முதலமைச்சர் சி. ஜோசப் விஜய்யின் அலுவலகம் புனித ஜார்ஜ் கோட்டையிலிருந்து நாமக்கல் கவிஞர் மாளிகையின் 10-வது மாடிக்கு ஆகஸ்டில் மாற்றப்படுகிறது.
தமிழக அரசியல் மற்றும் நிர்வாக வரலாற்றில் ஒரு முக்கிய மைல்கல்லாக, முதலமைச்சர் சி. ஜோசப் விஜய்யின் தலைமை அலுவலகம் (CMO) புனித ஜார்ஜ் கோட்டையின் 17-ஆம் நூற்றாண்டு பாரம்பரிய முதன்மைக் கட்டிடத்திலிருந்து, நாமக்கல் கவிஞர் மாளிகை-யின் 10-வது மாடிக்கு மாற்றப்படவுள்ளது. இதற்கான கட்டமைப்பு மற்றும் நவீன உள்அலங்காரப் பணிகளை முழுவீச்சில் தொடங்கியுள்ளது. வரும் ஆகஸ்ட் மாத நடுப்பகுதியில் இந்த இடமாற்றம் அதிகாரப்பூர்வமாக நிறைவடையும் எனத் தலைமைச் செயலக வட்டாரங்கள் உறுதிப்படுத்தியுள்ளன.
60 ஆண்டுகால வரலாற்றை உடைக்கும் புதிய நகர்வு
கடந்த ஆறு தசாப்தங்களுக்கும் மேலாகத் தமிழகத்தின் முதலமைச்சர்கள் அனைவரும் கோட்டையின் பிரதான பாரம்பரிய கட்டிடத்தின் முதல் தளத்தில் இருந்தே ஆட்சிப் பொறுப்புகளைக் கவனித்து வந்தனர். அந்த நீண்டகால நடைமுறையை மாற்றி, புதிய நவீன கட்டடத் தொகுதிக்குத் தனது அலுவலகத்தை மாற்றும் முதல் முதலமைச்சர் சி. ஜோசப் விஜய் ஆவார். எனினும், குறிப்பிட்ட சில அமைச்சரவைக் கூட்டங்கள் மற்றும் முக்கிய வரலாற்று நிகழ்வுகளுக்குப் பழைய கோட்டை அறையை அவர் தொடர்ந்து பயன்படுத்துவார் என்று அதிகாரிகள் தரப்பில் கூறப்படுகிறது.
இந்த இடமாற்றத்திற்கும் ஜோதிட அல்லது ஆன்மீக நம்பிக்கைகளுக்கும் எந்தச் சம்பந்தமும் இல்லை என்றும் மற்றொரு பக்கம் இது முழுக்க முழுக்க நிர்வாகச் சீர்திருத்த நடவடிக்கை மட்டுமே என்றும் தகவல்கள் பேசி வருகின்றன.
கடலை நோக்கிய அதிநவீன அலுவலகம்
1975-ல் கட்டப்பட்ட 10 மாடி அனெக்ஸ் கட்டிடமான நாமக்கல் கவிஞர் மாளிகை, தற்போது 34 அரசுத் துறைகளின் முதன்மைச் செயலாளர்களின் அலுவலகங்களை உள்ளடக்கிய முக்கிய நிர்வாக மையமாகும். இதன் 10-வது மாடியில் இதுவரை மாவட்ட ஆட்சியர்கள் மற்றும் காவல் கண்காணிப்பாளர்களுடனான வருடாந்திர மாநாடுகள் நடத்தப்பட்டு வந்தன.தற்போது அந்தப் பெரிய மாநாட்டு அரங்கம் மற்றும் உணவருந்தும் கூடம் ஆகியவை சர்வதேசத் தரத்திலான முதலமைச்சர் அலுவலகமாக மறுவடிவமைப்பு செய்யப்பட்டு வருகின்றன. முதலமைச்சர், அவரது முதன்மைச் செயலாளர்கள் மற்றும் முக்கிய ஆலோசகர்கள் அனைவரும் ஒரே தளத்தில் அமர்ந்து தடையின்றி ஆலோசனைகளை மேற்கொள்ளும் வகையில் இது அமையவுள்ளது. மேலும், இந்தத் தளம் வங்காள விரிகுடாவின் அழகிய கடல் காட்சியைக் (Sea-facing view) தடையின்றி பார்க்கும் வசதியையும் கொண்டுள்ளது.
Source link