நாடு தழுவிய மக்கள்தொகை கணக்கெடுப்பின் பகுதிக்கு இன்னும் ஆறு மாதங்களே உள்ள நிலையில், அதில் சாதி விவரங்களை எவ்வாறு சேகரிப்பது என்பதற்கான வழிமுறைகள் குறித்து இந்தியாவின் பதிவாளர் ஜெனரல் தீவிரமாக ஆராய்ந்து வருகிறார். இதற்காக இரண்டு முக்கிய முறைகள் பரிசீலனையில் உள்ளதாகத் தகவல்கள் தெரிவிக்கின்றன. முதலாவது, பொதுமக்கள் தங்களின் சாதியை தாங்களாகவே குறிப்பிடும் சுய அறிவிப்பு முறை (Open-ended format); இரண்டாவது, அங்கீகரிக்கப்பட்ட சாதிகளின் பட்டியலைக் கொண்ட ‘டிராப்-டவுன்’ (Drop-down menu) மெனு முறை ஆகும்.
முதல் முறையைப் பின்பற்றினால், 2011-ஆம் ஆண்டின் சமூகப் பொருளாதார மற்றும் சாதி கணக்கெடுப்பில் (SECC) ஏற்பட்ட அதே சிக்கல் மீண்டும் எழக்கூடும். அப்போது பொதுமக்கள் தாங்களாகவே பெயர்களைக் குறிப்பிட்டதால் 46 லட்சத்திற்கும் அதிகமான வெவ்வேறான சாதிப் பெயர்கள் பதிவாகின. அதே நேரத்தில், இரண்டாவது முறையான ‘டிராப்-டவுன்’ மெனு முறைக்கு ஆர்.எஸ்.எஸ் (RSS) அமைப்பிடம் இருந்து எதிர்ப்பு கிளம்பியுள்ளது. தற்போதைய சாதிப் பட்டியல்களின் அடிப்படையில் அமைந்த டிராப்-டவுன் மெனுவைப் பயன்படுத்துவது, பிரிட்டிஷ் ஆட்சிக் காலத்தில் கட்டமைப்பு செய்யப்பட்ட சாதி அமைப்பை மேலும் உறுதிப்படுத்துவதாக அமைந்துவிடும் என்று சங் பரிவார் கருதுகிறது.
இது குறித்து அரசு தரப்பு அதிகாரி ஒருவர் கூறுகையில், “இது மிகவும் கடினமான ஒரு பணி. பல ஆலோசனைகளும் எதிர்ப்புகளும் வந்துள்ளன; அவை அனைத்தும் பரிசீலிக்கப்பட்டு வருகின்றன. 2011-ஆம் ஆண்டின் விளைவு மீண்டும் ஏற்படாமல் இருக்கவும், சுய அறிவிப்பு முறை உட்படப் பல வழிமுறைகள் சோதிக்கப்பட்டு வருகின்றன. சாதி என்பது உணர்வுபூர்வமான விஷயம் என்பதால், இதில் ஏற்படும் சிறு தவறும் தீவிர அரசியல் தாக்கங்களை ஏற்படுத்தும்,” என்று தெரிவித்துள்ளார். சாதி கணக்கெடுப்பானது அடுத்த ஆண்டின் தொடக்கத்தில் தொடங்கவுள்ள மக்கள்தொகை கணக்கெடுப்பு கட்டத்துடன் இணைந்தே நடைபெறும்.
2011 எஸ்.இ.சி.சி கணக்கெடுப்பில் தரவுகளின் போதிய தரமின்மை, தரப்படுத்தப்பட்ட சாதிப் பதிவேடு இல்லாமை மற்றும் செயல்பாட்டு வடிவமைப்பில் இருந்த குறைபாடுகள் காரணமாகப் பயன்படக்கூடிய சாதித் தரவுகள் கிடைக்கவில்லை. சரிபார்ப்பு இன்றி பொதுமக்கள் சுய அறிவிப்பாகச் சாதிப் பெயர்களைப் பதிவு செய்ய அனுமதிக்கப்பட்டதால், நிர்வாக ரீதியாகப் பெரும் குழப்பம் ஏற்பட்டது. 1931-இல் நடத்தப்பட்ட விரிவான சாதி கணக்கெடுப்பில் 4,147 சாதிகள் மட்டுமே பதிவாகியிருந்த நிலையில், 2011-இல் சுமார் 46.7 லட்சம் வெவ்வேறான சாதிப் பெயர்கள் பதிவாகின. இதனால் மத்திய அரசு இறுதியில் அந்தத் தரவுகளை வெளியடாமல் நிறுத்தி வைத்தது.
