பரபரப்பான அரசியல் சூழல் : நாடாளுமன்ற மழைக்கால கூட்டத்தொடர் இன்று தொடக்கம்!

பரபரப்பான அரசியல் சூழ்நிலையில், நாடாளுமன்றத்தின் மழைக்காலக் கூட்டத்தொடர் இன்று (20.07.2026) காலை 11 மணிக்கு தொடங்க உள்ளது. நாடாளுமன்ற விவகாரங்கள் துறை அமைச்சர் கிரண் ரிஜிஜூஅறிவித்தபடி, இந்த மழைக்காலக் கூட்டத்தொடர் ஆகஸ்ட் 13 வரை மொத்தம் 25 நாட்களில் 19 அமர்வுகளாக நடைபெறத் திட்டமிடப்பட்டுள்ளது. இந்தத் தொடரில், தேசிய கௌரவத்திற்கு அவமதிப்பு தடுப்பு திருத்த மசோதா, பிறப்பு மற்றும் இறப்பு பதிவு திருத்த மசோதா, வருமான வரி திருத்த மசோதா, உச்ச நீதிமன்ற நீதிபதிகள் எண்ணிக்கை திருத்த மசோதா உள்ளிட்ட முக்கிய 8 மசோதாக்களைத் தாக்கல் செய்ய மத்திய அரசு திட்டமிட்டுள்ளது. 

மேலும், நாடாளுமன்றத்தின் இரு அவைகளின் கண்ணியத்தையும் பாதுகாப்பையும் காக்கும் வகையில், நாடாளுமன்ற உறுப்பினர்கள் அவைக்குள் ஸ்மார்ட் வாட்ச், ஸ்மார்ட் கண்ணாடிகள் மற்றும் பேனா வடிவிலான கேமராக்கள் போன்ற மின்னணு சாதனங்களைப் பயன்படுத்த நாடாளுமன்றச் செயலகம் அதிரடித் தடை விதித்துள்ளது. நாடாளுமன்றத்தின் இரு அவைகளிலும் ஆக்கப்பூர்வமான விவாதங்கள் நடைபெற அனைத்துக் கட்சிகளும் முழு ஒத்துழைப்பு நல்க வேண்டும் எனப் பிரதமர் நரேந்திர மோடி கேட்டுக்கொண்டுள்ளார்.

அதே சமயம், நீட் தேர்வு வினாத்தாள் கசிவு விவகாரம், அயோத்தி ராமர் கோவில் நன்கொடை முறைகேடு புகார்கள் மற்றும் சோனம் வாங்சுக்கின் உண்ணாவிரதப் போராட்டம் போன்ற பல்வேறு முக்கிய விவகாரங்களை எதிர்க்கட்சிகள் எழுப்ப உள்ளதாக தகவல் வெளியாகியுள்ளது. முன்னதாக நேற்று (19.07.2026) பாதுகாப்புத்துறை அமைச்சர் ராஜ்நாத் சிங் தலைமையில் நடைபெற்ற அனைத்துக்கட்சிக் கூட்டத்தில், திரிணாமுல் காங்கிரஸ் கட்சியின் அதிருப்தி எம்பிக்கள் அடங்கிய குழுவிற்கு அழைப்பு விடுக்கப்பட்டதைக் கண்டித்து காங்கிரஸ், திமுக உள்ளிட்ட இந்தியா கூட்டணிக் கட்சிகள் கூட்டாக வெளிநடப்பு செய்தது குறிப்பிடத்தக்கது.