மேற்கு வங்கத்தில் வாக்காளர் பட்டியல் சிறப்பு தீவிர திருத்தத்தின் (SIR) கீழ் பாதிக்கப்பட்டவர்களின் மேல்முறையீடுகளை விசாரிக்க உச்ச நீதிமன்றத்தால் நியமிக்கப்பட்ட தீர்ப்பாய நீதிபதிகள், தேர்தல் ஆணையத்தின் டிஜிட்டல் போர்டலில் உள்ள தொழில்நுட்பக் குறைபாடுகள் காரணமாகப் பெரும் சிரமத்தைச் சந்தித்து வருகின்றனர். குறிப்பாக, போர்டலில் கொண்டுவரப்பட்டுள்ள ஆதார் அங்கீகார நடைமுறை தங்களது இறுதி உத்தரவுகளை இணையத்தில் பதிவேற்றம் செய்வதைத் தடுத்து நிறுத்துவதாகக் கூறி, கடந்த நான்கு வாரங்களில் குறைந்தது இருமுறை அவர்கள் இதற்குத் தங்களது கடுமையான எதிர்ப்பை வெளிப்படுத்தியுள்ளனர்.
போர்டல் குறைபாடுகளும் ஆதார் பிரச்சினையும்:
தேர்தல் ஆணையத்தின் தகவல் தொழில்நுட்பப் பிரிவு தீர்ப்பாயங்களுக்கெனப் பிரத்யேகமாக ஒரு டிஜிட்டல் போர்டலை உருவாக்கியுள்ளது. ஆனால், இதில் ஆரம்பம் முதலே பல குறைபாடுகள் உள்ளதாக நீதிபதிகள் குற்றம் சாட்டி வந்தனர். சம்பந்தப்பட்ட தரப்பினருக்கு நோட்டீஸ் அனுப்ப முடியாமை, கூடுதல் ஆவணங்களைப் பெற முடியாமை, காணொளி வாயிலாக விசாரணை நடத்த முடியாமை மற்றும் நீக்கப்பட்ட வாக்காளர்களை மீண்டும் சேர்க்க முடியாதது போன்ற பல சிக்கல்கள் இதில் இருந்தன.
இதற்கிடையே, கடந்த செப்டம்பர் 21 அன்று தேர்தல் ஆணையம் போர்டலில் புதிய வசதியாக ஆதார் அங்கீகாரத் திரையை (Aadhaar authentication screen) அறிமுகப்படுத்தியது. நீதிபதிகள் இறுதி உத்தரவைப் பதிவேற்றம் செய்வதற்கு முன்பு தங்களது சொந்த ஆதார் எண்களைக் கொண்டு அங்கீகாரம் செய்ய வேண்டும் என்ற இந்த புதிய விதி முன்னறிவிப்பு இன்றித் திணிக்கப்பட்டது.
இதனை எதிர்த்து, செப்டம்பர் 24-ம் தேதியன்றே தீர்ப்பாயப் பொறுப்பாளர் தேர்தல் ஆணையத்திற்கு எழுதிய கடிதத்தில், இந்த ஆதார் அங்கீகாரத் திரையை உடனடியாக நீக்குமாறு வலியுறுத்தினார். இருப்பினும், சிக்கல் தீராததால் உத்தரவுகள் அனைத்தும் தற்போது எழுத்துப்பூர்வமாக மட்டுமே நிறைவேற்றப்படுகின்றனவே தவிர, போர்டலில் பதிவேற்றம் செய்யப்படுவதில்லை. அக்டோபர் 13-ம் தேதியுங்கூட இந்தத் தொழில்நுட்பக் கோளாறை உடனடியாகச் சரிசெய்யுமாறு தேர்தல் ஆணையத்தை நீதிபதிகள் மீண்டும் கேட்டுக் கொண்டுள்ளனர். இது குறித்து தி இந்தியன் எக்ஸ்பிரஸ் எழுப்பிய கேள்விகளுக்குத் தேர்தல் ஆணையத்தின் தரப்பிலிருந்து இதுவரை எந்தப் பதிலும் அளிக்கப்படவில்லை.
