இரண்டாவது சுற்றில் ரிபாகினா: யு.எஸ்., ஓபனில் அசத்தல்

அமெரிக்காவின் நியூயார்க் நகரில், யு.எஸ்., ஓபன் கிராண்ட்ஸ்லாம் டென்னிஸ் தொடர் நடக்கிறது. பெண்கள் ஒற்றையர் பிரிவு முதல் சுற்றில் கஜகஸ்தானின் எலினா ரிபாகினா, அமெரிக்காவின் தியா புரோடின் மோதினர். அபாரமாக ஆடிய ரிபாகினா 6-3, 6-2 என்ற நேர் செட் கணக்கில் வெற்றி பெற்றார்.

மற்றொரு முதல் சுற்றில் அமெரிக்காவின் கோகோ காப், துருக்கியின் ஜெய்னெப் சோன்மெஸ் மோதினர். இதில் கோகோ காப் 6-3, 6-4 என்ற கணக்கில் வெற்றி பெற்றார். மற்றொரு போட்டியில் அமெரிக்காவின் மடிசன் கீஸ் 7-5, 6-4 என, ரஷ்யாவின் அலினா கோர்னீவாவை வென்றார்.

மற்ற முதல் சுற்று போட்டிகளில் பிலிப்பைன்சின் அலெக்சாண்ட்ரா எலா, ரஷ்யாவின் மிர்ரா ஆன்ட்ரீவா, கஜகஸ்தானின் யுலியா புடின்ட்சேவா, கிரீசின் மரியா சக்காரி உள்ளிட்டோர் வெற்றி பெற்றனர்.

ஸ்வெரேவ் வெற்றி: ஆண்கள் ஒற்றையர் பிரிவு முதல் சுற்றில் ஜெர்மனியின் அலெக்சாண்டர் ஸ்வெரேவ், இத்தாலியின் லோரென்சோ சோனேகோ மோதினர். நான்கு மணி நேரம், 53 நிமிடம் நீடித்த போட்டியில் ஸ்வெரேவ் 6-4, 3-6, 6-7, 7-5, 6-4 என்ற கணக்கில் போராடி வெற்றி பெற்றார்.

மற்றொரு முதல் சுற்றில் பிரான்சின் கேயல் மோன்பில்ஸ், பராகுவேயின் அடோல்போ டேனியல் வல்லேஜோ மோதினர். இதில் மோன்பில்ஸ் 2-6, 6-1, 6-2, 6-0 என்ற செட் கணக்கில் வெற்றி பெற்றார்.

மற்ற முதல் சுற்று போட்டிகளில் அமெரிக்காவின் டெய்லர் பிரிட்ஸ், இத்தாலியின் பிளாவியோ கோபோலி, லோரென்சோ முசெட்டி உள்ளிட்டோர் வெற்றி பெற்றனர்.