மறைந்த முன்னாள் முதலமைச்சர் ஜெயலலிதாவின் நம்பிக்கைக்குரிய நேர்முக உதவியாளராக இருந்த பூங்குன்றன், தற்போதைய அரசியல் சூழல் மற்றும் அ.தி.மு.கவின் நிலைப்பாடு குறித்து தனது கருத்துகளைத் தெரிவித்துள்ளார். ஜெயலலிதாவின் தனித்துவமான தலைமையையும் அவரது மரபையும் (Legacy) தற்கால நிகழ்வுகளோடு ஒப்பிடுவது வரலாற்றுப் பிழையாகும் என்று அவர் சுட்டிக்காட்டியுள்ளார்.
தமிழக அரசியல் வரலாற்றில் தனித்துவமான தடம் பதித்த தலைவர்கள் பலர் இருந்தாலும், வீழ்ந்த இடத்திலிருந்தே அதிவேகமாக மீண்டு வரும் ‘பீனிக்ஸ் பறவைக்கு’ முழு இலக்கணமாகத் திகழ்ந்தவர் ஜெயலலிதா மட்டுமே. 1996-ம் ஆண்டு பொதுத்தேர்தலில் அ.தி.மு.க மிகப்பெரிய சரிவை சந்தித்தபோதிலும், அவர் சோர்ந்து முடங்கிவிடவில்லை. தொண்டர்களைத் தட்டியெழுப்பி இயக்கத்தைக் கட்டுக்கோப்பாக மாற்றினார். இதன் விளைவாக, அடுத்த 10 ஆண்டுகள் வரை காத்திருக்காமல், வெறும் 2 ஆண்டுகளில் (1998-ல்) டெல்லி அரசியலைத் தீர்மானிக்கும் முதன்மைச் சக்தியாக அ.தி.மு.க.வை உயர்த்திக் காட்டினார்.
https://www.facebook.com/share/p/1HdAQ1WUka/
புரட்சித்தலைவர் எம்.ஜி.ஆருக்குப் பிறகு, தமிழக அரசியல் வரலாற்றில் தொடர்ந்து 2-வது முறையாக (2011, 2016) ஒரு கட்சியை அரியணையில் அமர்த்திக் காட்டிய பெருமை ஜெயலலிதாவுக்கே உரியது. இத்தகைய இமாலய சாதனையை இன்றைய பின்னடைவுகளோடு ஒப்பிடுவது நியாயமாகாது.
ஜெயலலிதாவுடன் 19 ஆண்டுகள் அருகில் இருந்த அனுபவத்தைப் பகிர்ந்த பூங்குன்றன், அவர் தவறு செய்தவர்களைத் தூக்கி எறியத் தயங்கியது இல்லை. அதேவேளையில், அவர்கள் தவறை உணர்ந்து திரும்ப இணைய விரும்பும்போது தாயுள்ளத்தோடு ஏற்றுக்கொண்டவர். அவர் தன்னைப் பற்றி யோசிக்காமல், கழகத்தையே தனது உயிராக நேசித்தார். கழகத்தின் வெற்றிக்கு என்ன தேவையோ அதைத் தொடர்ந்து செய்தார் எனக் குறிப்பிட்டுள்ளார்.
தற்போதைய அ.தி.மு.க.வின் போக்கை விமர்சிக்கும் வகையில் பேசிய அவர், சப்பாத்தியும், புரோட்டாவும் பார்ப்பதற்கு ஒரே வடிவில் இருக்கலாம்; ஆனால் இரண்டுமே ஒன்றாகிவிட முடியாது. அதேபோலத்தான் ஜெயலலிதாவின் தனித்துவமான தலைமையையும், தற்போதைய அ.தி.மு.க.வின் நிலைப்பாடுகளையும் ஒருபோதும் ஒப்பிட முடியாது என்று அழுத்தமாகத் தெரிவித்துள்ளார். தோல்விகளைக் கண்டு துவளாமல் தொண்டர்களை வழிநடத்திய அந்தப் பீனிக்ஸ் பறவையின் வரலாறு என்றும் எவரோடும் ஒப்பிட முடியாத ஒரு சகாப்தம் என்றும் பூங்குன்றன் தனது பதிவில் தெரிவித்துள்ளார்.