முன்கூட்டிய வரி (Advance Tax) என்பது வருமானம் ஈட்டும்போதே வரி செலுத்துதல் என்ற கொள்கையின் அடிப்படையில் செயல்படுகிறது. ஆண்டு முழுவதும் ஈட்டிய மொத்த வருமானத்திற்கான வரியை ஆண்டின் இறுதியில் செலுத்துவதற்குப் பதிலாக, உங்கள் மதிப்பிடப்பட்ட வருமானத்தின் அடிப்படையில் ஆண்டு முழுவதும் நான்கு தவணைகளில் செலுத்தலாம். தவணை முறை விதிகளின்படி, மதிப்பிடப்பட்ட வரித் தொகையில் குறைந்தது 15 சதவீதத்தை ஜூன் 15ஆம் தேதிக்குள் செலுத்த வேண்டும். அதைத் தொடர்ந்து, செப்டம்பர் 15ஆம் தேதிக்குள் குறைந்தது 45 சதவீதத்தையும், டிசம்பர் 15-ஆம் தேதிக்குள் 75 சதவீதத்தையும், மார்ச் 15ஆம் தேதிக்குள் முழுமையாக 100 சதவீதத்தையும் செலுத்த வேண்டும்.
இதில் கவனிக்க வேண்டிய முக்கியமான விஷயம் என்னவென்றால், செப்டம்பர் 15ஆம் தேதிக்குள் முழு 45 சதவீதத்தையும் புதிதாகச் செலுத்த வேண்டியதில்லை. ஜூன் மாதத்தில் செலுத்தப்பட்ட 15 சதவீதத் தொகை இதனுடன் சரிசெய்யப்படும் (கணக்கில் எடுத்துக்கொள்ளப்படும்).
முன்கூட்டியே வரி செலுத்தும் விதி வணிகர்களுக்கு மட்டுமே பொருந்தும் என்று பலர் நினைக்கிறார்கள். ஆனால் அது அப்படி இல்லை. TDS அல்லது TCS பிடித்தம் செய்யப்பட்ட பிறகு, ஒரு ஆண்டிற்கான மதிப்பிடப்பட்ட வரிப் பொறுப்பு ரூ. 10,000 அல்லது அதற்கு மேல் உள்ள அனைத்து வரி செலுத்துவோரும் இதன் வரம்பிற்குள் வருவார்கள்.
சம்பளம் பெறுபவர்களைப் பொறுத்தவரையில், சம்பளத்தைத் தவிர வட்டி, வாடகை அல்லது பங்குகளை விற்பதன் மூலம் வருமானம் ஈட்டி அதற்கான TDS முழுமையாகப் பிடித்தம் செய்யப்படாவிட்டால் அவர்களும் முன்கூட்டியே வரி செலுத்த வேண்டியிருக்கும். இது தவிர, வணிகம், தொழில் அல்லது ஃப்ரீலான்சிங் மூலம் வருமானம் ஈட்டும் அனைவரும் இதன் வரம்பிற்குள் வருவார்கள். இருப்பினும், இந்தியாவில் வசிக்கும் மற்றும் வணிகம் அல்லது தொழில் மூலம் எந்த வருமானமும் ஈட்டாத மூத்த குடிமக்கள் இதிலிருந்து விலக்கு அளிக்கப்பட்டுள்ளனர்.
ஜூன் மாதத்திற்கான முதல் தவணையைச் செலுத்திய பிறகு, நீங்கள் பங்குகள் அல்லது சொத்துக்களை விற்று மூலதன ஆதாயத்தைப் (capital gains) பெற்றிருந்தால் கவலைப்படத் தேவையில்லை. முன்கூட்டிய வரி விதிமுறைகள் மிகவும் நெகிழ்வுத்தன்மை கொண்டவை. மாறிவரும் உங்கள் வருமானத்தின் அடிப்படையில் வரியை மறுமதிப்பீடு செய்து, செப்டம்பர் 15 அல்லது டிசம்பர் 15 போன்ற அடுத்தடுத்த தவணைகளில் வரித் தொகையைச் சரிசெய்து கொள்ளலாம். உரிய நேரத்தில் முன்கூட்டிய வரியைச் செலுத்தத் தவறினாலோ அல்லது குறைவாகச் செலுத்தினாலோ விதிமுறைகளின்படி தாமதமான அல்லது குறைவான கட்டணங்களுக்கு வட்டி செலுத்த வேண்டியிருக்கும்.
மேலும், ஆண்டின் இறுதியில் இறுதி வரியைச் செலுத்த வேண்டிய நேரத்தில் முழுத் தொகையையும் ஒரே நேரத்தில் செலுத்துவது உங்கள் நிதி நிலையில் பெரும் சுமையை ஏற்படுத்தலாம். செப்டம்பர் 15ஆம் தேதி கெடு தேதிக்கு முன்னதாக, இதுவரை ஈட்டிய வருமானம் மற்றும் வட்டி அல்லது வாடகை போன்ற முழு ஆண்டிற்கான எதிர்பார்க்கப்படும் வருமானம் ஆகியவற்றை மதிப்பிட வேண்டும். அதன் பின்னர், எவ்வளவு TDS அல்லது TCS பிடிக்கப்பட்டுள்ளது அல்லது பிடிக்கப்பட வாய்ப்புள்ளது என்பதைச் சரிபார்க்க வேண்டும். மொத்த மதிப்பிடப்பட்ட வரியிலிருந்து TDS மற்றும் TCS தொகையைக் கழித்து, செலுத்த வேண்டிய வரி (tax liability) 10,000 ரூபாய்க்கு மேல் உள்ளதா என்று பார்க்க வேண்டும். அப்படி இருந்தால் செப்டம்பர் 15ஆம் தேதிக்குள் 45 சதவீத இலக்கைச் செலுத்திவிட வேண்டும்.
Source link