பிரபல நடிகை சமந்தா ரூத் பிரபு, சமையல் கலை சார்ந்த ‘செலிபிரிட்டி மாஸ்டர் செஃப் தமிழ்’ நிகழ்ச்சியில் பங்கேற்றபோது, தனது பள்ளிப்பருவ உணவக நினைவுகளை நினைவுகூர்ந்து உணர்ச்சிவசப்பட்டார். பல்லாவரத்தில் அமைந்துள்ள ‘துர்கா ஹோட்டல்’ மற்றும் அங்கு அவர் சுவைத்த தயிர் வடை பற்றிய நினைவுகள் தான் அவரை இந்த அளவுக்கு நெகிழ வைத்துள்ளது.
நிகழ்ச்சியின் போது தனது குழந்தை பருவ அனுபவங்களை மீட்டெடுத்த சமந்தா, “பல்லாவரம் துர்கா ஹோட்டலில் கிடைக்கும் தயிர் வடையின் சுவை என்னுடைய மறக்க முடியாத மிக முக்கியமான நினைவுகளில் ஒன்று” என்று குறிப்பிட்டார். நிகழ்ச்சியில், கண்களை மூடிக்கொண்டு தனது பள்ளிப் பருவத்திற்கே மீண்டும் சென்று, அந்த ஓட்டலுக்குள் நுழைவது போல் கற்பனை செய்து பார்க்குமாறு அவரிடம் கேட்டுக்கொள்ளப்பட்டது. அப்போது, எளிய மனிதர்களோடு கழிந்த அந்தப் பழைய நாட்களும், அந்த உணவின் சுவையும் அவருடைய மனதில் தோன்றி, அவரை அழ வைக்கும் அளவுக்கு நெகிழச் செய்தது.
நாம் உண்ணும் உணவு வெறும் பசியைத் தீர்ப்பது மட்டுமல்லாமல், நமது வாழ்வின் பல உணர்ச்சிகரமான நினைவுகளோடு பிணைக்கப்பட்டுள்ளது என்பதை இந்நிகழ்வு வெளிப்படுத்தியது. ஒரு குறிப்பிட்ட உணவின் சுவை, நமது குழந்தைப்பருவம், குடும்பத்தினர், நண்பர்கள் மற்றும் நம் வாழ்க்கையைச் செதுக்கிய இடங்களை மீண்டும் நம் கண்முன்னே கொண்டுவந்து நிறுத்திவிடும் வல்லமை கொண்டது என்பதற்கு சமந்தாவின் இந்த அனுபவமே சான்றாகும்.
திரைத்துறை பிரபலங்கள் பலர் கலந்துகொண்டு தங்களது சமையல் திறமையையும், படைப்பாற்றலையும் வெளிப்படுத்தும் வகையில் இந்த ‘செலிபிரிட்டி மாஸ்டர்செஃப் தமிழ்’ போட்டி அமைக்கப்பட்டுள்ளது. இதில் நடுவர்களாக நடிகை சமந்தா ரூத் பிரபுவுடன் இணைந்து பிரபல சமையல் வல்லுநர்கள் வெங்கடேஷ் பட், சசி செல்லையா மற்றும் ஸ்ரேயா அத்கா ஆகியோர் பங்கேற்றுள்ளனர். இந்த நிகழ்ச்சியை ஆர்.ஜே. விஜய் தொகுத்து வழங்குகிறார்.
போட்டியாளர்களின் சமையல் திறமையை சோதிப்பது மட்டுமின்றி, உணவுடன் தொடர்புடை அவர்களின் தனிப்பட்ட வாழ்க்கைப் பயணத்தையும் இந்த நிகழ்ச்சி வெளிச்சம்போட்டுக் காட்டுகிறது. அந்த வகையில், பல்லாவரம் துர்கா ஹோட்டல் பற்றிய சமந்தாவின் இந்த நெகிழ்ச்சியான பகிர்வு, ரசிகர்களின் மனதைத் தொடுவதோடு நிகழ்ச்சிக்கும் ஒரு புதிய பரிமாணத்தைச் சேர்த்துள்ளது.