான போக்குவரத்து நெரிசல் நிறைந்த பகுதியுமான வெளிவட்டச் சாலையில் (Outer Ring Road) அமைந்திருக்கும் கே.ஆர். புரம் முதல் சென்ட்ரல் சில்க் போர்டு வரையிலான 19.75 கி.மீ நீல நிறப் பாதை (Blue Line – Phase 2A) கட்டுமானப் பணிகளை, பெங்களூரு நகர வளர்ச்சித் துறை அமைச்சர் கிருஷ்ணா பைரே கவுடா வியாழக்கிழமை நேரில் சென்று ஆய்வு செய்தார்.

ஆய்வுக்குப் பிறகு செய்தியாளர்களிடம் பேசிய அமைச்சர்,

“இந்தப் பாதையில் மெட்ரோ ரயில்களுக்கான சோதனை ஓட்டத்தை நடப்பாண்டு அக்டோபர் மாத இறுதிக்குள் தொடங்க திட்டமிட்டுள்ளோம். இத்திட்டத்தின் ஒட்டுமொத்த சிவில் கட்டுமானப் பணிகள் தற்போது 87 சதவீதமும், நிலையங்களின் நுழைவு மற்றும் வெளியேறும் பணிகள் 88 சதவீதமும் வெற்றிகரமாக நிறைவடைந்துள்ளன. தேவையான அனைத்து சட்டப்பூர்வ அனுமதிகளும் கிடைக்கும் பட்சத்தில், வரும் 2027-ஆம் ஆண்டின் நடுப்பகுதியில் இந்த வழித்தடத்தை முழுமையாகப் பொதுமக்கள் பயன்பாட்டிற்குக் கொண்டுவர இலக்கு நிர்ணயித்துள்ளோம்.

இந்தத் திட்டப் பணிகள் திட்டமிட்டதை விடச் சற்று தாமதமாகியுள்ளன. இதற்கு முக்கியக் காரணம், மரங்களை வெட்டுவதற்கு நீதிமன்றம் விதித்த தடையால் ஏற்பட்ட ஓராண்டு கால இடைவெளிதான். மேலும், இப்பகுதியில் நாள் முழுவதும் நிலவும் கடுமையான போக்குவரத்து நெரிசல் காரணமாக, இரவு நேரங்கள் போன்ற வாகனப் போக்குவரத்து குறைவான சமயங்களில்தான் கட்டுமானப் பணிகளை மேற்கொள்ள முடிகிறது. இத்தனை சவால்களையும் தாண்டி விரைவாகப் பணிகளை முடித்து வருகிறோம்.

வெளிவட்டச் சாலையில் பல இடங்களில் மெட்ரோ கட்டுமானப் பணிகள் முழுமையாக முடிந்துவிட்டன. ஆனால், அங்கே போடப்பட்டிருந்த தடுப்புகள் (Barricades) இன்னும் அகற்றப்படாமல் இருப்பதால், பொதுமக்களுக்கும் வாகன ஓட்டிகளுக்கும் தேவையில்லாத போக்குவரத்து நெரிசல் ஏற்படுகிறது. அதை நானும் நேரில் பார்த்தேன்.

எனவே எந்தெந்த இடங்களில் கட்டுமானப் பணிகள் முடிந்துவிட்டனவோ, அங்கே உடனடியாக அந்தத் தடுப்புகளை அகற்ற வேண்டும். சாலைகளை முழுமையாகச் சீரமைத்து, மீண்டும் பொதுமக்களின் வாகனப் போக்குவரத்திற்கு எவ்விதத் தடையுமின்றி வழங்க வேண்டும் என்று அதிகாரிகளுக்கு உத்தரவிட்டுள்ளேன்.” என்று அமைச்சர் கிருஷ்ணா பைரே கவுடா தெரிவித்தார்.

