காலாவதியான உணவுப் பொருட்களுக்கு புதிய லேபிள் ஒட்டி விற்பனை செய்யும் ஏஜென்சி ஒன்றை கர்நாடக உணவு மற்றும் மருந்து பாதுகாப்பு நிர்வாகம் (கே.எஸ்.எஃப்.டி.ஏ) அம்பலப்படுத்தியுள்ளது. ஒரே வாரத்தில் அமேசான் மற்றும் இன்ஸ்டாமார்ட் கடைகள் உட்பட பல இடங்களில் நடத்தப்பட்ட சோதனையில், தவறான லேபிள் ஒட்டப்பட்ட ரூ.3 கோடி மதிப்பிலான பொருட்கள் பறிமுதல் செய்யப்பட்டுள்ளதாக அதிகாரிகள் தெரிவித்தனர்.
விதிமுறைகளைப் பின்பற்றாததால் பெங்களூருவில் ரத்து செய்யப்பட்ட ஒரு ‘பெப்டைட் பார்ட்டி’ (peptide party) தான், இந்த காலாவதியான உணவுகள் மறுலேபிள் செய்யப்பட்டு விற்பனை செய்யப்படுவதைக் கண்டுபிடிக்க வழிவகுத்தது என்று சுகாதாரத் துறை அமைச்சர் யு.டி. காதர் செவ்வாய்க்கிழமை தெரிவித்தார். “அந்தப் பொருட்கள் எங்கிருந்து பெறப்பட்டன என்ற தகவலைச் சேகரித்தபோது, அவை அமேசான் டார்க் ஸ்டோரில் இருந்து பெறப்பட்டது தெரியவந்தது” என்று அவர் கூறினார்.
இதையடுத்து கே.எஸ்.எஃப்.டி.ஏ அதிகாரிகள் தேவனஹள்ளியில் உள்ள ‘அமேசான் பி.எல்.ஆர்6’ (Amazon BLR6) என்ற சேமிப்புக் கிடங்கில் சோதனை நடத்தினர். அங்கு தவறான அல்லது போதுமான தகவல்கள் இல்லாத லேபிள் ஒட்டப்பட்ட ரூ.14 லட்சம் மதிப்பிலான உணவுப் பொருட்களையும், ரூ.10 லட்சம் மதிப்பிலான காலாவதியான உணவுப் பொருட்களையும், உரிமம் இன்றி சேமித்து வைக்கப்பட்டிருந்த ரூ.2.45 லட்சம் மதிப்பிலான மருந்துகளையும் அதிகாரிகள் பறிமுதல் செய்தனர்.
மடிவாளாவில் உள்ள ‘அமேசான் பி.எல்.ஆர்7’ (Amazon BLR7) கிடங்கில், ரூ.19 லட்சம் மதிப்பிலான தவறான லேபிள் ஒட்டப்பட்ட உணவுகள், ரூ.13 லட்சம் மதிப்பிலான காலாவதியான பொருட்கள் மற்றும் ரூ.1.57 லட்சம் மதிப்பிலான உரிமமில்லாத மருந்துகள் பறிமுதல் செய்யப்பட்டன.
“லிங்கராஜபுரத்தில் உள்ள ஒரு கொட்டகையில் ‘லியோ 7 எண்டர்பிரைசஸ்’ (Leo 7 Enterprises) என்ற பெயரில் ஒரு ஏஜென்சி இயங்கி வந்தது. அங்கு காலாவதியான உணவுப் பொருட்களைக் கண்டறிந்தோம். அந்த இடத்தில் இருந்த தவறான லேபிள் ஒட்டப்பட்ட மற்றும் காலாவதியான பொருட்களின் மதிப்பு ரூ.57 லட்சமாக இருக்கலாம். அவர்கள் காலாவதியான பொருட்களை விலைக்கு வாங்கி, அதன் காலாவதி தேதிகளைப் போலியாக மாற்றி அமைத்துள்ளனர்” என்று கூறிய அமைச்சர், அந்த மையம் உடனடியாக மூடப்பட்டு சீல் வைக்கப்பட்டதாகத் தெரிவித்தார்.
ஹோஸ்கோட்டையில் உள்ள இன்ஸ்டாமார்ட் மையத்தில் ரூ.42 லட்சம் மதிப்பிலான காலாவதியான உணவுப் பொருட்களைப் பறிமுதல் செய்த அதிகாரிகள், அந்த மையத்தையும் மூடினர். அந்த இடத்தில் விசாரணை தொடர்ந்து நடைபெற்று வருவதாகவும், அங்கிருக்கும் தவறான லேபிள் ஒட்டப்பட்ட மற்றும் காலாவதியான பொருட்களின் மதிப்பு ரூ.1 கோடி வரை இருக்கலாம் என்றும் துறை தெரிவித்துள்ளது.
புகாரின் பேரில் நடவடிக்கை எடுத்த அதிகாரிகள், ஹெச்.பி.ஆர் லேஅவுட்டில் உள்ள ‘சப்தா பஜார்’ என்ற கடையில் சோதனை நடத்தி, சுமார் ரூ.10,000 மதிப்பிலான காலாவதியான முந்திரி பிஸ்கட்டுகள், ராகி மாவு, சிக்கன் பேட்டீஸ், பனீர், குக்கீஸ், கொட்டைகள், முட்டை மற்றும் மாவுகளைப் பறிமுதல் செய்தனர்.
“இதை ஒரு குற்றவியல் குற்றமாக மாற்றுவதற்காக சட்டத் துறைக்கும் மத்திய அரசுக்கும் கடிதம் எழுதி வருகிறோம். இப்போது வரை இதுபோன்ற நிறுவனங்களின் உரிமையாளர்கள் அபராதத்துடன் தப்பித்து விடுகிறார்கள், ஆனால், இது ஒரு குற்றவியல் செயலாகும். இதற்கான சட்டத்தை நாங்கள் உருவாக்குவோம். இதுபோன்ற விதிமீறல்களைக் குறைக்க பொதுமக்கள் அதிக அளவில் புகார்களை அளிக்குமாறு கேட்டுக்கொள்கிறோம்” என்று காதர் தெரிவித்தார்.