சென்னை மெட்ரோ ரயில் கட்டம் 2 திட்டத்தின் கீழ், பூந்தமல்லி முதல் வடபழனி வரையிலான பாதையில் அமைந்துள்ள 6 மெட்ரோ ரயில் நிலையங்களின் கட்டுமானப் பணிகள் முடிவடைவதில் மீண்டும் தாமதம் ஏற்பட்டுள்ளதாக தி இந்து தெரிவித்துள்ளது. நிர்ணயிக்கப்பட்ட கெடு முடிந்து சுமார் பத்து மாதங்கள் கடந்த நிலையிலும், இப்பணிகள் முழுமையடையாததால் இவை திறக்கப்படும் காலம் மார்ச் 2027 வரை தள்ளிப்போக வாய்ப்புள்ளது.
ஆலப்பாக்கம், காரம்பாக்கம், வளசரவாக்கம், ஆழ்வார்திருநகர், சாலிகிராமம் வேர்ஹவுஸ் மற்றும் சாலிகிராமம் ஆகிய இந்த ஆறு நிலையங்களின் பணிகள் காலதாமதமாகி வருவதால், ஆற்காடு சாலை வழியே மெட்ரோ ரயில்கள் இயக்கப்பட்டபோதிலும் அப்பகுதி மக்களின் பயன்பாட்டிற்கு அவை இன்னும் வரவில்லை. இதன் காரணமாக, அப்பகுதியில் வாழும் ஆயிரக்கணக்கான பயணிகள் தங்கள் வீட்டிற்கு அருகிலேயே மெட்ரோ சேவையை உடனடியாகப் பெற முடியாமல் சிரமத்திற்குள்ளாகியுள்ளனர்.
இந்த தாமதத்தின் விளைவாக, போரூர் – வடபழனி இடையிலான மெட்ரோ ரயில் பாதைக்கு ரயில்வே பாதுகாப்பு ஆணையர் (CRS) வழங்கிய ‘தற்காலிக அனுமதியை’ (provisional authorisation) மேலும் நீட்டிக்க சென்னை மெட்ரோ ரயில் நிறுவனம் (CMRL) விண்ணப்பிக்க திட்டமிட்டுள்ளது. முன்னதாக, பூந்தவல்லி – போரூர் பாதையை ஆய்வு செய்த ஆணையர், அதற்கு வேகக் கட்டுப்பாடுகள் எதுவும் இன்றி முழு அனுமதி அளித்திருந்தார். அதேவேளையில், போரூர் – வடபழனி பாதைக்கு அக்டோபர் 31, 2026 வரை மட்டுமே செல்லுபடியாகும் வகையில், மணிக்கு 40 கி.மீ வேகத்தில் ரயில்களை மேனுவல் முறையில் இயக்குவதற்கான தற்காலிக அனுமதியையே வழங்கி இருந்தார். நிலுவையில் உள்ள அனைத்துப் பணிகளையும் முடித்த பிறகே நிரந்தர அனுமதி பெற அணுக வேண்டும் என ஆணையர் உத்தரவிட்டிருந்த நிலையில், பணிகள் முடிவடையாததால் இந்த அனுமதியை மார்ச் 2027 வரை நீட்டிக்க மெட்ரோ நிர்வாகம் நடவடிக்கை எடுத்து வருகிறது.
இந்த காலதாமதம் குறித்து விளக்கமளித்துள்ள சென்னை மெட்ரோ ரயில் அதிகாரிகள், கடந்த மார்ச் முதல் ஜூன் வரையிலான தேர்தல் காலத்தில் கடுமையான தொழிலாளர்கள் பற்றாக்குறை நிலவியதாகவும், அதன் பிறகே பணியாளர்களின் எண்ணிக்கை அதிகரித்து பணிகள் தீவிரமடைந்துள்ளதாகவும் தெரிவித்துள்ளனர். மேலும், ஆலப்பாக்கம் மற்றும் ஆழ்வார்திருநகர் இடையே வழித்தடம் 4 மற்றும் வழித்தடம் 5 ஆகிய இரண்டும் ஒன்றுக்கு மேல் ஒன்றாகச் செல்லும் ‘டபுள் டெக்கர்’ அமைப்பாக உருவாக்கப்படுவதால், பிளாட்பாரம் மற்றும் கான்கோர்ஸ் பகுதிகளை அமைப்பது மிகவும் சவாலான காரியமாக இருந்ததாகவும் குறிப்பிட்டுள்ளனர்.
தற்போது பிளாட்பாரம் அமைக்கும் பணிகள் சுமார் 95 சதவீதம் வரை நிறைவடைந்துள்ளதாகவும், நுழைவு மற்றும் வெளியேறும் பகுதிகள் மற்றும் கான்கோர்ஸ் அமைக்கும் பணிகள் விரைவுபடுத்தப்பட்டு வருவதாகவும் அதிகாரிகள் கூறுகின்றனர். வரும் ஜனவரி மாதத்திற்குள் அனைத்து கட்டுமானப் பணிகளும் முடிவடையும் பட்சத்தில், சிக்னல் பணிகளை முடிப்பதற்கு மேலும் இரண்டு மாதங்கள் தேவைப்படும் என ஒரு அதிகாரி தெரிவித்துள்ளார்.
இருப்பினும், தற்போதைய கள நிலவரப்படி மார்ச் 2027-க்குள் சிக்னல் பணிகளை முழுமையாக முடிப்பது கடினம் என்றும், இதன் காரணமாக இந்த 6 மெட்ரோ ரயில் நிலையங்கள் பயன்பாட்டிற்கு வருவது மேலும் தள்ளிப்போகக்கூடும் என்றும் மெட்ரோ ரயில் துறை சார்ந்த வட்டாரங்கள் தெரிவிக்கின்றன.