“எனக்கு எந்த குற்றப்பின்னணியும் இல்லை”: நோட்டீஸ் அனுப்பப்பட்டதற்கான காரணம் கேட்கும் பல்கலைக்கழக மாணவர்

எழுதியவர்: Drishti Jain

நோட்டீஸ் திரும்பப் பெறப்பட்ட போதிலும், அது எந்த அடிப்படையில் பிறப்பிக்கப்பட்டது என்பதற்கான “காரணங்களையும் ஆதாரங்களையும்” அறிய விரும்புவதாக நொய்டாவில் உள்ள கவுதம புத்தா பல்கலைக்கழகத்தின் இரண்டாம் ஆண்டு பி.ஏ. எல்.எல்.பி. (BA LLB) மாணவர் அக்ஷத் திரிபாதி (20) தெரிவித்துள்ளார்.

இதுகுறித்து அவர் தெரிவிக்கையில், “எனக்கு எந்தவித குற்றப் பின்னணியும் இல்லை. நிரூபிக்க முடியாத அனைத்துப் பொய் குற்றச்சாட்டுகளையும் என் மீது சுமத்தியுள்ளனர். அவர்கள் அதை ரத்து செய்திருந்தாலும், எந்த அடிப்படையில் இந்த நோட்டீஸ் அனுப்பப்பட்டது என்பதை நான் தெரிந்து கொள்ள விரும்புகிறேன். போராட்டம் நடந்து இரண்டு மாதங்களுக்குப் பிறகு, ஒரு அதிகாரியின் மனதில் இது எப்படி திடீரென்று தோன்றும்? நாங்கள் இறுதி வரை போராடுவோம்,” என்று கூறினார். அலகாபாத்தைச் சேர்ந்த திரிபாதி, கவுதம புத்தா பல்கலைக்கழகத்தின் இந்திய மாணவர் சங்கத்தின் (SFI) செயலாளராக உள்ளார்.

மாணவர்களிடையே “அரசுக்கு எதிரான, தவறான கருத்துக்களைப் பரப்பி அவர்களைத் தூண்டிவிட்டு பொது அமைதிக்குக் குந்தகம் விளைவிக்கக் கூடும்” என்று காவல்துறை அறிக்கையில் திரிபாதி மீது குற்றம் சாட்டப்பட்டிருந்தது. இந்த அறிக்கையைச் சுட்டிக்காட்டி, நோட்டீஸை வழங்கிய கிரேட்டர் நொய்டா நிர்வாக நீதிபதி, “எதிர்மனுதாரர் அமைதியை சீர்குலைப்பதற்கான பலமான சாத்தியக்கூறுகள் உள்ளன” என்று குறிப்பிட்டிருந்தார்.

இந்த செய்தியை ஆங்கிலத்தில் படிக்க இங்கே க்ளிக் செய்யவும்.

இதை மறுத்த திரிபாதி, ஜூலை 20 அன்று ஜந்தர் மந்தரில் நடைபெற்ற போராட்டத்தில் பங்கேற்று தடிடியில் காயமடைந்த போதிலும், மே 25 முதல் அவர் தனது பல்கலைக்கழகத்திற்குச் செல்லவில்லை என்று கூறினார். மே மாத இறுதியில் பல்கலைக்கழகம் விடுமுறை அறிவித்த பிறகு அவர் விடுதியை விட்டு வெளியேறியதாகத் தெரிவித்தார். விடுமுறை முடிந்த பிறகும், கல்லூரி கட்டடத்தில் பராமரிப்பு பணிகள் நடைபெற்று வந்ததால் ஒரு மாத காலம் ஆன்லைன் வழியிலேயே வகுப்புகள் நடத்தப்பட்டதாகவும், ஜூலை மாதம் முழுவதும் தான் அலகாபாத் உயர் நீதிமன்றத்தில் பயிற்சிப் பணியில் (internship) இருந்த நிலையில், மாணவர்களைத் தூண்டியதாக எப்படிப் பழிசுமத்த முடியும் என்றும் அவர் கேள்வி எழுப்பினார். செப்டம்பர் 7 அன்றுதான் நேரடி வகுப்புகள் மீண்டும் தொடங்கப்பட்டதாக அவர் குறிப்பிட்டார்.

புதன்கிழமை காலை டெல்லியை அடைந்த அவர், உச்ச நீதிமன்றத்தில் ரிட் மனு தாக்கல் செய்தார். “பதிலளிப்பதற்கு ஏதுவாக, தன் மீது சுமத்தப்பட்ட குற்றச்சாட்டுகளின் விவரங்களை சம்பந்தப்பட்ட நபருக்குத் தெரிவிக்க வேண்டும் என்ற விதியை மீறி, மனுதாரருக்கு அத்தகைய தகவல்கள் எதுவும் தெரிவிக்கப்படவில்லை” என்று தனது மனுவில் அவர் குறிப்பிட்டுள்ளார்.

