எழுதியவர்: அதிதி ராஜா
மம்தா பானர்ஜியின் திரிணாமுல் காங்கிரஸ் கட்சியிலிருந்து முன்னாள் கிரிக்கெட் வீரர் யூசுப் பத்தான் விலகிய இரண்டு மாதங்களுக்குப் பிறகு, வதோதரா மாநகராட்சிக்குச் சொந்தமான, சர்ச்சைக்கிடமான 978 சதுர மீட்டர் நிலத்தை அவருக்கு ஒதுக்கீடு செய்ய குஜராத் அரசு முடிவு செய்துள்ளது. இரண்டு ஆண்டுகளுக்கு முன்பு இதே நிலத்திற்காக அவருக்கு ஆக்கிரமிப்பு நோட்டீஸ் அனுப்பப்பட்டிருந்தது குறிப்பிடத்தக்கது.
ஆங்கிலத்தில் படிக்க கிளிக் செய்க
பா.ஜ.க-வின் கட்டுப்பாட்டில் உள்ள வதோதரா மாநகராட்சி, 2024 ஜூன் மாதம் பத்தானுக்கு நோட்டீஸ் அனுப்பியது. அவர் மேற்கு வங்கத்தின் பஹரம்பூர் மக்களவைத் தொகுதியில் திரிணாமுல் காங்கிரஸ் சார்பில் வெற்றி பெற்ற சில நாட்களில் இந்த நோட்டீஸ் அவருக்கு அனுப்பப்பட்டது. 2026 மே மாதத்தில் வங்காளத்தில் பா.ஜ.க ஆட்சிக்கு வந்த ஒரு மாதத்திற்குப் பிறகு, 2026 ஜூன் மாதத்தில் திரிணாமுல் காங்கிரஸில் இருந்து விலகி, அதிகம் அறியப்படாத தேசியவாத குடிமக்கள் கட்சியில் இணைந்த 20 எம்.பி-க்களில் பத்தானும் ஒருவர்.
வதோதரா மாநகராட்சி நில உடைமை துறையால் தயாரிக்கப்பட்ட இந்த நில ஒதுக்கீட்டு முன்மொழிவு, உள்ளாட்சி அமைப்பின் நிலைக்குழுவின் முன் சமர்பிக்கப்பட்டுள்ளது. பத்தானுக்கு நிலத்தை ஒதுக்க ஒப்புதல் அளிக்கும் குஜராத் அரசின் அரசாணையின் அடிப்படையில் இந்த வதோதரா மாநகராட்சி முன்மொழிவு தயாரிக்கப்பட்டுள்ளது. ஆகஸ்ட் 13 தேதியிட்ட அந்த அரசாணை ஆகஸ்ட் 29 அன்று வதோதரா மாநகராட்சியை வந்தடைந்தது. முன்னதாக, இந்த நில ஒதுக்கீடு தொடர்பான தனது கோரிக்கை நிராகரிக்கப்பட்டதை எதிர்த்து குஜராத் உயர்நீதிமன்றத்தில் தாக்கல் செய்திருந்த மேல்முறையீட்டை ஆகஸ்ட் 31 அன்று பத்தான் திரும்பப் பெற்றார்.
அரசாணையின்படி, 978 சதுர மீட்டர் நிலத்தில் 500 சதுர மீட்டர் நிலம் பத்தானின் குடியிருப்பு பயன்பாட்டிற்காக பரிசாக வழங்கப்படும். மீதமுள்ள 478 சதுர மீட்டர் நிலம், வதோதரா நகர வளர்ச்சி முகமையின் மதிப்பீட்டுக் குழுவால் 2026 மார்ச் 17 அன்று கணக்கிடப்பட்ட மதிப்பீட்டில் 55% சலுகைக் கட்டணத்தில் மாற்றப்படும்.
இந்த ஏற்பாடு ஒரு முன்உதாரணமாக கருதப்படக் கூடாது என்றும், உள்ளாட்சி அமைப்பால் பத்தானுக்கு மாற்றப்படும் நிலத்தின் மதிப்பிற்கு இணையான நிலத்தை மாநில வருவாய்த்துறை, வதோதரா மாநகராட்சிக்கு ஒதுக்கீடு செய்யும் என்றும் அரசாணையில் தெரிவிக்கப்பட்டுள்ளது.
