கல்வி சீர்திருத்தவாதியும், சுற்றுச்சூழல் ஆர்வலருமான சோனம் வாங்சுக் கைது செய்யப்பட்டதைக் கண்டித்தும், மாணவர்களின் எதிர்காலத்தை பாதிக்கும் நீட் தேர்வை ரத்து செய்ய வலியுறுத்தியும், டெல்லியில் நடைபெற்று வரும் அமைதியான ஜனநாயகப் போராட்டங்களை ஒன்றிய அரசு ஒடுக்கி வருவதை கண்டித்தும், மார்க்சிஸ்ட் கம்யூனிஸ்ட் கட்சி (சிபிஐ(எம்)) சார்பில் புதுச்சேரியில் இன்று எழுச்சிமிக்க கண்டன ஆர்ப்பாட்டம் நடைபெற்றது.
புதுச்சேரி ராஜா திரையரங்கம் அருகே இன்று (20.07.2026) காலை 10 மணியளவில் நடைபெற்ற இந்த ஆர்ப்பாட்டத்திற்கு சிபிஐ(எம்) மாநிலச் செயலாளர் சு. ராமச்சந்திரன் தலைமை தாங்கினார். இதில் மாநில நிர்வாகிகள், மாநிலக் குழு உறுப்பினர்கள், ஜனநாயக அமைப்புகளின் பிரதிநிதிகள், மாணவர்கள், இளைஞர்கள், பெண்கள் மற்றும் கட்சித் தொண்டர்கள் என ஏராளமானோர் பங்கேற்று ஒன்றிய அரசுக்கு எதிராக முழக்கங்களை எழுப்பினர்.
நீட் தேர்வை ரத்து செய்ய வேண்டும், கல்வியில் சமத்துவத்தை நிலைநாட்ட வேண்டும், அரசுப் பள்ளி மாணவர்களின் மருத்துவக் கல்வி வாய்ப்புகளைப் பாதுகாக்க வேண்டும், மாநிலங்களின் கல்வி உரிமையில் ஒன்றிய அரசு தலையிடக் கூடாது, கல்வியை வணிகமயமாக்கும் கொள்கைகளை கைவிட வேண்டும் என்பன உள்ளிட்ட கோரிக்கைகளை வலியுறுத்தி ஆர்ப்பாட்டக்காரர்கள் பதாகைகள் ஏந்தியும், முழக்கங்களை எழுப்பியும் தங்களது எதிர்ப்பை வெளிப்படுத்தினர்.
ஆர்ப்பாட்டத்தில் பேசிய சிபிஐ(எம்) மாநிலச் செயலாளர் சு. ராமச்சந்திரன், “நீட் தேர்வு என்பது கிராமப்புற மற்றும் ஏழை, எளிய குடும்பங்களைச் சேர்ந்த மாணவர்களின் உயர்கல்வி கனவை சீரழிக்கும் தேர்வு முறையாக மாறியுள்ளது. மாநிலங்களின் கல்வி உரிமையை பறிக்கும் வகையில் செயல்படும் நீட் தேர்வை உடனடியாக ரத்து செய்ய வேண்டும். கல்வி என்பது அனைவருக்கும் சமமாக கிடைக்க வேண்டிய அடிப்படை உரிமை; அதனை சிலருக்கு மட்டுமே கிடைக்கும் வாய்ப்பாக மாற்றும் எந்தக் கொள்கையும் ஏற்க முடியாது” என்றார்.
மேலும், லடாக்கின் சுற்றுச்சூழல் பாதுகாப்பு, அரசியலமைப்பு உரிமைகள் மற்றும் மக்களின் ஜனநாயகக் கோரிக்கைகளை வலியுறுத்தி அறவழியில் போராடி வந்த கல்வி சீர்திருத்தவாதி சோனம் வாங்சுக், 21 நாட்கள் தொடர் உண்ணாவிரதம் மேற்கொண்டு உடல்நிலை பாதிக்கப்பட்ட நிலையில் மருத்துவமனையில் அனுமதிக்கப்பட்ட பிறகும், அவரை கைது செய்திருப்பது ஜனநாயகத்திற்கு எதிரான செயல் என்றும், கருத்து தெரிவிக்கும் உரிமையையும் அமைதியான போராட்ட உரிமையையும் ஒன்றிய அரசு ஒடுக்க முயற்சிப்பதாகவும் கடுமையாக விமர்சிக்கப்பட்டது.
