எழுதியவர்: அலோக் சிங்
பிரதமர் நரேந்திர மோடிக்கு எதிராக சமூக வலைதளங்களில் அவதூறான மற்றும் சட்டவிரோதமான பதிவுகளைப் பதிவிட்டவர்கள் மீது டெல்லி காவல்துறை வழக்குப்பதிவு செய்து நடவடிக்கை எடுத்து வருகிறது. மேலும், சர்ச்சைக்குரிய பதிவுகள் மற்றும் வீடியோக்களை தங்களின் தளத்திலிருந்து உடனடியாக நீக்குமாறு ‘எக்ஸ்’ (முன்னாள் ட்விட்டர்) நிறுவனத்திற்கு டெல்லி காவல்துறை உத்தரவிட்டுள்ளது.
ஜந்தர் மந்தரில் நடைபெற்ற ‘காக்ரோச் ஜனதா கட்சி’ (CJP) போராட்டத்தின் போது பிரதமர் மோடியைக் குறிவைத்து இதுபோன்ற அவதூறு பதிவுகள் வெளியிடப்பட்டதாக டெல்லி காவல்துறை வட்டாரங்கள் தெரிவித்துள்ளன. இது தொடர்பாக டெல்லி காவல்துறையின் சிறப்புப் பிரிவான ஐ.எஃப்.எஸ்.ஓ. (Intelligence Fusion and Strategic Operations) பிரிவில் குற்றவியல் அச்சுறுத்தல், பொதுமக்களுக்கு இடையூறு விளைவித்தல் மற்றும் அவதூறு பரப்புதல் ஆகிய பிரிவுகளின் கீழ் எஃப்.ஐ.ஆர். பதிவு செய்யப்பட்டுள்ளது.
காவல்துறையின் நோட்டீஸ்
சமூக வலைதள நிறுவனங்களுக்கு டெல்லி காவல்துறை அனுப்பியுள்ள நோட்டீஸில்:
“பிரதமரின் கண்ணியம், நற்பெயர் மற்றும் பொதுப் பிம்பத்திற்கு பெரும் பாதிப்பை ஏற்படுத்தும் வகையில் இந்த அவதூறு பதிவுகள் அமைந்துள்ளன. இதுபோன்ற கருத்துக்கள் தொடர்ந்து சமூக வலைதளங்களில் இருப்பது பொது அமைதியைச் சீர்குலைக்கவும், தேவையற்ற அரசியல் சர்ச்சைகளை உருவாக்கவும் வாய்ப்புள்ளது.
சம்பந்தப்பட்ட கணக்குகள் மற்றும் அவதூறு பதிவுகளின் இணைய முகவரிகளை (URLs) நோட்டீஸ் கிடைத்த 3 மணி நேரத்திற்குள் உடனடியாக நீக்க அல்லது முடக்க வேண்டும்.
ஆசட்டப்பூர்வ விசாரணைக்காக பயனர்களின் பதிவு விவரங்கள், லாக் டேட்டாக்கள் (Subscriber information & logs) ஆகியவற்றைப் பாதுகாத்து வைக்க வேண்டும்” என்று தெரிவிக்கப்பட்டுள்ளது.
போராட்டம் தொடர்பாக போலி (Deepfake) மற்றும் செயற்கை நுண்ணறிவு (AI) தொழில்நுட்பத்தைப் பயன்படுத்தி உருவாக்கப்பட்ட வீடியோக்களைப் பகிர்ந்த சுமார் 500 சமூக வலைதளக் கணக்குகளைக் காவல்துறை அடையாளம் கண்டுள்ளது. அந்த கணக்குகளை முடக்குவதற்குச் அந்தந்த சமூக வலைதள நிறுவனங்களுக்குப் பரிந்துரை செய்யப்பட்டுள்ளது.
பின்னணி
நீட் தேர்வு வினாத்தாள் கசிவு புகார்களைத் தொடர்ந்து, மத்திய கல்வி அமைச்சர் தர்மேந்திர பிரதான் ராஜினாமா செய்ய வேண்டும் என்ற கோரிக்கையை அரசு ஏற்றுக்கொண்டதைத் தொடர்ந்து, 36 நாட்களாக நடைபெற்று வந்த போராட்டத்தை சி.ஜே.பி (CJP) ஜூலை 25 அன்று திரும்பப் பெற்றது.
முன்னதாக ஜூலை 20 அன்று டெல்லி காவல் துறையினருக்கும் மாணவர்களுக்கும் இடையே ஏற்பட்ட மோதலில் இருதரப்பிலும் சிலர் காயமடைந்தனர். வன்முறை தொடர்பாக பதிவு செய்யப்பட்ட 15 எஃப்.ஐ.ஆர்-களைப் திரும்பப் பெற காவல்துறை முடிவெடுத்த போதிலும், இதன் பின்னணியில் ஏதேனும் பெரிய சதித்திட்டம் உள்ளதா என்பது குறித்து தொடர்ந்து விசாரணை நடத்தி வருகிறது.