நடிகரும், தமிழ்நாடு முதலமைச்சருமான விஜய் கதாநாயகனாக நடித்துள்ள ‘ஜனநாயகன்’ திரைப்படம் பல்வேறு எதிர்பார்ப்புகள், சர்ச்சைகள் மற்றும் சட்டரீதியான சவால்களைத் தாண்டி இன்று உலகம் முழுவதும் திரையரங்குகளில் வெளியாகியுள்ளது. படத்தின் முதல் நாள் முதல் காட்சியையே திருவிழாவாக மாற்றிய ரசிகர்கள், தமிழ்நாடு முழுவதும் பல்வேறு இடங்களில் உற்சாகக் கொண்டாட்டங்களில் ஈடுபட்டனர். குறிப்பாக கோவை மாநகரில் விஜய் ரசிகர்களும், தமிழக வெற்றிக் கழக (தவெக) நிர்வாகிகளும் இணைந்து சிறப்பான ஏற்பாடுகளை செய்து திரைப்பட வெளியீட்டை கொண்டாடினர்.
கோவை காந்திபுரம் பகுதியில் உள்ள பிரபல கங்கா – யமுனா – காவேரி (GYK) திரையரங்க வளாகத்தில் அதிகாலை முதலே ஆயிரக்கணக்கான ரசிகர்கள் திரண்டனர். விஜயின் உருவப்படங்களுக்கு மாலை அணிவித்து, பால் அபிஷேகம் செய்து, மலர் தூவி மரியாதை செலுத்திய ரசிகர்கள், பின்னர் பட்டாசுகள் வெடித்தும், இனிப்புகள் வழங்கியும் கொண்டாட்டத்தில் ஈடுபட்டனர். திரையரங்கு முன்பாக சிறப்பு DJ இசை நிகழ்ச்சி ஏற்பாடு செய்யப்பட்டிருந்ததால், விஜயின் சூப்பர் ஹிட் பாடல்கள் ஒலிக்க, ரசிகர்கள் உற்சாகமாக நடனமாடி, விசில் அடித்து, முழக்கமிட்டு திரையரங்கு வளாகத்தையே திருவிழா சூழலாக மாற்றினர்.
முதல் நாள் முதல் காட்சியைக் காண பல்வேறு மாவட்டங்களில் இருந்தும் ரசிகர்கள் கோவைக்கு வந்திருந்தனர். குடும்பத்தினருடன், நண்பர்களுடன் மற்றும் பெண்கள், இளைஞர்கள் என அனைத்து தரப்பினரும் திரையரங்கில் குவிந்ததால், வளாகம் முழுவதும் பரபரப்பான சூழல் நிலவியது. ரசிகர்களின் வருகையை முன்னிட்டு கூடுதல் டிக்கெட் கவுண்டர்கள் திறக்கப்பட்டதுடன், திரையரங்கு நிர்வாகமும் சிறப்பு ஏற்பாடுகளை செய்திருந்தது.
ரசிகர்கள் அதிக அளவில் திரண்டிருந்ததால், எந்தவித அசம்பாவிதமும் ஏற்படாத வகையில் காவல்துறையினர் பலத்த பாதுகாப்பு ஏற்பாடுகளை மேற்கொண்டனர். திரையரங்கு வளாகம் மற்றும் அதைச் சுற்றியுள்ள முக்கிய சாலைகளில் போலீசார் பாதுகாப்பு பணியில் ஈடுபட்டதுடன், வாகன நெரிசலை கட்டுப்படுத்தி போக்குவரத்தை ஒழுங்குபடுத்தும் பணிகளையும் மேற்கொண்டனர். ரசிகர்கள் ஒழுங்காக வரிசையில் சென்று திரைப்படத்தை காணுமாறு தொடர்ந்து அறிவுறுத்தப்பட்டனர்.
இதற்கிடையில், தமிழக அமைச்சர் சம்பத்குமார் கோவை கங்கா – யமுனா – காவேரி திரையரங்கிற்கு வருகை தந்து ரசிகர்களுடன் இணைந்து ‘ஜனநாயகன்’ திரைப்படத்தை பார்வையிட்டார். அவருக்கு தமிழக வெற்றிக் கழக நிர்வாகிகள் மற்றும் ரசிகர்கள் உற்சாக வரவேற்பு அளித்தனர். மலர் கொத்து வழங்கி, முழக்கங்கள் எழுப்பி, அமைச்சர் வருகையை அவர்கள் கொண்டாடினர்.
