இயக்குனர் கிறிஸ்டோபர் நோலனின் பிரமாண்ட உருவாக்கத்தில் வெளியாகியுள்ள ‘தி ஒடிஸி’ (The Odyssey) திரைப்படம், ஹோமரின் பழம்பெரும் காவியக் கவிதையை மீண்டும் மக்களின் கவனத்திற்குக் கொண்டு வந்துள்ளது. ஐந்துக்கும் மேற்பட்ட நாடுகளில், ஐமேக்ஸ் கேமராக்களின் வழியே படமாக்கப்பட்ட இந்த இடங்கள் ஒவ்வொன்றும் இயற்கையின் அழகையும், தொன்மை வரலாற்று உணர்வையும் ஒரே நேரத்தில் நமக்கு வழங்குகின்றன. ஹோமரின் காவியத்தில் வரும் இந்த அற்புதமான இடங்களை நாமும் நேரில் சென்று பார்வையிட முடியும். ‘தி ஒடிஸி’ பயணத்தில் நீங்கள் தவறவிடக் கூடாத முக்கிய இடங்கள் குறித்து பார்க்கலாம்.
உன்ன அழிக்க ஒருத்தன் வருவான் டா: அவ்ளோ பெரிய டைனோசர ஒரு கல்லு அழிச்சிடுச்சா? 66 மில்லியன் வருட ரகசியம்
இதாக்கா, கிரேக்கம் (Ithaca, Greece)
ஒடிசியஸின் சொந்த ஊரான இதாக்கா, அவர் 10 ஆண்டுகள் தாயகம் திரும்ப முடியாமல் தவித்ததன் முதன்மைப் புள்ளியாகும். தற்காலத்தில் ‘இதாக்கி’ (Ithaki) என்று அழைக்கப்படும் இந்த மலைப்பாங்கான தீவு, தொன்மையான வரலாற்றையும் வரலாற்றுத் தளங்களையும் கொண்டது.
என்ன பார்க்கலாம்?
இத்தாலிய கட்டிடக் கலைஞர் புரூனோ மசாலி உருவாக்கிய ‘ஒடிசியஸ் அரண்மனையின் மாதிரி’, தொல்பொருள் அருங்காட்சியகத்தில் உள்ள கல்வெட்டுகள் மற்றும் ‘ஹோமரின் பள்ளி’ (Homer’s School) அமைந்துள்ள மலைப்பகுதி.
மெசீனியா, கிரேக்கம் (Messenia, Greece)
ஒடிசியஸின் மகன் டெலிமாக்கஸ், தனது தந்தையைப் பற்றிய செய்திகளைத் தேடிச் செல்லும் காட்சிகளை நோலன் மெசீனியாவில் விரிவாகப் படமாக்கியுள்ளார். இது கிரேக்கத்தின் தென்மேற்குப் பகுதியில் உள்ள ஒரு வரலாற்றுச் சிறப்புமிக்க மண்டலமாகும்.
என்ன பார்க்கலாம்?
வெண்கலக் காலத்தைச் சேர்ந்த ‘நெஸ்டரின் அரண்மனை’ (Nestor’s Palace), அழகிய ‘வொய்டோகிலியா வளைகுடா’ (Voidokilia Bay) மற்றும் நெஸ்டரின் குகை.
டிராய், துருக்கி (Troy, Turkey)
‘ஒடிஸி’ காவியத்தின் தொடக்கப்புள்ளியே டிராய் நகரம் தான். வடமேற்கு துருக்கியில் உள்ள ‘ஹிசார்லிக்’ பகுதிதான் பழங்கால டிராய் நகரம் என அடையாளம் காணப்பட்டுள்ளது.
என்ன பார்க்கலாம்?
யுனெஸ்கோவால் உலக பாரம்பரியத் தளமாக அறிவிக்கப்பட்டுள்ள பழங்கால டிராய் நகரத்தின் இடிபாடுகள் மற்றும் அகழ்வாராய்ச்சிப் பகுதிகள்.
ஃபவிக்னானா, இத்தாலி (Favignana, Italy)
சிசிலி கடற்கரையிலிருந்து 18 கி.மீ தொலைவில் உள்ள தீவுக்கூட்டம் ஃபவிக்னானா. சைக்ளோப்ஸ் (ஒற்றைக் கண் அரக்கன்) சம்பவத்திற்குப் பிறகு ஒடிசியஸ் தனது படகுகளில் பொருட்களை நிரப்ப இங்கு வந்து இறங்கியதாக கருதப்படுகிறது.
என்ன பார்க்கலாம்?
படிகம் போன்ற தெளிவான கடல் நீர், பாரம்பரிய மீன்பிடி கிராமங்கள், சாந்தமான இயற்கைச் சூழல் மற்றும் சிராகியூஸில் (Syracuse) உள்ள தொல்பொருள் அருங்காட்சியகம்.
மால்டா
மத்திய தரைக்கடலில் சிசிலி மற்றும் வட ஆப்பிரிக்க கடற்கரைக்கு இடையே அமைந்துள்ள ஒரு தீவு நாடு மால்டா. சூரியக் கடவுள் ஹெலியோஸின் கோபத்தால் தன் தோழர்கள் அனைவரையும் இழந்த பிறகு, ஒடிசியஸ் ‘ஓஜிகியா’ (Ogygia) என்ற தீவை அடைகிறார். அந்தத் தீவே தற்போதைய மால்டா எனக் கருதப்படுகிறது.
என்ன பார்க்கலாம்?
வரலாற்றுச் சிறப்புமிக்க கோட்டைகள், கி.மு 4000-ஆம் ஆண்டைச் சேர்ந்த ‘ஹால் சாஃப்லியேனி ஹைபோஜியம்’ (Hal Saflieni Hypogeum) என்ற பூமிக்கடியிலான அறை மற்றும் கல்லறை வளாகங்களை பார்க்கலாம்.