கென்ய அதிபர் வில்லியம் ரூட்டோ வியாழக்கிழமை பேசுகையில், டாட்டா கெமிக்கல்ஸ் நிறுவனம் கென்யாவில் தனது செயல்பாடுகளை உடனடியாக நிறுத்த உத்தரவிட்டுள்ளதாகத் தெரிவித்தார். மேலும், அந்நிறுவனத்தின் செயல்பாடுகளால் நாட்டிற்கு எந்தவொரு நன்மையும் விளையவில்லை எனக் குற்றம் சாட்டிய அவர், “நாம் மற்றவர்களுக்கு அடிமைகளா?” என்றும் கேள்வி எழுப்பினார்.
ராய்ட்டர்ஸ் செய்தி நிறுவனத்தின் தகவலின்படி, டாட்டா கெமிக்கல்ஸ் நிறுவனம் தற்போது கையாண்டு வரும் பணிகளை ஏற்று நடத்துவதற்காகக் கென்ய அரசு இரண்டு புதிய நிறுவனங்களைக் கொண்டுவரும் என்று ரூட்டோ தெரிவித்துள்ளார்.
கென்யா அரசு டாட்டா கெமிக்கல்ஸை குறி வைப்பது ஏன்?
கடந்த ஜூலை மாத இறுதியில், டாட்டா கெமிக்கல்ஸ் நிறுவனத்தின் கென்யப் பிரிவுக்குச் சொந்தமான ‘மகடி சோடா’ (Magadi Soda) தொழிற்சாலையின் செயல்பாடுகளை உடனடியாக இடைநிறுத்தம் செய்யவும், சோடா ஆஷ் (Soda Ash) ஏற்றுமதியை நிறுத்தவும் கென்ய அரசு உத்தரவிட்டிருந்த நிலையில் இந்த அறிவிப்பு வெளியாகியுள்ளது.
காஜியாடோ (Kajiado) பகுதியில் டாட்டா கெமிக்கல்ஸ் நீண்டகாலமாக இயங்கி வருவதைச் சுட்டிக்காட்டி விமர்சித்த அதிபர் ரூட்டோ, அந்நிறுவனம் உள்ளூர் தொழில்துறை வளர்ச்சியை உருவாக்கத் தவறிவிட்டதாகக் கூறினார். “அந்த டாட்டா நிறுவனம் 100 ஆண்டுகளாக ஒப்பந்தம் வைத்திருந்தது. ஆனால், அவர்கள் காஜியாடோவில் எதையும் கட்டவில்லை; எந்தவொரு தொழிற்சாலையையும் அவர்கள் இங்கு உருவாக்கவில்லை,” என்று அவர் சாடினார்.
மேலும் தொடர்ந்த அவர், “நாங்கள் ஒரு புதிய நிறுவனத்தைக் கொண்டுவருவோம் என்றும், அவர்கள் இந்த காஜியாடோவில் ஒரு பெரிய கண்ணாடித் தொழிற்சாலையை அமைக்க வேண்டும் என்றும் கூறியுள்ளோம். அதுமட்டுமின்றி, இங்கு வேதிப்பொருட்களைத் தயாரிப்பதற்காக மற்றொரு நிறுவனத்தையும் கொண்டுவரவுள்ளோம். நாம் என்ன மற்றவர்களுக்கு அடிமைகளா?” என்று கேள்வி எழுப்பினார்.
அதிபர் ரூட்டோவின் இந்த முடிவு குறித்தோ அல்லது அவரது விமர்சனங்கள் குறித்தோ கருத்து தெரிவிக்க டாட்டா கெமிக்கல்ஸ் நிறுவனத்தை உடனடியாகத் தொடர்புகொள்ள முடியவில்லை.
கென்யாவில் டாட்டா கெமிக்கல்ஸ் என்ன செய்கிறது?
கென்யாவில் டாட்டா கெமிக்கல்ஸ் நிறுவனம் ‘மகடி சோடா’ பிரிவை நடத்தி வருகிறது. இது கண்ணாடி தயாரிப்பு மற்றும் பிற உற்பத்திச் செயல்பாடுகளுக்குப் பயன்படும் தொழில்துறை வேதிப்பொருளான சோடா ஆஷை (Soda Ash) உற்பத்தி செய்கிறது. இந்த மகடி தொழிற்சாலை செயல்பாடுகளே கென்ய அரசாங்கத்திற்கும் அந்நிறுவனத்திற்கும் இடையே சமீபத்தில் வெடித்துள்ள இந்தச் சர்ச்சையின் மையப்புள்ளியாக அமைந்துள்ளது.