பின்னர் செய்தியாளர்களிடம் பேசிய அமைச்சர் சம்பத்குமார், “இது எங்களுக்கு மிகவும் நெகிழ்ச்சியான தருணம். இன்று வெளியாகும் முதல் நாள் முதல் காட்சி எங்களுக்கு கடைசி காட்சியைப் போல உணர்ச்சிகரமாக உள்ளது. மனதிற்குள் வலி இருந்தாலும், இந்த நாட்டுக்கும் மக்களுக்கும் தலைவர் தேவை என்பதை உணர்ந்து அந்த வலிகளைத் தாங்கிக்கொண்டு இங்கு வந்துள்ளோம்,” என்று தெரிவித்தார்.
தொடர்ந்து பேசிய அவர், “ரசிகன் என்பதே என்னுடைய முதல் அடையாளம். அதற்குப் பிறகுதான் அமைச்சர் என்ற பொறுப்பு. ஏற்கனவே எங்கள் தலைவர் வகுத்த பாதையில்தான் நான் பயணித்து வந்தேன். தற்போது மக்கள் எனக்கு ஒரு பொறுப்பை வழங்கியுள்ளனர். அந்தப் பொறுப்பை முழு அர்ப்பணிப்புடன், நேர்மையாகவும் சிறப்பாகவும் நிறைவேற்றுவேன்,” என்றார்.
ரசிகர்களின் கொண்டாட்டம் குறித்து கேட்கப்பட்ட கேள்விக்கு பதிலளித்த அவர், “பொதுமக்களுக்கு எந்தவித இடையூறும் இல்லாத வகையில் நடைபெறும் கொண்டாட்டங்களை நாங்கள் எப்போதும் வரவேற்கிறோம். யாருக்கும் தொந்தரவு இல்லாமல், சட்டம்-ஒழுங்கை மதித்து எங்கள் ரசிகர்கள் கொண்டாடி வருகின்றனர். திரையரங்கில் படம் பார்ப்பதற்கான அனுபவத்திற்கு எதுவும் ஈடாகாது. ஆன்லைனில் படம் வெளியிட்டு என்ன சதித்திட்டம் செய்தாலும், ரசிகர்கள் திரையரங்கில் வந்து படத்தைப் பார்ப்பதையே விரும்புகிறார்கள். அதுவே உண்மையான சினிமா அனுபவம்,” என்று கூறினார்.
மேலும், “எங்கள் தலைவர் மக்களுக்கான பணிகளை தொடர்ந்து செய்து வருகிறார். சினிமாவிலும், பொதுவாழ்விலும் மக்களுக்காக அர்ப்பணிப்புடன் செயல்படுகிறார். அதனால் மக்கள் அவருக்கு தொடர்ந்து ஆதரவு அளித்து வருகின்றனர்,” என்றும் அமைச்சர் தெரிவித்தார்.
திரைப்படத்தின் சென்சார் விவகாரம் தொடர்பாக செய்தியாளர்கள் எழுப்பிய கேள்விக்கு பதிலளித்த அவர், “இந்தப் படத்தை குழந்தைகளும் பார்த்து ரசிக்க வேண்டும் என்று பலரும் விரும்புகிறார்கள். ஆனால் அது எங்கள் கையில் இல்லை. சம்பந்தப்பட்ட அதிகாரிகள் எடுக்கும் முடிவுகளையே மதிக்க வேண்டும்,” என்று கூறிய பின்னர் ரசிகர்களுடன் இணைந்து திரைப்படத்தை பார்வையிட திரையரங்கிற்குள் சென்றார்.
கோவை நகரில் நடைபெற்ற இந்த முதல் நாள் கொண்டாட்டம் ரசிகர்களின் உற்சாகம், காவல்துறையின் பாதுகாப்பு ஏற்பாடுகள் மற்றும் அரசியல் பிரமுகர்களின் பங்கேற்பு ஆகியவற்றால் பெரும் கவனத்தை ஈர்த்ததுடன், ‘ஜனநாயகன்’ திரைப்படத்தின் வெளியீட்டை ஒரு திருவிழா சூழலாக மாற்றியது. ரசிகர்களின் உற்சாக ஆரவாரம், டிஜே இசை, பட்டாசு வெடிப்பு, நடன நிகழ்ச்சிகள் என கோவை திரையரங்கு வளாகம் முழுவதும் பண்டிகை களைகட்டியிருந்தது.