அரையிறுதிக்கு முன்னேறிய ரிபாகினா: யு.எஸ்., ஓபன் டென்னிசில்

அமெரிக்காவின் நியூயார்க் நகரில், யு.எஸ்., ஓபன் கிராண்ட்ஸ்லாம் டென்னிஸ் தொடர் நடக்கிறது. பெண்கள் ஒற்றையர் பிரிவு காலிறுதியில், கஜகஸ்தானின் எலினா ரிபாகினா 27, சீனாவின் கின்வென் ஜெங் 23, மோதினர். முதல் செட்டை 3-6 என இழந்த ரிபாகினா, இரண்டாவது செட்டை 6-1 எனக் கைப்பற்றினார். வெற்றியாளரை நிர்ணயிக்கும் மூன்றாவது செட்டை 6-4 என வென்றார்.

இரண்டு மணி நேரம், 14 நிமிடம் நீடித்த போட்டியில் அசத்திய ரிபாகினா 3-6, 6-1, 6-4 என்ற கணக்கில் வெற்றி பெற்று, யு.எஸ்., ஓபனில் முதல் முறையாக அரையிறுதிக்குள் நுழைந்தார்.

மற்றொரு காலிறுதியில் அமெரிக்காவின் கோகோ காப் 22, ரஷ்யாவின் மிர்ரா ஆன்ட்ரீவா 19, மோதினர். இரண்டு மணி நேரம், 19 நிமிடம் நீடித்த போட்டியில் கோகோ காப் 2-6, 7-6, 6-2 என்ற கணக்கில் வெற்றி பெற்று, இத்தொடரில் 2வது முறையாக (2023, 2026) அரையிறுதிக்கு முன்னேறினார்.

ஸ்வெரேவ் அசத்தல்: ஆண்கள் ஒற்றையர் பிரிவு காலிறுதியில், ஜெர்மனியின் அலெக்சாண்டர் ஸ்வெரேவ் 29, நெதர்லாந்தின் போடிக் வான் டி ஜாண்ட்சுல்ப் 30, மோதினர். அபாரமாக ஆடிய ஸ்வெரேவ் 6-2, 7-5, 6-1 என்ற நேர் செட் கணக்கில் வெற்றி பெற்று 3வது முறையாக (2020, 2021, 2026) அரையிறுதிக்கு முன்னேறினார்.

மற்றொரு காலிறுதியில் ரஷ்யாவின் கரன் கச்சனோவ் 30, பெல்ஜியத்தின் அலெக்சாண்டர் பிளாக்ஸ் 21, மோதினர். இதில் கச்சனோவ் 6-2, 7-5, 3-2 என முன்னிலையில் இருந்த போது, காயத்தால் பெல்ஜியம் வீரர் பாதியில் விலகினார். இதனையடுத்து கச்சனோவ் வெற்றி பெற்றதாக அறிவிக்கப்பட்டு, அரையிறுதிக்கு தகுதி பெற்றார்.

‘நம்பர்-1’ இடம்

யு.எஸ்., ஓபன் அரையிறுதிக்கு முன்னேறியதால், அடுத்து வெளியாக உள்ள டபிள்யு.டி.ஏ., ஒற்றையர் பிரிவு தரவரிசையில் ‘நம்பர்-1’ இடத்தை கஜகஸ்தானின் ரிபாகினா உறுதி செய்தார். இதன்மூலம் 99 வாரம் முதலிடத்தில் இருந்த பெலாரஸ் வீராங்கனை சபலென்காவின் ஆதிக்கம் முடிவுக்கு வருகிறது.

51 ஆண்டுகளுக்கு பின்

யு.எஸ்., ஓபன் அரையிறுதியில் இம்முறை, டபிள்யு.டி.ஏ., ஒற்றையர் பிரிவு தரவரிசையில் ‘டாப்-4’ வீராங்கனைகள் (சபலென்கா, ரிபாகினா, ஜெசிகா, கோகோ காப்) விளையாடுகின்றனர். இதற்கு முன், 1975ல் இப்படி பங்கேற்றனர்.