“காவலர்களை தாக்கிவிட்டு கைதிகள் தப்பி ஓடும் நிலையில் சிறைச்சாலை…” – பழனிசாமி விமர்சனம்

சென்னை: “காவலர்களை தாக்கிவிட்டு கைதிகள் தப்பி ஓடும் நிலையில் தான் சிறைச்சாலையே இருக்கிறது என்றால், சாமானிய மக்கள் செல்லும் சாலைகளிலே இந்த திக்குத் தெரியாத ஆட்சியில் எப்படி பாதுகாப்பு இருக்கும்?” என்று அதிமுக பொதுச் செயலாளர் பழனிசாமி விமர்சித்துள்ளார்.

இது தொடர்பாக அவர் வெளியிட்டுள்ள சமூக வலைதள பதிவில் கூறியதாவது: “தேனி மாவட்டச் சிறையில் இருந்து 17 கைதிகள் தப்பி ஓடியதாக வரும் செய்திகள் அதிர்ச்சி அளிக்கின்றன. வழக்கறிஞர் நியமனத்தில் ஊழல், அரசுக்கு நீதிமன்ற குட்டுகள் என ஏற்கெனவே சட்டத்துறை சந்தி சிரிக்க, மின்வெட்டு, மின் கொள்முதலில் ஊழல் என மின்துறை ஃபியூஸ் பிடுங்கிய நிலையில் இருக்க, தற்போது சிறைத்துறையும் அந்த பட்டியலில் சேர்ந்துவிட்டது.

மூன்று துறைக்கும் அமைச்சர் ஒருவர் தான் என்பதுதான் இதில் ஹைலைட். எப்போது பார்த்தாலும் “மைக்” வெறி பிடித்து அலைந்து, தூக்கத்தில் கூட “அண்ணா திமுக புராணம்” பாடிக் கொண்டிருக்கும் நிர்மல் குமாரின் நிர்வாக லட்சணத்தைக் கண்டு ஊரே கைகொட்டிச் சிரிக்கிறது. வெட்கக்கேடு.

ஏற்கெனவே புழல் சிறையில் இருந்து 2 கைதிகள் தப்பி ஓடிய போதே தமிழக சிறைகளின் பாதுகாப்பை உறுதி செய்திருக்க வேண்டும். அதற்கெல்லாம் இந்த அரசுக்கோ, அமைச்சருக்கோ நேரம் இல்லை போலும்.

அது சரி, புழல் ஜெயிலுக்கு ஆய்வுக்கு போன முதல்வர் விஜய், நீங்கள் ஆய்வு நடத்தியுமா சிறைத்துறை இப்படி இருக்கிறது? நீங்கள் நடத்தியது ஆய்வு தானா? அல்லது, சில பத்திரிகைகளில் வந்த செய்திகளைப் போல ஜோதிடப் பரிகாரமா?

காவலர்களை தாக்கிவிட்டு கைதிகள் தப்பி ஓடும் நிலையில் தான் சிறைச்சாலையே இருக்கிறது என்றால், சாமானிய மக்கள் செல்லும் சாலைகளிலே இந்த திக்குத் தெரியாத ஆட்சியில் எப்படி பாதுகாப்பு இருக்கும்?

அதிகரிக்கும் கொலைகள், பெண்களுக்கு எதிரான குற்றங்கள், ஆளுங்கட்சி நிர்வாகியின் போதைப்பொருள் புழக்கம், தொடர்ந்து மாயமாகும் குழந்தைகள், சிறையில் இருந்து கைதிகள் தப்பியோட்டம், இவற்றை எல்லாம் தொகுத்து இன்றைய ஆச்சரியக்குறி ஆட்சியாளர்கள் “150 நாள் வெற்றி மலர்” வெளியிட்டாலும் ஆச்சரியப்படுவதற்கு இல்லை.

தப்பியோடிய கைதிகளை பிடித்து மீண்டும் சிறையில் அடைப்பதுடன், தமிழகத்தின் சட்டம் – ஒழுங்கில் ஒழுங்காக கவனம் செலுத்த வேண்டும் என இந்த அரசை வலியுறுத்துகிறேன்” என்று கூறியுள்ளார்.

நேற்று (அக்.26) இரவு சுமார் 11 மணி அளவில் தேனி மாவட்ட சிறையில் இருந்து தப்பியோடிய 17 கைதிகளை பிடிக்க 17 தனிப்படைகள் தீவிர தேடுதல் பணியில் ஈடுபட்டுள்ளன. தப்பியவர்களில் 4 பேர் கைது செய்யப்பட்ட நிலையில், மற்றவர்களைப் பிடிக்க போலீஸார் தீவிர தேடுதல் வேட்டையில் ஈடுபட்டுள்ளனர்.

மாவட்ட மற்றும் மாநில எல்லைகள், வனப்பகுதி என போலீஸாரின் தேடுதல் வேட்டை தொடர்வதாக தகவல் கிடைத்துள்ளது.