சென்னை மற்றும் கொல்கத்தா விமான நிலையங்களின் உள்கட்டமைப்பை நாட்டின் பிற முக்கிய மெட்ரோ நகரங்களின் விமான நிலையங்களுக்கு இணையான தரத்திற்கு உயர்த்தும் நோக்கில், அடுத்த கட்டமாக பொது தனியார் பங்களிப்பு (PPP) மாதிரியின் கீழ் மேம்படுத்துவதற்காக அவற்றை வழங்க மத்திய அரசு பரிசீலித்து வருவதாக தகவல் வெளியாகி உள்ளது.
வங்கக்கடலில் உருவாகும் குறைந்த காற்றழுத்த தாழ்வுப்பகுதி: அக்டோபர் 26 வரை உள் மாவட்டங்களுக்கு கனமழை வாய்ப்பு
இந்திய விமான நிலைய ஆணையம் நேரடியாக இயக்கி வரும் சென்னை மற்றும் கொல்கத்தாவைத் தவிர, நாட்டின் பிற முக்கிய விமான நிலையங்கள் அதாவது, டெல்லி (ஜி.எம்.ஆர் குரூப்), ஹைதராபாத் (ஜி.எம்.ஆர்), மும்பை (அடானி குரூப்) மற்றும் பெங்களூரு (ஃபேர்ஃபாக்ஸ்) ஆகியவை தனியார் நிறுவனங்களால் இயக்கப்பட்டு வருவதாக தெரிகிறது.
சமீபத்தில், பிபிபி மதிப்பீட்டுக் குழு 11 மண்டல விமான நிலையங்களை பிபிபி மாதிரியின் கீழ் தனியார் நிறுவனங்களிடம் ஒப்படைக்கும் திட்டத்திற்கு ஒப்புதல் அளித்ததாக கூறப்படுகிறது. இந்நிலையில், சென்னை விமான நிலையத்தில் சேவை தரம் மற்றும் வசதிகளை மேம்படுத்த தனியார் நிறுவனத்தை அனுமதிக்க வேண்டும் என்ற தமிழ்நாட்டின் கோரிக்கையும், கொல்கத்தா விமான நிலையத்தை மேம்படுத்துவதில் ஆர்வமாக உள்ள புதிய பா.ஜ.க தலைமையிலான மேற்கு வங்க அரசின் அமைப்பும், இவ்விரண்டு விமான நிலையங்களுக்கும் பிபிபி மாதிரியைப் பின்பற்றுவதற்கான சாத்தியக்கூறுகளை வலுப்படுத்தியுள்ளதாக மூத்த அதிகாரி ஒருவர் தெரிவித்துள்ளார்.
இயக்கம், பராமரிப்பு மற்றும் மேம்பாட்டு ஒப்பந்த மாதிரியை அமல்படுத்துவதை முன்னெடுத்து, முக்கிய இந்திய விமான நிலையங்களை மேம்படுத்த பிபிபி மாதிரியை சிவில் விமானப் போக்குவரத்து அமைச்சகம் பயன்படுத்தியுள்ளது. இந்த ஏற்பாட்டின் கீழ், விமான நிலையங்களின் இயக்கம், நிர்வாகம் மற்றும் மேம்பாட்டிற்குச் சலுகை பெற்ற நிறுவனம் பொறுப்பேற்கும்.
அதே நேரத்தில் விமானப் போக்குவரத்து கட்டுப்பாடு மற்றும் தகவல் தொடர்பு, வழிசெலுத்தல் மற்றும் கண்காணிப்பு சேவைகள் இந்திய விமான நிலைய ஆணையத்தின் வசம் மட்டுமே இருக்கும் என்று கூறப்படுகிறது. இந்த நேரடி ஒப்பந்த பணமாக்கல் முறை, ஒவ்வொரு விமான நிலையத்திலும் எதிர்பார்க்கப்படும் போக்குவரத்து மற்றும் சராசரி பயணி ஒருவருக்கான கட்டணங்களைப் பயன்படுத்திக் கணக்கிடப்படும் பயணியர் கட்டணங்கள் மூலமாகவும், தனியார் அமைப்புகள் செலுத்தும் முன் பணத்தின் மூலமாகவும் இந்திய விமான நிலைய ஆணையத்திற்கு வருவாயை உருவாக்குகிறது.