தற்போது பரிசீலனையில் உள்ள ‘டிராப்-டவுன்’ மெனு திட்டத்தின்படி, மத்திய மற்றும் மாநில அரசுகளின் சாதிப் பட்டியல்கள் ஒருங்கிணைக்கப்படும். பல மாநிலங்கள் மத்திய பட்டியலிலிருந்து மாறுபட்ட சொந்த இதர பிற்படுத்தப்பட்ட வகுப்பினர் (OBC) மற்றும் பிற சாதிப் பட்டியல்களைப் பராமரித்து வருகின்றன. தற்போது, மக்கள்தொகை கணக்கெடுப்பில் பட்டியல் சாதிகள் (SC) மற்றும் பட்டியல் பழங்குடியினருக்கு (ST) மட்டுமே சாதி விவரங்கள் சேகரிக்கப்படுகின்றன. கணக்கெடுப்பு செயலி ஏற்கெனவே அறிவிக்கப்பட்ட SC மற்றும் ST சமூகங்களுக்கு ஒரு ‘டிராப்-டவுன்’ மெனுவைக் கொண்டுள்ளது, மற்ற அனைவரும் ‘இதர பிரிவினர்’ (Others) என்றே பதிவு செய்யப்படுகின்றனர்.
புதிய திட்டத்தின் கீழ், தனி ஒ.பி.சி பிரிவு உருவாக்கப்படும் அல்லது மத்திய, மாநிலப் பட்டியல்களில் இருந்து தயாரிக்கப்பட்ட விரிவான டிராப்-டவுன் மெனு மூலம் அனைத்து சாதிகளும் ‘இதர பிரிவினர்’ என்பதன் கீழ் பட்டியலிடப்படும். ஆர்.ஜி.ஐ அதன் பின்புலத் தரவுத்தளத்தின் மூலம் ஒவ்வொரு சாதியையும் உரிய வகைப்பாட்டுடன் இணைக்கும்.
ஆனால், இந்த நடைமுறை குறித்து ஆர்.எஸ்.எஸ் நிர்வாகி ஒருவர் தனது கவலையைத் தெரிவித்துள்ளார். “இன்று நம்மிடம் இருப்பது பெரும்பாலும் ஆங்கிலேயர்களால் உருவாக்கப்பட்டு சட்டப்பூர்வமாக்கப்பட்ட சாதி அமைப்பாகும். கணக்கெடுப்பு அந்தப் பட்டியல்களையே நம்பியிருந்தால், இந்திய சமூகத்தைப் பிரித்து வைக்கக் காலனித்துவ நிர்வாகத்தால் திட்டமிட்டுப் பயன்படுத்தப்பட்ட ஒரு அமைப்பை அது மேலும் வலுப்படுத்துவதாகவே முடியும்,” என்று அவர் குறிப்பிட்டுள்ளார். இந்தியாவில் சாதி அடையாளங்கள் நிலவியபோதிலும், நெகிழ்வுத்தன்மையுடனும் உள்ளூர் அளவிலும் இருந்த சமூக அடையாளங்களைப் பிரிட்டிஷ் கணக்கெடுப்பு நடவடிக்கைகள் கடினமான, சட்டப்பூர்வ அங்கீகாரம் பெற்ற பிரிவுகளாக மாற்றின என்பது ஆர்.எஸ்.எஸ்-ன் நீண்டகால வாதமாகும். இதன் மூலம் மீண்டும் மீண்டும் நடத்தப்பட்ட காலனித்துவ கணக்கெடுப்புகள், சாதியை ஒரு நிரந்தர நிர்வாக அடையாளமாக மாற்றிப் பரந்த இந்து சமூக பிணைப்பை பலவீனப்படுத்தின என்றும் அது கருதுகிறது.
எந்த வழியில் செய்தாலும் இந்த விவகாரம் பிரச்சனைகளை உருவாக்கக்கூடிய ஒன்றுதான் என்றாலும், சாதி கணக்கெடுப்பை நடத்துவதாக அரசு உறுதியளித்துள்ளதால் அது நிச்சயமாக நடத்தப்படும் என்றும், ஆர்.ஜி.ஐ இதற்குச் சிறந்த முறையைக் கண்டறியும் என்றும் மற்றொரு அரசு தரப்பு அதிகாரி தெரிவித்துள்ளார்.