ஆங்கிலத்தில் வாசிக்க

முக்கிய வழித்தடங்களின் தற்போதைய நிலை (BMRCL அறிக்கை):

நீல நிறப் பாதை (Phase 2A – கே.ஆர். புரம் to சில்க் போர்டு):

19.75 கி.மீ தூரப் பாதையில் மேம்பாலப் பணிகள் (Viaduct) 98.90% நிறைவடைந்துள்ளன. திட்டமிடப்பட்ட 38.4 கி.மீட்டரில் 37.1 கி.மீ அளவுக்கு தண்டவாளங்கள் அமைக்கப்பட்டுவிட்டன. முழுமையாகத் திறப்பதற்கு முன்பாகவே, கே.ஆர். புரம் முதல் மாரத்தஹள்ளி வரையிலான இடைப்பட்ட பகுதியில் ரயில்களை இயக்க பி.எம்.ஆர்.சி.எல் (BMRCL) விரும்பினாலும், போதிய அனுமதிகள் கிடைப்பதில் சிக்கல் உள்ளதால் அது சாத்தியமாகாமல் போகலாம் என்று அதிகாரிகள் தெரிவிக்கின்றனர்.   

விமான நிலைய வழித்தடம் (Phase 2B – கே.ஆர். புரம் to கெம்பேகௌடா விமான நிலையம்):

38.44 கி.மீ நீளம் கொண்ட இந்த வழித்தடத்தின் பணிகள் ஒட்டுமொத்தமாக 61.5 சதவீதம் முடிந்துள்ளன. ஹெப்பால் – விமான நிலையப் பிரிவில் 18.6 கி.மீ தூரத்திற்கு தண்டவாளங்கள் அமைக்கப்பட்டுள்ளன. விமான நிலையம் முதல் ஹெப்பால் வரையிலான பகுதி 2027 இறுதியிலும், ஹெப்பால் முதல் கே.ஆர். புரம் வரையிலான பகுதி 2028 தொடக்கத்திலும் பயன்பாட்டிற்கு வரும் என எதிர்பார்க்கப்படுகிறது.

இளஞ்சிவப்புப் பாதை (Pink Line):

கலேன அக்ஹாராவில் இருந்து தாவரேகெரே வரையிலான 7.5 கி.மீ உயர்மட்டப் பாதையின் (6 நிலையங்கள்) சிவில் மற்றும் கட்டமைப்புப் பணிகள் முழுமையாக முடிந்துவிட்டன. மெட்ரோ ரயில் பாதுகாப்பு ஆணையர் (CMRS) ஆய்வை முடித்துவிட்ட நிலையில், இதன் திறப்பு விழாவிற்கு பிரதமர் நரேந்திர மோடியிடம் தேதி கோரி கர்நாடக முதலமைச்சர் டி.கே. சிவக்குமார் கடிதம் எழுதியுள்ளார். இதற்கிடையே, தாவரேகெரே முதல் நாகவரா வரையிலான 13.76 கி.மீ நிலத்தடிப் பாதையில் தண்டவாளம் அமைக்கும் பணி முடிவடைந்து, ஏனைய பணிகள் 85-90% நிறைவடைந்துள்ளன.

கூடுதல் போக்குவரத்து திட்டங்கள்

மெட்ரோ விரிவாக்கம் தவிர, பெங்களூருவைச் சுற்றி ரூ. 23,000 கோடி மதிப்பீட்டில் 148 கி.மீ நீள புறநகர் ரயில் (Suburban Rail) திட்டப் பணிகள் நடைபெற்று வருகின்றன. இத்திட்டம் ஏப்ரல் 2030-க்குள் நிறைவடையும். மேலும், மாநகரப் பேருந்து சேவையை (BMTC) பலப்படுத்த 4,500 புதிய மின்சாரப் பேருந்துகளைக் கொள்முதல் செய்யவும் அரசு ஒப்புதல் அளித்துள்ளது.

இந்த ஒருங்கிணைந்த போக்குவரத்து நடவடிக்கைகள் அடுத்த 1 முதல் 2 ஆண்டுகளில் முழுமையாக செயல்பாட்டிற்கு வரும்போது, பெங்களூரு நகரின் ஒட்டுமொத்த போக்குவரத்து நெரிசலில் 50 சதவீதம் வரை குறையும் என்று அமைச்சர் நம்பிக்கை தெரிவித்துள்ளார்.