கடந்த ஆகஸ்ட் மாதம், தமிழ்நாடு முதலமைச்சர் சி. ஜோசப் விஜய், சென்னை விமான நிலைய ஆப்ரேட்டரை மாற்றக் கோரி பிரதமர் நரேந்திர மோடிக்கு கடிதம் எழுதியதாக கூறப்பட்டது. தமிழ்நாட்டின் தொழில் நட்புச் சூழலுக்கு ஆதரவளிப்பதற்கும் முதலீடுகளை ஈர்ப்பதற்கும் பயணியர் போக்குவரத்து, விமானங்களின் இயக்கம் மற்றும் சரக்குக் கையாளுதல் ஆகியவற்றின் மேம்பாடு அத்தியாவசியமானது என்று குறிப்பிட்டிருந்ததாக தெரிவிக்கப்பட்டது.
சென்னை விமான நிலையம் 2025-26 நிதியாண்டில் 23.01 மில்லியன் பயணிகளைக் கையாண்டுள்ளது. இது ஆண்டுக்கு ஆண்டு 2.7% அதிகரித்து வருகிறது. கொரோனாவிற்கு முந்தைய அளவான 22.54 மில்லியன் பயணிகளையும் தாண்டியுள்ளது. தற்போதைய முனையங்கள் இணைந்து ஆண்டுக்கு சுமார் 30 மில்லியன் பயணிகளை கையாளும் திறன் கொண்டவை, புதிய முனையம் பயன்பாட்டிற்கு வந்த பிறகு இது 35 மில்லியனாக அதிகரிக்கும் என எதிர்பார்க்கப்படுகிறது.
கொல்கத்தா விமான நிலையம் மேற்கு வங்கத்திற்குச் சேவை செய்யும் ஒரு முக்கிய விமானப் போக்குவரத்து மையமாகவும், வடகிழக்கு இந்தியாவிற்கான முதன்மை வான் நுழைவாயிலாகவும் செயல்படுகிறது. இது பயணிகளின் போக்குவரத்தின் அடிப்படையில் இந்தியாவின் ஆறாவது பரபரப்பான விமான நிலையமாகும், ஆண்டுதோறும் 21 மில்லியனுக்கும் அதிகமான பயணிகளைக் கையாள்கிறது. தனியார் நிறுவனங்கள் கூடுதல் மூலதனத்தைக் கொண்டு வருவதோடு, உள்கட்டமைப்புகளை திறம்பட மேம்படுத்தவும் சேவைத் தரத்தை உயர்த்தவும் தங்களது நிபுணத்துவத்தையும் பலத்தையும் பயன்படுத்துகின்றன.
பிபிபி-ஏசி ஆகஸ்ட் 4 அன்று நடைபெற்ற கூட்டத்தில், 11 விமான நிலையங்களை ஐந்து தொகுப்புகளாகப் பிரித்து அமிர்தசரஸ்-காங்ரா, வாரணாசி-கயா-குஷிநகர், புவனேஸ்வர்-ஹூப்ளி, ராய்ப்பூர்-அவுரங்காபாத் மற்றும் திருச்சிராப்பள்ளி – திருப்பதி, 50 ஆண்டுகளுக்கு இயக்கம், நிர்வாகம் மற்றும் மேம்பாட்டிற்காக வழங்குவதன் மூலம் பணமாக்கும் சிவில் விமானப் போக்குவரத்து அமைச்சகத்தின் முன்மொழிவுக்குக் கொள்கை அளவில் ஒப்புதல் அளித்ததாக கூறப்படுகிறது.