நகர திட்டமிடல் திட்டம் எண் 22, இறுதி பிளாட் எண் 90-ன் கீழ் தண்டல்ஜாவில் அமைந்துள்ள இந்த நிலம், பத்தான் குடும்பத்தின் அடையாளமான வெள்ளை பங்களாவிற்கு அருகில் உள்ளது. இங்குதான் யூசுப் மற்றும் அவரது தம்பியும் முன்னாள் இந்திய கிரிக்கெட் வீரருமான இர்பான் பத்தான் ஆகியோர் தங்கள் குடும்பங்கள் மற்றும் பெற்றோருடன் வசித்து வருகின்றனர்.
இதுகுறித்து தி இந்தியன் எக்ஸ்பிரஸ் தொடர்புகொண்டு கேட்டபோது, வதோதரா மாநகராட்சி ஆணையர் அருண் மகேஷ் பாபு, நில ஒதுக்கீட்டிற்கான மாநில அரசின் ஒப்புதல் மாநகராட்சிக்கு கிடைத்துள்ளதாகவும், ஆனால் விவரங்கள் இன்னும் இறுதி செய்யப்படவில்லை என்றும் தெரிவித்தார்.
இந்த ஒதுக்கீடு ரெட்ரோஸ்பெக்டிவ் (முந்தைய தேதியிட்டு) முறையில் நடைமுறைப்படுத்தப்படுமா? என்று கேட்டதற்கு பாபு, “அரசு ஒப்புதலின் விரிவான நிபந்தனைகளை நாங்கள் பரிசீலிக்க வேண்டும். விவரங்கள் விரைவில் இறுதி செய்யப்படும். இந்த முன்மொழிவு உள்ளாட்சி அமைப்பின் வழக்கமான ஒப்புதல் செயல்முறை (நிலைக்குழு மற்றும் பொது வாரிய ஒப்புதல்) மூலம் செல்லும்” என்று கூறினார்.
கடந்த ஜூலை மாதம், வதோதரா மாநகராட்சியின் உயர்மட்ட நிர்வாக அமைப்பான நிலைக்குழு, இந்த நிலத்தைப் பொது ஏலம் விடுவதற்கான ஆயத்தங்களைத் தொடங்கி, சதுர மீட்டருக்கு ரூ.2.10 லட்சம் என்ற மதிப்பீட்டிற்கு ஒப்புதல் அளித்திருந்தது. அதன்படி அந்த நிலத்தின் மதிப்பிடப்பட்ட தொகை சுமார் ரூ.20.5 கோடியாகும்.
இருப்பினும், நகராட்சி நிர்வாகத்தின் உயர்மட்டச் சட்டமன்ற மற்றும் முடிவு எடுக்கும் அமைப்பான பொது வாரியம் பத்தானின் ஆக்கிரமிப்பு குறித்துக் கேள்விகளை எழுப்பியதுடன், இந்த விவகாரம் தீர்க்கப்படாமல் நிலத்தை ஏலம் விட முடியாது என்று கூறியதால் அந்த முன்மொழிவு திரும்பப் பெறப்பட்டது. நில ஒதுக்கீடு தொடர்வதற்கு முன், நில எஸ்டேட் துறை தற்போது நிலைக்குழு மூலம் பொது வாரியத்தின் ஒப்புதலைக் கோரியுள்ளது.
நில உடைமை துறையின் இந்த முன்மொழிவு, 2012-ல் தொடங்கிய ஒரு சர்ச்சையின் சமீபத்திய நகர்வாகும். அப்போது, பொது ஏலம் இல்லாமல் 99 வருட குத்தகைக்கு இந்த திறந்தவெளி நகராட்சி நிலத்தைக் கோரி பத்தான் வதோதரா மாநகராட்சிyஐ அணுகினார். தனது மனுவில், சர்வதேச கிரிக்கெட் வீரர் என்ற முறையில் தனக்கு உள்ள பாதுகாப்புப் பிரச்சினைகளை குறிப்பிட்ட அவர், அருகில் உள்ள நிலத்தை ஒதுக்குவது குடியிருப்பு பயன்பாட்டிற்கு வசதியாக இருக்கும் என்று கூறியிருந்தார்.
பத்தான் மார்ச் 2012-ல் இந்தியாவிற்கான தனது கடைசி ஒருநாள் மற்றும் டி20 போட்டியில் விளையாடினார். அவர் 2011 முதல் 2017 வரை ஐ.பி.எல் தொடரில் கொல்கத்தா நைட் ரைடர்ஸ் அணிக்காக விளையாடினார். மேலும் 2012 மற்றும் 2014-இல் கே.கே.ஆர் சாம்பியன் பட்டம் வெல்வதில் முக்கியப் பங்கு வகித்தார்.
