செங்கல்பட்டு மாவட்டம் வல்லிபுரம் கிராமத்தில் பருவமழைக் காலங்களில் மாதந்தோறும் சுமார் 10 பேருக்கு நீர்வழி நோய்கள் ஏற்பட்டு வந்தன. இந்நிலையில், 2022-ஆம் ஆண்டு குழந்தைகளுக்கான நூலகம் அமைப்பது மற்றும் கணினிப் பயிற்சி வழங்குவது தொடர்பாக ஐஐடி-மெட்ராஸ் பேராசிரியர்கள் கிராம மக்களுடன் இணைந்து பணியாற்றத் தொடங்கினர். அப்போது, தங்களுக்குச் சுத்தமான குடிநீர் வழங்க நடவடிக்கை எடுக்க வேண்டும் என்று கிராம மக்கள் கோரிக்கை விடுத்தனர். இதையடுத்து, ஐஐடி-மெட்ராஸின் நீர் மேலாண்மை மற்றும் கொள்கைக்கான அக்வாமேப் மையம் (AquaMAP Centre for Water Management and Policy), மூன்று இடங்களில் குடிநீர் சுத்திகரிப்பு நிலையங்களை அமைப்பதற்கும், நிலையான திடக்கழிவு மேலாண்மைத் திட்டத்தைச் செயல்படுத்துவதற்கும் திட்டமிட்டது.
சிங்கப்பூரில் உள்ள நன்யாங் தொழில்நுட்பப் பல்கலைக்கழகத்தின் லியன் அறக்கட்டளை சுற்றுச்சூழல் ஆய்வாளர் உதவித்தொகைத் திட்டம் (Lien Foundation Environmental Fellowship Programme) இந்தத் திட்டத்துக்கு நிதியுதவி வழங்க முன்வந்தது.
“ஜூன் 2024-இல், உள்ளாட்சி ஒன்றிய தொடக்கப் பள்ளி, அரசு உயர்நிலைப் பள்ளி மற்றும் அரசு ஆரம்ப சுகாதார நிலையம் ஆகிய இடங்களில் குடிநீர் சுத்திகரிப்பு நிலையங்களை அமைத்தோம்” என்று ஐஐடி-மெட்ராஸின் சிவில் பொறியியல் துறை நிறுவனத் தலைமைப் பேராசிரியரும், அக்வாமேப் மையத்தின் ஒருங்கிணைப்பாளருமான லிகி பிலிப் தெரிவித்தார்.
“அதன்பிறகு, கிராம மக்களுக்கு சிகிச்சை அளித்த மருத்துவர்கள், நீர்வழி நோய்களால் பாதிக்கப்படுவோரின் எண்ணிக்கை கணிசமாகக் குறைந்துள்ளதாகக் குறிப்பிட்டனர்” என்றும் அவர் கூறினார்.
இந்தக் குடிநீர் சுத்திகரிப்பு நிலையங்களில், நீரின் ஓட்டம், பிஹெச் (pH) அளவு, கலங்கல் தன்மை மற்றும் மொத்தக் கரைந்த திடப்பொருள்களின் அளவு (TDS) ஆகியவற்றைத் தொடர்ந்து கண்காணிக்கும் வகையில் இணையவழி இணைப்புடன் கூடிய சென்சார்கள் பொருத்தப்பட்டுள்ளன. இதன் மூலம் கிடைக்கும் தரவுகள், தொலைதூரத்தில் இருந்தபடியே கண்காணிப்பதற்கான செயலியில் பதிவேற்றப்படுகின்றன. இந்நிலையில், புதன்கிழமை கிராமத்தில் நடைபெற்ற நிகழ்ச்சியில், இந்த வசதிகள் கிராம மக்களிடம் ஒப்படைக்கப்பட்டன.
பாலாற்று நீர்
பாலாற்றின் கரையோரங்களில் தோண்டப்பட்ட கிணறுகளில் இருந்து வல்லிபுரம் கிராமத்துக்கான குடிநீர் பெறப்படுகிறது. அங்கிருந்து நீர் மேல்நிலைத் தொட்டிகளுக்குப் பம்ப் செய்யப்பட்டு, பின்னர் ஊராட்சிக் குழாய்கள் மூலம் வீடுகளுக்கு விநியோகிக்கப்படுகிறது.
இந்த விநியோக முறை தொடர்ந்து நடைமுறையில் இருக்கும் நிலையில், மேல்நிலைத் தொட்டிகளில் இருந்து பெறப்படும் நீரின் ஒரு பகுதி புதிதாக அமைக்கப்பட்டுள்ள சுத்திகரிப்பு நிலையங்களுக்கு அனுப்பப்படுகிறது. இந்த நிலையங்கள் ஒரு மணி நேரத்தில் 100 முதல் 200 லிட்டர் வரை குடிநீரைச் சுத்திகரிக்கும் திறன் கொண்டவை. இந்தத் திட்டம் முழுவதும் ரூ.70 லட்சம் செலவில் செயல்படுத்தப்பட்டதாகப் பேராசிரியர் லிகி பிலிப் தெரிவித்தார்.
சிங்கப்பூரின் நன்யாங் தொழில்நுட்பப் பல்கலைக்கழகத்தைச் சேர்ந்த லியன் சுற்றுச்சூழல் ஆய்வாளர் உதவித்தொகைத் திட்டத்தின் இயக்குநர் ரிச்சர்ட் டேவிட் வெப்ஸ்டர் கூறுகையில், இந்த முயற்சியின் அடுத்தகட்டமாக எதிர்காலத்துக்கான திட்டங்களையும் செயல்படுத்துவது குறித்து ஆராய்ந்து வருவதாகத் தெரிவித்தார்.