சென்னை ‘ஜெம் கிரானைட்ஸ்’ நிறுவனத்தின் உரிமையாளர் வீராமணி மற்றும் அவரது கூட்டாளிகள் மீது பதிவு செய்யப்பட்டுள்ள சிறுமிகளுக்கு எதிரான பாலியல் குற்றங்கள் தொடர்பான போக்சோ வழக்குகளில், குற்றம் சாட்டப்பட்ட ஐந்து நபர்கள் வெளிநாடுகளுக்குத் தப்பிச் செல்வதைத் தடுக்கும் வகையில் சென்னை பெருநகரக் காவல்துறை ‘லுக் அவுட்’ (LOC) சுற்றறிக்கை வெளியிட்டுள்ளது.
சிறப்பு புலனாய்வுக் குழு நடத்தி வரும் இந்த விசாரணையில், குற்றம் சாட்டப்பட்டவர்களுக்குத் தொடர்புடைய ஆவணங்கள் அல்லது தகவல்கள் இந்த 5 நபர்களின் வசம் இருக்கலாம் எனச் சந்தேகிக்கப்படுகிறது. இதன் அடிப்படையில், விமான நிலையங்கள், துறைமுகங்கள் போன்ற அனைத்து எல்லைக் கட்டுப்பாட்டு மையங்கள் வழியாகவும் இவர்கள் நாட்டிலிருந்து வெளியேறுவதைத் தடுக்க குடிவரவுப் பணியகத்தின் மூலம் நடவடிக்கை எடுக்கப்பட்டுள்ளது.
முன்னதாக, வெள்ளிக்கிழமை அன்று வெளிநாடு செல்ல முயன்ற வீரமணியின் மகள் அர்ச்சனாவைச் சிறப்பு புலனாய்வுக் குழுவினர் சென்னை சர்வதேச விமான நிலையத்தில் வைத்துத் தடுத்து நிறுத்தி விசாரணை நடத்தினர். வீரமணியின் சட்டவிரோத நடவடிக்கைகள் மற்றும் காவல்துறை நடவடிக்கைகளிலிருந்து தப்பிப்பதற்காக மேற்கொள்ளப்பட்ட பணப் பரிவர்த்தனைகள் குறித்து அவரிடம் விசாரணை மேற்கொள்ளப்பட்டது. விசாரணைக்குப் பின்னர் உடல்நலக்குறைவு காரணமாக மருத்துவமனையில் அனுமதிக்கப்பட்ட அர்ச்சனா, தற்போது வீடு திரும்ப அனுமதிக்கப்பட்டுள்ளார்.
இதற்கிடையில், பாதிக்கப்பட்ட மற்றொரு சிறுமி அளித்த புகாரின் பேரில் தொழிலதிபர் வீரமணி மீது மேலும் ஒரு போக்சோ வழக்கு பதிவு செய்யப்பட்டுள்ளது. இந்த புதிய வழக்கில் வீரமணியுடன் சேர்த்து அவரது கூட்டாளி சாந்தி மற்றும் லாசர் என்பவரும் சேர்க்கப்பட்டுள்ளனர். இதன் மூலம் வீரமணி மற்றும் அவரது கூட்டாளிகள் மீது இதுவரை மொத்தம் 8 போக்சோ வழக்குகள் மற்றும் 2004-ஆம் ஆண்டு சிறுமி ஒருவரைத் தற்கொலைக்குத் தூண்டியதாக 1 வழக்கு என மொத்தம் 9 வழக்குகள் பதிவு செய்யப்பட்டுள்ளன.
இந்த விவகாரத்தில் இதுவரை 8 பேர் கைது செய்யப்பட்டு புழல் மத்திய சிறையில் அடைக்கப்பட்டுள்ளனர். கைது செய்யப்பட்டுள்ள வீரமணி, சாந்தி மற்றும் அவரது கணவர் மகேந்திர சிம்மன் ஆகியோரை விரைவில் காவலில் எடுத்து விசாரணை நடத்த உள்ளதாகப் புலனாய்வுக் குழு தெரிவித்துள்ளது. சோதனைகளின் போது பறிமுதல் செய்யப்பட்ட ஆதாரங்களை அடிப்படையாகக் கொண்டு விசாரணையை விரைந்து முடித்து, உரிய நீதிமன்றத்தில் குற்றப்பத்திரிகை தாக்கல் செய்யப்படும் என்றும் தெரிவிக்கப்பட்டுள்ளது.