அப்போதைய வதோதரா மாநகராட்சி நிலைக்குழு மற்றும் பொது வாரியம் பத்தானின் முன்மொழிவுக்கு ஒப்புதல் அளித்திருந்தன. அந்த நிலம் சதுர மீட்டருக்கு ரூ.57,270 என மதிப்பிடப்பட்டது, அதாவது முழு நிலமும் சுமார் ரூ.5.6 கோடி என மதிப்பிடப்பட்டது. இந்த தொகையைச் செலுத்த பத்தான் சம்மதம் தெரிவித்திருந்தார்.
இருப்பினும், பொது ஏல முறையைத் தவிர்த்து, பத்தானுக்கு நிலம் ஒதுக்குவதற்கு குஜராத் அரசின் ஒப்புதல் தேவைப்பட்டது. ஜூன் 2014-ல், மாநிலத்தின் நகர்ப்புற வளர்ச்சித் துறை இந்த முன்மொழிவை நிராகரித்தது. நிராகரிக்கப்பட்ட போதிலும் பத்தான் அந்த நிலத்திற்கு வேலி அமைத்து ஆக்கிரமித்துக் கொண்டதாக வதோதரா மாநகராட்சி பின்னர் குற்றம் சாட்டியது.
பஹரம்பூர் எம்.பி-யும் காங்கிரஸ் மூத்த தலைவருமான அதிர் ரஞ்சன் சவுத்ரியை தோற்கடித்து, ஜூன் 2024-ல் மக்களவைக்குத் தேர்வான சிறிது நேரத்திலேயே, ஆக்கிரமிப்பை அகற்றுமாறு பத்தானுக்கு வதோதரா மாநகராட்சி நோட்டீஸ் அனுப்பியது. இந்த நோட்டீஸை எதிர்த்து பத்தான் குஜராத் உயர் நீதிமன்றத்தில் வழக்கு தொடர்ந்தார்.
ஆகஸ்ட் 2025-ல், தனி நீதிபதி ஒருவர், நில ஒதுக்கீட்டை நிராகரித்த மாநில அரசின் முடிவை உறுதி செய்தார். பணத்தைச் செலுத்தாமல் நீண்ட காலம் நிலத்தை வைப்பது சட்டப்பூர்வ உரிமையை உருவாக்காது என்றும், பிரபலங்கள் மற்றும் பொதுப் பிரமுகர்களுக்கு சிறப்புச் சலுகை அளிப்பது தவறான செய்தியைக் கொண்டு சேர்க்கும் என்றும் நீதிமன்றம் குறிப்பிட்டது.
இந்த உத்தரவை எதிர்த்து பத்தான் மேல்முறையீடு செய்தார். இந்த ஆண்டு ஜூன் மாதம் நடைபெற்ற விசாரணையின் போது, அப்போதைய தலைமை நீதிபதி சுனிதா அகர்வால் (தற்போது உச்சநீதிமன்ற நீதிபதி) தலைமையிலான உயர்நீதிமன்றத்தின் அமர்வு, நில ஒதுக்கீடு நடைமுறைகள் அல்லது கட்டணம் செலுத்தப்படாமல் பொது நிலத்தை எவ்வாறு தொடர்ந்து தன்வசம் வைத்திருக்க முடியும் என்று கேள்வி எழுப்பியது.
சர்வதேச விளையாட்டு வீரர்களுக்கான மாநில அரசின் கொள்கையின் கீழ் பத்தானுக்கு நிவாரணம் கிடைத்தாலும், நிலத்தை சட்டவிரோதமாக ஆக்கிரமித்திருந்தது உறுதி செய்யப்பட்டால் சேதங்களை மதிப்பிடும் போது அது தனியாக பரிசீலிக்கப்பட வேண்டும் என்று நீதிமன்றம் வாய்மொழியாக குறிப்பிட்டது.
கொள்கையின் கீழ் தனது கோரிக்கையைத் தொடர பத்தானின் வழக்கறிஞர் கால அவகாசம் கோரியதை அடுத்து, நீதிமன்றம் அவருக்கு நான்கு வாரங்கள் அவகாசம் அளித்தது. ஆனால் ஆக்கிரமிப்பு தொடர்ந்தால் அவருடைய நிதிப் பொறுப்பு அதிகரிக்கும் என்று எச்சரித்தது.