திரிபாதியின் கூற்றுப்படி, செப்டம்பர் 4 அன்று இரவு 8 மணியளவில் வாட்ஸ்அப் மூலம் அவருக்கு இந்த நோட்டீஸ் கிடைத்தது. அதில், அமைதியைப் பேணுவதற்காக 5 லட்சம் ரூபாய் பிணைப்பத்திரம் செலுத்த வேண்டும் என்றும், மறுநாளே கிரேட்டர் நொய்டாவில் உள்ள சுராஜ்பூருக்கு ஆஜராக வேண்டும் என்றும் கோரப்பட்டிருந்தது. செப்டம்பர் 5 அன்று நீதிபதிக்கு பதிலளித்த திரிபாதி, தன் மீதான குற்றச்சாட்டுகளுக்கு நேரடி மற்றும் சரிபார்க்கக்கூடிய ஆதாரங்கள் எதுவும் வழங்கப்படவில்லை என்றும், வெறும் சந்தேகத்தின் அடிப்படையில் மட்டுமே ஒரு நபர் மீது இத்தகைய நடவடிக்கைகளை எடுப்பது பொருத்தமானது அல்ல என்றும் தெரிவித்துள்ளார்.

இது குறித்து நொய்டா காவல்துறை புதன்கிழமை வெளியிட்ட அதிகாரப்பூர்வ அறிக்கையில், “பாரதிய நாகரிக் சுரக்ஷா சன்ஹிதா (BNSS) பிரிவுகள் 126 மற்றும் 135-ன் கீழ், அமைதி மற்றும் பொது ஒழுங்கைப் பராமரிப்பதற்கான பிணைப்பத்திரத்தைச் செலுத்தக் கோரி, போராட்ட ஆர்ப்பாட்டம் தொடர்பாக இந்த நோட்டீஸ் அனுப்பப்பட்டது. இந்த விஷயம் உயர் அதிகாரிகளின் கவனத்திற்கு வந்தவுடனே, தவறாக வழங்கப்பட்ட இந்த நோட்டீஸ் செப்டம்பர் 5, 2026 அன்று ரத்து செய்யப்பட்டது” என்று தெரிவிக்கப்பட்டுள்ளது. மேலும், இந்த நோட்டீஸ் அனுப்பியதில் தொடர்புடைய ஊழியர்கள் மீது துறைரீதியான நடவடிக்கை ஏற்கனவே தொடங்கப்பட்டுள்ளதாகவும் காவல்துறை கூறியுள்ளது.

கவுதம புத்தா நகர் மாவட்ட நீதிபதிக்கு இதில் தொடர்பில்லை என்றும், அங்கு பொலிஸ் கமிஷனரேட் முறை அமலில் இருப்பதால், கவுதம புத்தா நகர் மாஜிஸ்திரேட் III அலுவலகத்தால் இந்த நோட்டீஸ் பிறப்பிக்கப்பட்டது என்றும் காவல்துறை தெளிவுபடுத்தியுள்ளது.

ஜூலை மாத போராட்டத்தை நினைவுகூர்ந்த திரிபாதி, காக்ரோச் ஜனதா கட்சி (CJP) அழைப்பு விடுத்த நாடாளுமன்ற பேரணிக்கு ஒரு நாள் முன்னதாக, ஜூலை 19 காலையில் அலகாபாத்தில் இருந்து டெல்லிக்கு மேலும் 15 பேருடன் ரயிலில் புறப்பட்டதாகக் கூறினார். பெற்றோர் பயந்தபோதிலும் அவர்களைச் சம்மதிக்க வைத்துச் சென்றதாகவும், தடிடியில் காயமடைந்தபோது அவர்கள் கவலையடைந்ததாகவும் தெரிவித்தார்.

ரத்து செய்யப்பட்ட நீட்-யுஜி (NEET-UG) தேர்வை எழுதியவர்களில் தனது நெருங்கிய நண்பர்கள் பலரும் அடங்குவர் என்றும், சிலர் இடைவெளி எடுத்து அதிக மதிப்பெண்களைப் பெற்றிருந்ததாகவும் குறிப்பிட்ட அவர், நீட் தேர்வர்களுக்கு ஆதரவளிக்க விரும்பியதாகவும், இதற்கு யாராவது பொறுப்பேற்க வேண்டும் என்பதால் தனது ஆதரவை வழங்கியதாகவும் கூறினார். நோட்டீஸ் கிடைத்த பிறகு பெற்றோர் கவலையடைந்தாலும் தன் மீது நம்பிக்கை வைத்துள்ளதாகவும், எஸ்டிஐ (SFI) அமைப்பு முதல் நாளில் இருந்தே தனக்கு உறுதுணையாக இருப்பதாகவும் அவர் தெரிவித்தார்.