சென்னை சூப்பர் கிங்ஸ் (சி.எஸ்.கே) அணியின் முன்னாள் வீரர் சுப்பிரமணியம் பத்ரிநாத், மகேந்திர சிங் தோனியுடன் நடந்த தனிப்பட்ட உரையாடல் குறித்து முக்கிய தகவலை வெளியிட்டுள்ளார். ஐ.பி.எல்-லில் “இம்பாக்ட் பிளேயர்” விதிமுறையின் கீழ் விளையாடும் எண்ணம் தனக்கு இல்லை என்று தோனி நேரடியாக கூறியதாக பத்ரிநாத் தெரிவித்துள்ளார்.
2026 ஐ.பி.எல் தொடரில் முழங்கால் காயம் காரணமாக தோனி ஒரு போட்டியிலும் விளையாடவில்லை. இதையடுத்து, 2027 ஐபிஎல் தொடரில் அவர் மீண்டும் களமிறங்குவாரா? களமிறங்கினால் எந்த வகையில் விளையாடுவார்? என்ற கேள்விகள் ரசிகர்கள் மத்தியில் தொடர்ந்து எழுந்து வருகின்றன.
“முழுநேர விக்கெட் கீப்பராகவே இருப்பேன்”
தனது யூடியூப் சேனலில் பேசிய பத்ரிநாத், “தோனி என்னிடம் நேரடியாக, ‘நான் இம்பாக்ட் பிளேயராக விளையாட மாட்டேன்’ என்று கூறினார். அவர் தன்னை முழுநேர விக்கெட் கீப்பராகவே பார்க்கிறார். அதனால் 20 ஓவர்களும் களத்தில் இருக்க வேண்டும் என்பதே அவரது விருப்பம்” என்று தெரிவித்துள்ளார். மேலும், இம்பாக்ட் பிளேயராக களமிறங்குவதற்குப் பதிலாக, முழுமையான வீரராகவே அணிக்காக விளையாட விரும்புவதாக தோனி தெளிவுபடுத்தியதாகவும் அவர் கூறினார்.
“சி.எஸ்.கே-வுக்கு அது பலனாக இருக்கும்”
தோனியின் முடிவை மதிப்பதாக கூறிய பத்ரிநாத், அதே நேரத்தில் இம்பாக்ட் பிளேயர் விதி சிஎஸ்கேவுக்கு தந்திரோபாய ரீதியில் உதவியாக இருக்கும் என்றும் கருத்து தெரிவித்தார். “தோனியின் உடல் நீண்ட நேரம் களத்தில் இருப்பதை தாங்குவது கடினம் என்று பயிற்சியாளர் ஸ்டீபன் ஃப்ளெமிங்கும் கூறியிருக்கிறார். அவர் பொதுவாக 16-வது ஓவருக்குப் பிறகுதான் பேட்டிங் செய்ய வருவார். விக்கெட் கீப்பிங் மற்றும் கடைசி ஓவர்களில் பேட்டிங் மட்டுமே அவரது பங்களிப்பாக இருந்தால், இம்பாக்ட் பிளேயராக பயன்படுத்துவது சிஎஸ்கேவுக்கு மிகவும் பயனுள்ளதாக இருக்கும்” என்று பத்ரிநாத் கூறினார்.
இம்பாக்ட் பிளேயர் விதி மீது பத்ரிநாத் கருத்து
இம்பாக்ட் பிளேயர் விதிமுறையையே குற்றம் சாட்டுவது சரியல்ல என்றும் பத்ரிநாத் தெரிவித்தார். குறிப்பாக, சிவம் துபே பந்துவீசாததற்கு இந்த விதி காரணமல்ல; அது சிஎஸ்கே அணியின் நிர்வாக முடிவுதான் என்று அவர் கூறினார். அதேபோல், அகீல் ஹொசைனை தொடக்க அணியில் சேர்க்காமல், இம்பாக்ட் பிளேயராக வைத்திருப்பதும் அணியின் தவறான திட்டமிடல் என்றும் அவர் விமர்சித்தார்.
தோனியின் ஐ.பி.எல் எதிர்காலம் – தொடரும் சஸ்பென்ஸ்
45 வயதான மகேந்திர சிங் தோனியின் ஐபிஎல் எதிர்காலம் குறித்து இன்னும் அதிகாரப்பூர்வ அறிவிப்பு வெளியாகவில்லை. 2026 சீசனை முழுவதுமாக தவறவிட்ட நிலையில், 2027 ஐபிஎல்லில் அவர் மீண்டும் சிஎஸ்கே அணிக்காக களமிறங்குவாரா என்பது ரசிகர்கள் மத்தியில் பெரிய எதிர்பார்ப்பாக உள்ளது. இந்த நிலையில், “இம்பாக்ட் பிளேயராக விளையாட மாட்டேன்” என்று தோனி கூறியதாக பத்ரிநாத் வெளியிட்ட தகவல், அவரது எதிர்காலம் குறித்த விவாதத்திற்கு மேலும் வலு சேர்த்துள்ளது.