போர்டல் சிக்கல்கள் ஒருபுறமிருக்க, தீர்ப்பாயத்தின் அடிப்படை வசதிகள் மற்றும் பணிச்சூழல் மிகவும் மோசமாக உள்ளதாகவும் நீதிபதிகள் வேதனை தெரிவித்துள்ளனர். கொல்கத்தா நகரின் புறநகர்ப் பகுதியான ஜோகா (Joka) என்ற இடத்தில் மத்திய அரசுக்குச் சொந்தமான கட்டடத்தில்தான் இந்தத் தீர்ப்பாயங்கள் தற்காலிகமாகச் செயல்பட்டு வருகின்றன. கொல்கத்தா நகரிலிருந்து சுமார் 30 கி.மீ தூரத்தில் உள்ள இந்தச் பகுதிக்குச் செல்ல சாலைகள் மிகவும் மோசமாக உள்ளதால், தினசரி 2 முதல் 3 மணி நேரம் பயணம் செய்ய வேண்டியுள்ளது.
இதுகுறித்து கடந்த அக்டோபர் 1 அன்று 10 நீதிபதிகள் இணைந்து எழுதியுள்ள கடிதத்தில், “12×10 அடி கொண்ட ஒற்றை அறையில் 7 முதல் 8 ஊழியர்கள் கணினிகளுடன் ஒரே இடத்தில் பணிபுரியும் சூழல் நிலவுகிறது. நீதிபதிகளுக்குத் தனி அறைகளோ, உரிய கழிவறை வசதியோ கூட இல்லை.
மேலும், ஓய்வுபெற்ற நீதிபதிகளுக்கு வழங்கப்படும் 25,000 ரூபாய் வாராந்திர மதிப்பூதியம் தற்போதைய சூழலுக்குப் போதுமானதாக இல்லை என்றும், அதனை 50,000 ரூபாயாக உயர்த்தக் கோரி ஜூன் மாதம் முதல் தாக்கல் செய்யப்பட்டுள்ள கோரிக்கையை விரைவில் நிறைவேற்ற வேண்டும்” என்றும் அவர்கள் வலியுறுத்தியுள்ளனர்.
பின்னணி என்ன?
மேற்கு வங்கத்தில் மாநில அரசுக்கும் தேர்தல் ஆணையத்திற்கும் இடையே இருந்த நம்பகத்தன்மை குறைபாடு காரணமாக, உச்ச நீதிமன்றம் தனது சிறப்பு அதிகாரத்தைப் பயன்படுத்தி (Article 142), கடந்த பிப்ரவரி 20 அன்று நீதித்துறை அதிகாரிகளைக் கொண்டு வாக்காளர்களின் தகுதியைச் சரிபார்க்க உத்தரவிட்டது. இதன் அடிப்படையில் சுமார் 60 லட்சம் வாக்காளர்களின் ஆவணங்கள் சரிபார்க்கப்பட்டு, 27.16 லட்சம் வாக்காளர்களின் பெயர்கள் வாக்காளர் பட்டியலிலிருந்து நீக்கப்பட்டன.
இதனைத் தொடர்ந்து, பாதிக்கப்பட்ட வாக்காளர்கள் மேல்முறையீடு செய்ய ஓய்வுபெற்ற உயர் நீதிமன்ற நீதிபதிகளைக் கொண்ட 19 மேல்முறையீட்டுத் தீர்ப்பாயங்களை உச்ச நீதிமன்றம் அமைத்தது. இதுவரை லட்சக்கணக்கான மேல்முறையீடுகள் தாக்கல் செய்யப்பட்டுள்ள நிலையில், நீதிபதிகள் எதிர்கொள்ளும் இந்த அடிப்படை வசதி மற்றும் போர்டல் கோளாறுகள் வழக்கு விசாரணைகளைத் தாமதப்படுத்தி வருவது குறிப்பிடத்தக்கது.