தங்கம் மற்றும் வெள்ளி விலையில் தொடர்ந்து ஏற்ற இறக்கங்கள் நிலவி வரும் சூழ்நிலையிலும், வரவிருக்கும் தந்தேராஸ் (Dhanteras) பண்டிகை மற்றும் திருமண சீசனை முன்னிட்டு தங்கம் மற்றும் வைரம் வாங்குவதில் வாடிக்கையாளர்கள் மிகுந்த ஆர்வம் காட்டி வருகின்றனர்.
விலை உயர்வில் இருந்து தப்பிக்கும் வகையில் அறிமுகப்படுத்தப்பட்டுள்ள ‘அட்வான்ஸ் புக்கிங்’ திட்டங்கள் மற்றும் பண்டிகைக் கால தேவை ஆகியவை நகை விற்பனையை கணிசமாக உயர்த்தியுள்ளன.
வரும் நவம்பர் 6-ஆம் தேதி தந்தேராஸ் பண்டிகை கொண்டாடப்பட உள்ளது. தற்போது 24 காரட் தங்கம் 10 கிராமிற்கு ரூ. 1.42 லட்சம் முதல் ரூ. 1.44 லட்சம் வரையிலும், வெள்ளி ஒரு கிலோ ரூ. 1.95 லட்சம் முதல் ரூ. 1.96 லட்சம் வரையிலும் விற்பனையாகிறது.
எதிர்காலத்தில் தங்கம் விலை மேலும் உயரக்கூடும் என்ற அச்சம் காரணமாக, ‘ரேட் புரோட்டக்ஷன்’ (Rate Protection / Pure Price Offer) எனப்படும் முன்பதிவு திட்டங்களை வாடிக்கையாளர்கள் அதிகம் பயன்படுத்தி வருகின்றனர். இதன் மூலம் தற்போதைய விலையிலேயே தொகையைச் செலுத்தி நகைகளை முன்பதிவு செய்து கொள்ள முடியும். கல்யாண் ஜூவல்லர்ஸ், ஜோயாலுக்காஸ், சென்கோ கோல்ட் உள்ளிட்ட முன்னணி நிறுவனங்கள் இத்தகைய சிறப்பான திட்டங்களை வழங்கி வருகின்றன.
சென்கோ கோல்ட் & டைமண்ட்ஸ் நிறுவனத்தின் மேலாண் இயக்குநர் சுவங்கர் சென் கூறுகையில், “கடந்த சில மாதங்களாகவே வாடிக்கையாளர்களின் வருகை மற்றும் நகைகள் வாங்கும் ஆர்வம் அதிகரித்துள்ளது. இந்த பண்டிகைக் காலத்தில் கடந்த ஆண்டை விட 20 சதவீதத்திற்கும் அதிகமான விற்பனை வளர்ச்சியை எதிர்பார்க்கிறோம்” என்று தெரிவித்துள்ளார்.
அதேபோல், கடாரியா ஜூவல்லர்ஸ் நிறுவனத்தின் தலைமை நிர்வாக அதிகாரி யாஷ் கடாரியா, இம்முறை தந்தேராஸ் விற்பனை 35% முதல் 40% வரை அதிகரிக்கும் எனக் கணித்துள்ளார்.
இந்த ஆண்டு தந்தேராஸ் பண்டிகையும் திருமண சீசனும் அடுத்தடுத்து வருவதால், சிறிய தங்க மற்றும் வெள்ளி நாணயங்கள் மட்டுமின்றி, கனமான திருமண நகைகளுக்கான ஆர்டர்களும் குவிந்து வருகின்றன.
வாடிக்கையாளர்கள் பாரம்பரிய டிசைன்கள் மட்டுமின்றி ‘போல்க்கி’ (Polki), ரோஸ்-கட் வைரம், வண்ண வைரங்கள் மற்றும் நவீன கலை நயமிக்க டிசைன்களையும் அதிகம் விரும்புகின்றனர்.
பழைய தங்கப் பரிமாற்றம் அதிகரிப்பு
தங்கம் விலை உயர்ந்துள்ளதால், புதிய நகைகளை வாங்குவதற்குத் தங்களிடம் உள்ள பழைய நகைகளைக் கொடுத்துப் புதிய நகைகளாக மாற்றிக் கொள்ளும் ‘ஓல்டு கோல்ட் எக்ஸ்சேஞ்ச்’ முறையை 50 சதவீதத்திற்கும் அதிகமான வாடிக்கையாளர்கள் பயன்படுத்தி வருகின்றனர். மேலும், தினசரி பயன்பாட்டிற்கான லேசான எடையுள்ள நகைகளுக்கும் நல்ல வரவேற்பு கிடைத்துள்ளது.
விலை பாதுகாப்பு திட்டங்கள், மாதாந்திர சேமிப்புத் திட்டங்கள் மற்றும் புதிய வடிவமைப்பு நகைகள் ஆகியவை மூலம் வாடிக்கையாளர்களைக் கவர்ந்து, இந்த பண்டிகைக் காலத்தில் நல்ல வருவாயை ஈட்ட நகைக்கடைகள் தயாராகி வருகின்றன.