சோனம் வாங்சுக் – காக்ரோச் ஜனதா கட்சி இடையே மோதலா? சௌரவ் தாஸ் பிரத்யேக பேட்டி

எழுதியவர்: ஆசாத் ரெஹ்மான்

போட்டித் தேர்வு வினாத்தாள் கசிவுக்கு எதிராக, காக்ரோச் ஜனதா கட்சி (CJP) முன்னெடுத்து வரும் போராட்டத்தின் முகமாகத் திகழ்ந்த சமூக ஆர்வலர் சோனம் வாங்சுக், தனது 26 நாள் உண்ணாவிரதப் போராட்டத்தை நேற்று இரவு முடித்துக் கொண்டார். மத்திய அமைச்சர்கள் ஜே.பி. நட்டா மற்றும் ஜிதேந்திர சிங் ஆகியோர் முன்னிலையில் அவர் தனது உண்ணாவிரதத்தை நிறைவு செய்தார்.

வினாத்தாள் கசிவு விவகாரம் நாடாளுமன்றத்தில் விவாதிக்கப்படும் என்றும், வினாத்தாள் கசிவு காரணமாகத் தேர்வுகள் ரத்தாகி மன உளைச்சலால் உயிரிழந்த மாணவர்களின் குடும்பங்களுக்கு நிவாரணம் வழங்கப்படும் என்றும் அரசு உறுதியளித்துள்ளதாக வாங்சுக் தெரிவித்தார்.

இருப்பினும், மத்திய கல்வி அமைச்சர் தர்மேந்திர பிரதானின் ராஜினாமாவைக் கோரும் தங்கள் நிலப்பாட்டில் எந்த மாற்றமும் இல்லை என சி.ஜே.பி. இன்று காலை தெளிவுபடுத்தியுள்ளது. அரசுடனான இரண்டாம் கட்ட பேச்சுவார்த்தை முடிந்த நிலையிலும் அவர்கள் இந்தத் தேவையில் உறுதியாக உள்ளனர்.

ஆங்கிலத்தில் வாசிக்க

டெல்லி ஜந்தர் மந்தரைத் தாண்டி நாட்டின் பல நகரங்களுக்கும் பரவியுள்ள இந்தப் போராட்டத்தின் திசைவழி குறித்து வாங்சுக்கிற்கும் சி.ஜே.பி-க்கும் இடையே கருத்து வேறுபாடு ஏற்பட்டுள்ளதா?

இது குறித்து காக்ரோச் ஜனதா கட்சி தலைவர் சௌரவ் தாஸ் இந்தியன் எக்ஸ்பிரஸ் நாளிதழுக்கு அளித்த பேட்டியில், தங்களுக்கும் வாங்சுக்கிற்கும் இடையே எந்தக் கருத்து வேறுபாடும் இல்லை என்று கூறினார்.

“நாங்கள் தர்மேந்திர பிரதானின் ராஜினாமாவை வலியுறுத்துகிறோம். மாணவர்களின் குடும்பங்களுக்கு ரூ.1 கோடி நிவாரணம் உள்ளிட்ட அவர்களின் முக்கியப் பிரச்சினைகளுக்குத் தீர்வு காணப்பட வேண்டும். ஒன்றை நாங்கள் தொடங்கிவிட்டால், அதை இறுதி வரை கொண்டு செல்வோம்.

வாங்சுக்கின் ஆரோக்கியத்தைப் பற்றி நாங்கள் கவலைப்படுகிறோம்; அவர் 11 கிலோ எடையைக் குறைத்துள்ளார். அவர் ஒரு கடிதம் எழுதியுள்ளார், அது அவருடைய தனிப்பட்ட கருத்து. அவருடைய தியாகத்தை நாங்கள் வீணடிக்க விடமாட்டோம். இந்த இயக்கத்தை நிச்சயமாக இதன் இறுதி இலக்கிற்கு எடுத்துச் செல்வோம்” என்றார்.

வெள்ளிக்கிழமை காலை ஜந்தர் மந்தரில் கூடியிருந்தவர்களிடையே பேசிய காக்ரோச் ஜனதா கட்சி நிறுவனர் அபிஜித் திப்கேவும், அமைச்சர் பிரதானின் ராஜினாமா கோரிக்கையில் தாங்கள் உறுதியாக இருப்பதாகத் தெளிவுபடுத்தினார்.

