முதலமைச்சர் விஜய் சமூகநீதி விடுதியில் திடீர் ஆய்வு செய்து, மாணவர்களின் புகார்களை ஏற்று தரமான உணவு மற்றும் மைதானத்தை திறக்க 12 மணி நேரத்தில் அதிரடி உத்தரவிட்டார்.
தமிழக முதலமைச்சர் சி. ஜோசப் விஜய் (C. Joseph Vijay) சென்னை சைதாப்பேட்டையில் உள்ள சமூகநீதி மாணவர் விடுதியில் மேற்கொண்ட திடீர் கள ஆய்வின் எதிரொலியாக, அதிகாரிகளுக்குப் பல்வேறு அதிரடி உத்தரவுகளைப் பிறப்பித்துள்ளார். மாணவர்களின் அடிப்படை வசதிகள் மற்றும் உணவுப் புகார்களுக்கு அடுத்த சில மணி நேரங்களிலேயே தீர்வு காணப்பட்டுள்ளது பெரும் வரவேற்பைப் பெற்றுள்ளது.
முன்னறிவிப்பின்றி நுழைந்த முதலமைச்சர்: வாத்தி ரெய்டு
தமிழகத்தில் உள்ள அரசு நல விடுதிகளின் தரம் மற்றும் செயல்பாடுகளை மேம்படுத்த முதலமைச்சர் விஜய் பல்வேறு துறைகளின் கீழ் தொடர் ஆய்வுகளை மேற்கொண்டு வருகிறார். இதன் ஒரு பகுதியாக, நேற்று மாலை சென்னை சைதாப்பேட்டையில் உள்ள எம்.சி. ராஜா சமூகநீதி கல்லூரி மாணவர் விடுதிக்கு (M.C. Raja Social Justice Hostel) எந்தவித முன் அறிவிப்புமின்றி முதலமைச்சர் திடீரென நேரில் சென்றார்.விடுதியின் சமையலறை, உணவுக் கூடம், தங்கும் அறைகள் மற்றும் கழிவறைகளை நேரடியாகப் பார்வையிட்ட அவர், அங்கிருந்த மாணவர்களிடம் அங்குள்ள வசதிகள் குறித்துக் கேட்டறிந்தார்.
முதலமைச்சரின் இந்த அதிரடி விசிட், சமூக ஊடகங்களில் அவரது ரசிகர்கள் மற்றும் பொதுமக்களால் ‘ரியல் வாத்தி ரெய்டு’ (Real Vaathi Raid) எனப் பாராட்டப்பட்டு வருகிறது.
மாணவர்கள் அடுக்கிய அடுக்கடுக்கான புகார்கள்
10 அடுக்கு மாடிகளைக் கொண்ட இந்த நவீன விடுதி வளாகத்தில், தங்களுக்குப் பல அடிப்படை வசதிகள் மறுக்கப்படுவதாக முதலமைச்சரிடம் மாணவர்கள் நேரடியாகக் புகார் அளித்தனர்.
மாணவர்கள் முன்வைத்த முக்கியப் பிரச்சினைகள்
விடுதியில் வழங்கப்படும் உணவின் தரம் மிக மோசமாக இருப்பதாகவும், சாதம் மற்றும் சாம்பாரில் அடிக்கடி புழுக்கள் மற்றும் பூச்சிகள் கிடப்பதாகவும் மாணவர்கள் குற்றம் சாட்டினர். காலையில் வழங்கப்பட்டு வந்த இட்லி, சப்பாத்தி போன்ற சத்தான உணவுகள் நிர்வாகக் காரணங்களால் திடீரென நிறுத்தி வைக்கப்பட்டிருந்தன. பல லட்சம் செலவில் கட்டி முடிக்கப்பட்ட கைப்பந்து (Volleyball) மைதானம் திறக்கப்படாமல் மாணவர்களின் பயன்பாட்டுக்கு வராமல் பூட்டியே வைக்கப்பட்டிருந்தது. UPSC மற்றும் TNPSC போன்ற போட்டித் தேர்வுகளுக்குப் படிக்கும் மாணவர்கள் மற்றும் பகுதிநேர வேலைக்குச் செல்லும் மாணவர்கள் இரவு 9:30 மணிக்கு மேல் வந்தால் விடுதிக்குள் அனுமதிக்கப்படுவதில்லை. இதனால் அவர்கள் பூங்காக்களிலும் வெளியிலும் படுக்கும் அவலநிலை நீடித்தது. விடுதிக்குத் தேவையான 64 சிசிடிவி (CCTV) கேமராக்களில் ஒரு சில மட்டுமே இயங்குவதாகவும், போதிய குடிநீர் மற்றும் தூய்மையான கழிவறை வசதிகள் இல்லை என்றும் கூறினர்.
