தஞ்சாவூர் மாவட்டத்தில் முழுவதும் கிராம பின்னணி கொண்ட தொகுதியாக ஒரத்தநாடு உள்ளது. கல்லணைக் கால்வாய் பாசனமும், மழை பெய்தால்தான் சாகுபடி என்கிற மானாவாரி பாசனமும் கொண்ட பகுதியாகும். 60 சதவீதம் நெல் உற்பத்தியும், மீதம் கரும்பு, சோளம், கடலை போன்ற பயிர்களும் சாகுபடி செய்யப்படுகின்றன.
இந்த தொகுதியில் முக்குலத்தோர், பட்டியலினத்தவர்கள், முத்தரையர்கள் அதிகளவில் வசிக்கின்றனர். இங்கு அதிமுக 6 முறையும், திமுக 5 முறையும், காங்கிரஸ் ஒரு முறையும் வெற்றி பெற்றுள்ளன. 2021 சட்டப்பேரவைத் தேர்தலில் அதிமுக சார்பில் போட்டியிட்ட ஆர்.வைத்திலிங்கம் 90,063 வாக்குகள் பெற்று வெற்றி பெற்றார்.
இவரை எதிர்த்துப் போட்டியிட்ட திமுகவின் எம்.ராமச்சந்திரன் 61,228 வாக்குகளும், அமமுகவின் மா.சேகர் 26,022 வாக்குகளும், நாதகவின் எம்.கந்தசாமி 9,050 வாக்குகளும் பெற்றனர்.