2027-ம் நிதியாண்டிற்கான ஹெச்-1பி விசாக்களுக்கான வருடாந்திர உச்சவரம்பை அமெரிக்கா எட்டியுள்ளதாக, அமெரிக்கக் குடியுரிமை மற்றும் குடிவரவு சேவைகள் அமைப்பு அதிகாரப்பூர்வமாக அறிவித்துள்ளது. காங்கிரஸ் நிர்ணயித்த 85,000 விசா இடங்களுக்கான விண்ணப்பங்கள் முழுமையாகப் பெறப்பட்டுள்ளதாகத் தெரிவிக்கப்பட்டுள்ளது. அமெரிக்க அதிபர் ட்ரம்ப் தலைமையிலான நிர்வாகம் கொண்டுவந்த புதிய மாற்றங்கள், அதாவது பாரம்பரிய லாட்டரி முறையை மாற்றி அதிக சம்பளம் பெறும் மூத்த பணியாளர்களுக்கு முன்னுரிமை அளிக்கும் முறை அமல்படுத்தப்பட்ட பிறகு நடைபெறும் முதல் தேர்வுச் சுழற்சி இதுவாகும்.
ஹெச்-1பி விசா உச்சவரம்பு என்றால் என்ன?
சட்டப்பூர்வ வரம்புகளின்படி, அமெரிக்கக் குடியுரிமை மற்றும் குடிவரவு சேவைகள் நிறுவனம் ஒவ்வொரு ஆண்டும் புதிதாக 85,000 ஹெச்-1பி விசாக்களை மட்டுமே வழங்குகிறது. இதில் 65,000 விசாக்கள் பொதுவான பிரிவிற்கும் (Regular Cap), 20,000 விசாக்கள் அமெரிக்காவில் உயர்கல்வி முடித்தவர்களுக்கான சிறப்புப் பிரிவிற்கும் (Master’s Cap) ஒதுக்கப்படுகிறது. இருப்பினும், வடக்கு மரியானா தீவுகள் மற்றும் குவாம் பகுதியில் பணிபுரிபவர்கள் போன்ற சிலருக்கு இந்த வருடாந்திர வரம்பிலிருந்து விலக்கு அளிக்கப்படுவதாகவும் அமெரிக்கக் குடியுரிமை மற்றும் குடிவரவு சேவைகள் அமைப்பு தெளிவுபடுத்தியுள்ளது. 2027-ம் நிதியாண்டிற்கான 65,000 பொது விசாக்கள் மற்றும் 20,000 உயர்கல்வி விசாக்கள் ஆகிய இரண்டிற்குமான விண்ணப்பங்கள் போதுமான அளவில் பெறப்பட்டுவிட்டன என அமெரிக்கக் குடியுரிமை மற்றும் குடிவரவு சேவைகள் அமைப்பு தனது அறிக்கையில் குறிப்பிட்டுள்ளது.
இந்த செய்தியை ஆங்கிலத்தில் படிக்க
ட்ரம்ப் நிர்வாகத்தின் புதிய மாற்றங்கள்
கடந்த ஆண்டு செப்டம்பரில், ட்ரம்ப் நிர்வாகம் ஹெச்-1பி விசா விதிகளையும் அதன் ஒதுக்கீடு முறையையும் மேலும் கடினமாக்கியது. சிறப்புத் திறன் மற்றும் அறிவுசார்ந்த பணிகளுக்கு அதிக முன்னுரிமை அளிக்கப்படும் என அறிவிக்கப்பட்டது. இதனுடன், ஹெச்-1பி விசா மனுக்களுக்கு 1,00,000 டாலர் கட்டணம் விதிக்கப்படும் என்ற அதிபர் ட்ரம்பின் அறிவிப்பு பெரும் சர்ச்சையை ஏற்படுத்தியதுடன், தொழில்முனைவோரால் நீதிமன்றத்திலும் சவாலுக்கு உட்படுத்தப்பட்டது. இருப்பினும், இத்தகைய வரியை விதிக்க அமெரிக்க அதிபருக்கு அதிகாரம் இல்லை என்று கூறி, இந்தக் கட்டண அறிவிப்பை ஃபெடரல் நீதிபதி கடந்த மாதம் ரத்து செய்தார்.
அமெரிக்க நிறுவனங்களிடையே ஹெச்-1பி விசாக்களுக்கான தேவை இன்னமும் மிக அதிகமாகவே உள்ளது. USCIS தரவுகளின்படி, 9,000-க்கும் மேற்பட்ட பயன்பாட்டாளர்களுடன் அமேசான் (Amazon) நிறுவனம் அதிக விசா ஒப்புதல்களைப் பெற்ற முதன்மை நிறுவனமாக உள்ளது. அதிக விசா ஒப்புதல்களைப் பெற்ற முதல் 10 முன்னணி நிறுவனங்களின் பட்டியலில் டி.சி.எஸ், இன்ஃபோசிஸ், ஆப்பிள், மைக்ரோசாஃப்ட், காக்னி சென்ட் (Cognizant), கூகுள் (Google), மெட்டா (Meta), ஜேபிமோர்கன் (JPMorgan), மற்றும் ஆரக்கிள் (Oracle) ஆகிய நிறுவனங்கள் இடம்பெற்றுள்ளன.