வாங்சுக் உண்ணாவிரதத்தை முடித்துக் கொண்டதைத் தவிர, வியாழக்கிழமை இரவு மற்றொரு முக்கிய நிகழ்வும் நடைபெற்றது. பிரதமர் நரேந்திர மோடி தனது வீடியோ செய்தியில், வினாத்தாள் கசிவைத் தடுக்கப் புதிய சட்டத்தைக் கொண்டுவர அமைச்சரவை ஆயத்தமாகி வருவதாக நாட்டு மக்களுக்கு உறுதியளித்தார். இத்தகைய மாற்றங்கள் நிகழ்ந்தபோதிலும், சி.ஜே.பி. தலைவர்கள் பிரதானின் ராஜினாமா கோரிக்கையிலிருந்து பின்வாங்கவில்லை.

ராகுல் காந்தி பற்றிய கீதாஞ்சலி ஆங்மோவின் கருத்து குறித்து…

மக்களவை எதிர்க்கட்சித் தலைவர் ராகுல் காந்தியை விமர்சித்து, வாங்சுக்கின் மனைவியும் கல்வியாளருமான கீதாஞ்சலி ஜே. ஆங்மோ கூறிய கருத்துக்கும் சௌரவ் தாஸ் பதிலளித்தார். புதனன்று ராகுல் காந்தி பிரதமர் இல்லத்திற்கு வெளியே போராட்டம் நடத்தியிருக்கக் கூடாது என்றும், அதற்குப் பதிலாக ஜந்தர் மந்தரில் நடக்கும் போராட்டத்தில் இணைந்திருக்க வேண்டும் என்றும் கீதாஞ்சலி கூறியிருந்தார்.

இதற்குப் பதிலளித்த சி.ஜே.பி. செய்தித் தொடர்பாளர் சௌரவ் தாஸ்:

“ஒவ்வொருவருக்கும் தனிப்பட்ட கருத்துக்கள் உண்டு. ராகுல் காந்தியின் போராட்டம் அமைதியான முறையில் இருக்கும் வரை அதை நான் ஆதரிக்கிறேன். ஏனெனில் அது அரசியலமைப்புக்கு உட்பட்டது. ஜந்தர் மந்தரிலும் கட்டுப்பாடுகள் விதிக்கப்பட்டுள்ளன. அமைதியான முறையில் போராட அரசியலமைப்பு உரிமை அளித்துள்ள நிலையில், இத்தகைய கட்டுப்பாடுகள் அரசியலமைப்பை மீறுவதாக அமைகின்றன.

ராகுல் காந்தி செய்தது நல்லது; எதிர்க்கட்சித் தலைவராகப் போராட்டங்களை முன்னெடுத்துச் செல்வது அவருடைய பொறுப்பு.”

ஜந்தர் மந்தர் போராட்டத்திலிருந்து காங்கிரஸ் கட்சியின் மூத்த தலைவர்கள் விலகியிருப்பது குறித்துக் கேட்டதற்கு தாஸ் கூறியதாவது:

“நாங்கள் இதில் தலையிட விரும்பவில்லை. நாங்கள் உண்மையின் வழியில் ஓர் இயக்கத்தை நடத்தி வருகிறோம். எங்களிடம் தெளிவான, புதிய யோசனைகள் உள்ளன. நாடு முழுவதிலுமிருந்து லட்சக்கணக்கான மக்கள் எங்களுடன் இணைந்துள்ளனர். யார் பெயர் எடுக்கிறார்கள், யார் வருகிறார்கள் என்பது எங்கள் கவலையல்ல. நாங்கள் அனைவரையும் அழைத்துள்ளோம்.

ராகுல் காந்திக்கும் கடிதம் எழுதினோம். அவர் வரவில்லை, அது அவருடைய விருப்பம். பல மூத்த தலைவர்கள் வந்துள்ளனர். மாணவர்களுக்கு ஆதரவாக அனைவரும் வந்து நிற்க வேண்டும்… யார் இதன் புகழை எடுத்துக்கொண்டாலும் எங்களுக்கு ஆட்சேபனை இல்லை. மாணவர்களுக்காக யார் குரல் கொடுத்தாலும் அது வரவேற்கத்தக்கது.”

அபிஜித் திப்கேவின் உடல்நிலை எப்படி உள்ளது?

அபிஜித் திப்கேவின் தற்போதைய உடல்நிலை குறித்துக் கேட்டதற்கு, “அவர் இப்போது நலமாக இருக்கிறார். அவருக்கு உடம்புக்குச் சரியில்லாமல் போனதால் மருத்துவரிடம் அழைத்துச் செல்லப்பட்டார். அவருக்கு ஊசி போடப்பட்டு, தற்போது ஓய்வெடுத்து வருகிறார். உணவு நச்சு (Food poisoning) காரணமாக அவர் பாதிக்கப்பட்டார். போராட்டம் நீண்ட நாட்களாக நடந்து வருவதால், பலருக்கும் உடல்நலக் குறைவு ஏற்படுகிறது. அசுதோஷும் இப்போது நலமாக இருக்கிறார்” என்று தாஸ் தெரிவித்தார்.