ஆகஸ்ட் 31 அன்று, வழக்கை திரும்ப பெறுமாறு பத்தான் தனது வழக்கறிஞருக்கு அறிவுறுத்தியதை நீதிமன்றம் பதிவு செய்தது. மேலும் நீதிமன்றத்திற்கு வெளியே மட்டுமே இந்த விவகாரத்தை முடிவுக்குக் கொண்டுவர முடியும் என்று வழக்கறிஞர் உயர் நீதிமன்றத்தில் தெரிவித்ததையடுத்து, வழக்கு திரும்பப் பெறப்பட்டதால் தள்ளுபடி செய்யப்படுகிறது என்று நீதிமன்றம் உத்தரவிட்டது.
இதற்கிடையில், மே 4 அன்று மேற்கு வங்க சட்டப்பேரவைத் தேர்தல் முடிவுகள் அறிவிக்கப்பட்டு சுவேந்து அதிகாரி தலைமையிலான பா.ஜ.க அரசு மே 9 அன்று பொறுப்பேற்றது. ஜூன் 14 அன்று, பத்தான் உட்பட 20 திரிணாமுல் காங்கிரஸ் எம்.பி-க்கள் தாங்கள் தேசியவாத குடிமக்கள் கட்சியில் இணைந்தனர். பத்தான் உள்ளிட்ட திரிணாமுல் காங்கிரஸ் எம்.பி-க்கள் மக்களவை சபாநாயகர் ஓம் பிர்லாவைச் சந்தித்து, மம்தா பானர்ஜியின் கட்சியிலிருந்து தனியாக அமர வைக்குமாறு கோரினர். இந்த கோரிக்கை சபாநாயகரிடம் நிலுவையில் உள்ளது.
செப்டம்பரில், பத்தான் தேசியவாத குடிமக்கள் கட்சியின் துணைத் தலைவராக நியமிக்கப்பட்டதாக செய்திகள் வெளியாகின. அதிகம் அறியப்படாத தேசியவாத குடிமக்கள் கட்சி அமைப்பின் முதன்மை அலுவலகம், மத்திய கொல்கத்தாவிலிருந்து சுமார் 100 கி.மீ தொலைவில் உள்ள ஹவுராவில் உள்ள சங்க்ரைலில் உள்ள ஹட்காச்சாவில் உள்ள ஒரு கட்டிடத்தில் உள்ளது. இதன் தலைவர் ஜோதிபிரகாஷ் சாட்டர்ஜி ஆவார், அவரைப் பற்றி பெரிய அளவில் எதுவும் தெரியவில்லை.
இந்த ஆண்டு ஜூலை மாதம், வதோதரா மாநகராட்சி ஆணையர் அருண் மகேஷ் பாபு மறுபரிசீலனைக்காக மதிப்பீட்டு தீர்மானத்தை திரும்பப் பெற்றபோது, ’விஸ்வாமித்ரி பச்சாவ் சமிதி’ என்ற குடிமக்கள் அமைப்பு, பொது நிலங்களில் உள்ள ஆக்கிரமிப்புகளை அகற்ற கோரியது. ஏலத்திற்கு விடுவதற்கு முன்பாக பத்தானின் ஆக்கிரமிப்பை அகற்றி, நிலத்தை வதோதரா மாநகராட்சி தன்வசம் எடுக்க வேண்டும் என்று வலியுறுத்தியது.
நகர்ப்புற திட்டமிடல் நிலங்களின் தற்காலிக பயன்பாட்டிற்கு வதோதரா மாநகராட்சி நிர்ணயித்துள்ள ஒரு சதுர மீட்டருக்கு நாளொன்றுக்கு ரூ.15 என்ற வீதத்தின் அடிப்படையில், 14 ஆண்டு கால ஆக்கிரமிப்பிற்கான கட்டணம் சுமார் ரூ. 7.5 கோடியாக இருக்கலாம் என்று அந்த குழு தெரிவித்துள்ளது. இருப்பினும், இந்தத் தொகை அந்த குழுவின் சொந்த மதிப்பீடாகும், மாநகராட்சியின் அதிகாரப்பூர்வ கோரிக்கை அல்ல.
ஆக்கிரமிப்பு மற்றும் ஆக்கிரமிப்பு காலத்திற்கான கட்டணங்கள் குறித்து எந்த அறிவுறுத்தலும் வரவில்லை என்பதால் அது தனியாகக் கையாளப்படும் என்று மூத்த வதோதரா மாநகராட்சி அதிகாரி ஒருவர் தெரிவித்தார். சலுகைக் கட்டணத்தின் கீழ் பத்தான் செலுத்த வேண்டிய தொகை குறித்து அவருடன் பேச்சுவார்த்தை நடத்தப்படும் என்று அந்த அதிகாரி கூறினார்.