12 மணி நேரத்தில் பாய்ந்த அதிரடி உத்தரவுகள்
மாணவர்களின் குறைகளைக் கேட்டறிந்த முதலமைச்சர் விஜய், தன் முன்னிலையிலேயே அதிகாரிகளை அழைத்து உடனடியாக நடவடிக்கை எடுக்க உத்தரவிட்டார். அதன் தொடர்ச்சியாக இன்று வெளியிடப்பட்டுள்ள அதிகாரப்பூர்வ அறிவிப்புகள்
மாணவர்களின் ஆரோக்கியத்தை உறுதி செய்யும் வகையில் விடுதியின் தினசரி மெனு (Food Menu) உடனடியாக மாற்றியமைக்கப்பட்டு, தரமான உணவு வழங்க உத்தரவிடப்பட்டுள்ளது. தற்காலிகமாக நிறுத்தி வைக்கப்பட்டிருந்த இட்லி மற்றும் சப்பாத்தி உணவுகள் இன்று முதல் மீண்டும் மாணவர்களுக்குத் தடையின்றி வழங்கத் தொடங்கப்பட்டுள்ளன. கட்டி முடிக்கப்பட்டுப் பயன்பாடின்றி இருந்த கைப்பந்து விளையாட்டு மைதானம் உடனடியாக மாணவர்கள் விளையாடுவதற்காகத் திறந்து விடப்பட்டுள்ளது. விடுதி வளாகத்தின் பாதுகாப்பை பலப்படுத்த 70-க்கும் மேற்பட்ட புதிய CCTV கேமராக்களைப் பொருத்தவும், தூய்மையான குடிநீர் மற்றும் கழிவறை வசதிகளைப் போர்க்கால அடிப்படையில் சீரமைக்கவும் முதல்வர் ஆணையிட்டுள்ளார்.
அமைச்சர்கள் மற்றும் அதிகாரிகள் நேரில் ஆய்வு
இந்த ஆய்வின் போது முதலமைச்சருடன் சமூகநீதித் துறை அமைச்சர் வன்னி அரசு, மற்றும் துறை சார்ந்த உயர் அதிகாரிகள் உடனிருந்தனர்.ஆய்வுக்குப் பின் செய்தியாளர்களிடம் பேசிய அமைச்சர் வன்னி அரசு, தமிழக வரலாற்றிலேயே ஒரு முதலமைச்சர் நேரடியாக மாணவர் விடுதியின் கழிவறை மற்றும் சமையலறை வரை சென்று ஆய்வு செய்வது இதுவே முதல்முறை. மாணவர்களின் அனைத்து நியாயமான கோரிக்கைகளும் உடனடியாக நிறைவேற்றப்படும் எனத் தெரிவித்தார்.முதலமைச்சர் விஜய்யின் இந்த அதிரடி நடவடிக்கை, தமிழகத்தில் உள்ள மற்ற அரசு மற்றும் சமூகநல விடுதி நிர்வாகங்கள் மத்தியிலும் பெரும் எச்சரிக்கையையும், சுறுசுறுப்பையும் ஏற்படுத்தியுள்ளது.
Source link