இந்திய ரயில்வே நிர்வாகம் நாடு முழுவதும் இயங்கி வரும் பழைய ஐ.சி.எஃப் ரயில்களை நீக்கி விட்டு, அதிநவீன வசதிகள் கொண்ட எல்.ஹெச்.பி (Linke Hofmann Busch) வகை ரயில் பெட்டிகளாக மாற்றி அமைத்து வருகிறது. பயணிகள் பாதுகாப்பாகவும் அதே வேளையில் சொகுசாகவும் பயணம் செய்ய வேண்டும் என்ற நோக்கில் இந்த நடவடிக்கைகள் விரைவுபடுத்தப்பட்டு வருகின்றன.
இதன் ஒரு பகுதியாக, ராமநாதபுரம் மாவட்டத்தின் மிக முக்கிய அடையாளமாகத் திகழும் ராமேஸ்வரம் – சென்னை எழும்பூர் இடையேயான ‘சேது சூப்பர்ஃபாஸ்ட் எக்ஸ்பிரஸ்’ (ரயில் எண்: 22661/22662) ரயிலில் இருந்த பழைய பெட்டிகள் நீக்கப்பட்டு, புதிய எல்.ஹெச்.பி பெட்டிகள் பொருத்தப்பட்டுள்ளன. இந்த புதிய பெட்டிகளுடன் கூடிய ரயில் சேவை ராமேஸ்வரத்தில் இருந்து கடந்த அக்டோபர் 19 அன்றும், சென்னை எழும்பூரில் இருந்து அக்டோபர் 22 அன்றும் வெற்றிகரமாகத் தொடங்கியது.
சேது எக்ஸ்பிரஸ் ரயிலில் இந்த மாற்றம் பயணிகள் மத்தியில் பெரும் வரவேற்பைப் பெற்ற நிலையில், தற்போது அதனைத் தொடர்ந்து சென்னை எழும்பூர் – திருச்செந்தூர் இடையேயான விரைவு ரயிலிலும் இந்த நவீன எல்.ஹெச்.பி பெட்டிகள் அறிமுகப்படுத்தப்பட்டு இயக்கப்பட்டு வருகின்றன.
எல்.ஹெச்.பி (LHB) பெட்டிகள் என்றால் என்ன?
எல்.ஹெச்.பி பெட்டிகள் என்பது ஜெர்மனி நாட்டின் தொழில்நுட்ப உதவியுடன் இந்தியாவில் உருவாக்கப்படும் அதிநவீன ரயில் பெட்டிகளாகும். பழைய ICF பெட்டிகளை விட இவை தொழில்நுட்ப ரீதியாகவும் பாதுகாப்பு அம்சங்களிலும் பல மடங்கு மேம்படுத்தப்பட்டவை.
Sethu Superfast Express now runs with modern LHB coaches! 🚆✨
The first LHB run of Rameswaram – Chennai Egmore Sethu Superfast Express (22662) was seen passing through St. Thomas Mount station. 🎥#SethuExpress#LHBCoaches#SouthernRailway#IndianRailways#Rameswaram#Chennaipic.twitter.com/RWCC42QpAK
— Southern Railway (@GMSRailway) October 24, 2026
இந்த எல்.ஹெச்.பி பெட்டிகள் துருப்பிடிக்காத எஃகு (Stainless Steel) மற்றும் அலுமினியத்தால் தயாரிக்கப்படுவதால், அதிக உறுதியும் குறைவான எடையும் கொண்டவை. ரயில்கள் மிக அதிவேகமாகச் செல்லும் போது கூட, பயணிகள் உள்ளே எந்தவிதமான அதிர்வுகளையும் உணராதவாறு இதன் வடிவமைப்பு அமைக்கப்பட்டுள்ளது. மேலும், எதிர்பாராத விதமாக ஏதேனும் விபத்து நேரிட்டால் கூட, ரயில் பெட்டிகள் ஒன்றுடன் ஒன்று மோதி ஒன்றன் மேல் ஒன்று ஏறி மடியாத (Anti-Telescopic) தொழில்நுட்பம் இதில் உள்ளது. இதனால் பயணிகளுக்கு ஏற்படும் ஆபத்துகள் பெருமளவு தவிர்க்கப்படுகின்றன. தீப்பிடிக்காத சிறப்புப் பொருட்களால் இந்த பெட்டிகளின் உள்பகுதி உருவாக்கப்பட்டுள்ளதால் அசம்பாவிதங்களின் போதும் பெரும் பாதுகாப்பு கிடைக்கிறது.
கூடுதல் வசதிகளும் சொகுசான பயணமும்
இந்த எல்.ஹெச்.பி பெட்டிகள் பழைய பெட்டிகளை விட நீளத்தில் சற்று அதிகமானவை. இதனால் ஒவ்வொரு பெட்டியிலும் கூடுதல் பயணிகள் அமர்ந்து செல்லும் வகையில் இருக்கைகள் அமைக்கப்பட்டுள்ளன. சொகுசான இருக்கை வசதி, அனைத்துப் பிரிவுகளிலும் மொபைல் போன் சார்ஜிங் பாயிண்ட்டுகள், நவீன முறையில் வடிவமைக்கப்பட்ட சுகாதாரமான கழிப்பறைகள் மற்றும் திறம்பட இயங்கும் டிஸ்க் பிரேக் (Disk Brake) அமைப்பு என பல்வேறு சிறப்பம்சங்கள் இதில் நிறைந்துள்ளன.
தென் மாவட்டங்களுக்குச் செல்லும் முக்கிய ரயில்களான சேது எக்ஸ்பிரஸ் மற்றும் திருச்செந்தூர் எக்ஸ்பிரஸில் மேற்கொள்ளப்பட்டுள்ள இந்த மாற்றம், தென் தமிழக மக்களுக்கு மேலும் சௌகரியமான, பாதுகாப்பான மற்றும் விரைவான பயண அனுபவத்தை உறுதி செய்துள்ளது.