அமைதியான முறையில் நடைபெறும் போராட்டங்களை காவல்துறையை பயன்படுத்தி ஒடுக்குவது, போராட்டக்காரர்களை கைது செய்வது, எதிர்க்குரல்களை அடக்குவது போன்ற நடவடிக்கைகள் ஜனநாயக நாட்டிற்கு ஏற்றதல்ல என்றும், மக்களின் உரிமைகளைக் காக்க வேண்டிய அரசே ஜனநாயக விரோத நடவடிக்கைகளில் ஈடுபடுவது கண்டனத்திற்குரியது என்றும் ஆர்ப்பாட்டத்தில் பங்கேற்ற தலைவர்கள் தெரிவித்தனர்.
மாணவர்களின் எதிர்காலத்தை பாதித்துள்ள நீட் தேர்வு தொடர்பாக ஒன்றிய அரசு தனது நிலைப்பாட்டை மறுபரிசீலனை செய்ய வேண்டும் என்றும், கல்விக் கொள்கை தொடர்பாக மாநில அரசுகளின் கருத்துகளுக்கு உரிய முக்கியத்துவம் வழங்கப்பட வேண்டும் என்றும் வலியுறுத்தப்பட்டது. மேலும், மாணவர்கள், இளைஞர்கள் மற்றும் சமூக ஆர்வலர்களின் ஜனநாயக உரிமைகளை மதித்து, அவர்கள் முன்வைக்கும் கோரிக்கைகளுக்கு உரிய தீர்வு காண வேண்டும் என ஒன்றிய அரசுக்கு வலியுறுத்தப்பட்டது.
ஆர்ப்பாட்டத்தில் கட்சியின் முக்கிய நிர்வாகிகளான சுதா சுந்தரராமன், வெ. பெருமாள், இரா. ராஜாங்கம், கலியமூர்த்தி சத்தியா மற்றும் மாநிலக் குழு உறுப்பினர்கள் ஜோதிபாசு, ராம்ஜி, இளவரசி உள்ளிட்டோர் கலந்து கொண்டு உரையாற்றினர். ஒன்றிய அரசின் கல்விக் கொள்கை, ஜனநாயக உரிமைகள் மீதான தாக்குதல் மற்றும் எதிர்க்குரல்களை ஒடுக்கும் போக்குக்கு எதிராக தொடர்ந்து மக்கள் மத்தியில் விழிப்புணர்வு ஏற்படுத்தி, ஜனநாயக வழியில் போராட்டங்களை முன்னெடுப்போம் என்றும் அவர்கள் உறுதியளித்தனர்.
ஆர்ப்பாட்டத்தின் நிறைவில், சோனம் வாங்சுக் மீது மேற்கொள்ளப்பட்டுள்ள நடவடிக்கையை உடனடியாக திரும்பப் பெற வேண்டும், நீட் தேர்வை ரத்து செய்து மாணவர்களின் கல்வி உரிமையை பாதுகாக்க வேண்டும், அமைதியான போராட்டங்களில் ஈடுபடுவோரின் ஜனநாயக உரிமைகளை மதிக்க வேண்டும், எதிர்க்குரல்களை ஒடுக்கும் சர்வாதிகார போக்கை ஒன்றிய அரசு கைவிட வேண்டும் என்ற கோரிக்கைகளை வலியுறுத்தி தீர்மானங்கள் நிறைவேற்றப்பட்டன. “ஜனநாயகத்தைக் காப்போம், கல்வி உரிமையை பாதுகாப்போம், மக்கள் உரிமைக்காக தொடர்ந்து போராடுவோம்” என்ற முழக்கங்களுடன் கண்டன ஆர்ப்பாட்டம் நிறைவடைந்தது.
செய்தி: பாபு ராஜேந்திரன் – புதுச்சேரி