நடிகர் ராகவா லாரன்ஸ் தனிக்கட்சி தொடங்கப்போகிறார் என்ற தகவல் தற்போது அரசியல் வட்டாரத்தில் பரபரப்பாக பேசப்பட்டு வருகிறது.
முதலமைச்சர் ஜோசப் விஜய்யின் தமிழக வெற்றிக் கழகத்தில் (தவெக) ராகவா லாரன்ஸ் அதிகாரப்பூர்வமாக இணைவார், வரவிருக்கும் திருச்சி கிழக்கு தொகுதி சட்டமன்ற இடைத்தேர்தலில் தவெக வேட்பாளராக அவரே களம் இறங்குவார் என்றெல்லாம் அரசியல் வட்டாரங்களில் மிகத் தீவிரமாகப் பேசப்பட்டு வந்தது. ஆனால், அந்த எதிர்பார்ப்புகளை எல்லாம் சுக்குநூறாக உடைக்கும் வகையில், லாரன்ஸ் தனியாகக் கட்சி தொடங்கும் பணிகளில் தீவிரமாக இறங்கியுள்ளதாகத் தகவல்கள் கசிந்துள்ளன.
தவெக-வில் இணைவார் என்ற எதிர்பார்ப்பு… திடீரென மாறியது எப்படி?
கடந்த சில வாரங்களாகவே ராகவா லாரன்ஸ் தவெக-வில் இணைவது கிட்டத்தட்ட உறுதி என்றே பலராலும் நம்பப்பட்டது. அதற்கு முக்கியக் காரணம், முதலமைச்சர் விஜய் மீது அவர் கொண்டுள்ள அலாதியான நட்பும், விஜய்யின் அதிரடி அரசியல் வெற்றியை லாரன்ஸ் தனது தாயாருடன் சேர்ந்து மனதாரப் பாராட்டியதும்தான். “மக்களுக்கு நல்லது செய்ய நினைக்கும் ஒரு நல்ல மனிதர் அரசியலுக்கு வந்து சாதித்துக் காட்டியுள்ளார்” என்று தனது சமூக வலைத்தளப் பக்கங்களில் வீடியோ வெளியிட்டு விஜய்யை உச்சிமுகர்ந்தார் லாரன்ஸ். இதனால், விஜய் தனது தவெக-வின் முக்கிய முகமாக லாரன்ஸை முன்னிறுத்துவார் என்றும், திருச்சி கிழக்கு இடைத்தேர்தலில் அவர்தான் தவெக-வின் ட்ரம்ப் கார்டு என்றும் செய்திகள் தீயாய் பரவின.
தனிக்கட்சித் திட்டம்: திரைமறைவில் நடக்கும் தீவிரப் பணிகள்
இப்படியான சூழலில் தான், நான் தவெக-வில் இணையப்போவதில்லை; எனக்கென ஒரு தனிப் பாதையை உருவாக்கப் போகிறேன் என்பது போன்ற நகர்வுகளை லாரன்ஸ் எடுத்து வருவதாகத் தகவல்கள் வெளியாகியுள்ளன.
ஏன் இந்தத் திடீர் மாற்றம்?
லாரன்ஸ் பல வருடங்களாகத் தனது அறக்கட்டளை (Trust) மூலம் ஏழை எளிய மக்களுக்கு, மாற்றுத்திறனாளிகளுக்குப் பல மருத்துவ மற்றும் கல்வி உதவிகளைச் செய்து வருகிறார். இந்தச் சமூக சேவைகளை ஒரு அரசியல் சக்தியாக மாற்றி, தனது சொந்த அடையாளத்துடன் மக்களிடம் செல்ல அவர் விரும்புவதாகக் கூறப்படுகிறது.
விஜய்யின் அரசியல் தர்மத்திற்கு மதிப்பளிப்பு
விஜய் ஏற்கனவே கட்சிக்காக உழைத்த பல நிர்வாகிகளை வைத்துள்ளார். நான் திடீரென உள்ளே வந்து ஒரு முக்கியப் பதவியையோ அல்லது இடைத்தேர்தல் சீட்டையோ வாங்குவது முறையல்ல என்று லாரன்ஸ் தனது நெருங்கிய வட்டாரங்களில் குறிப்பிட்டதாகத் தெரிகிறது.