இன்சூரன்ஸ் விஷயத்தில் புகார் செய்வது, தகவல்களைப் பகிர்வது, லிங்க்குகளை கிளிக் செய்வது போன்றவற்றில் மக்கள் எச்சரிக்கையாக இருக்க வேண்டும் என்று இந்திய காப்பீட்டு ஒழுங்குமுறை மற்றும் மேம்பாட்டு ஆணையம் எச்சரிக்கை செய்துள்ளது.
காப்பீடு விஷயத்தில் தற்போது மோசடிகள் அதிகரித்துள்ளன. போலியான வெப்சைட் மற்றும் லிங்க்குகளை உருவாக்கி மக்களை ஏமாற்றுகின்றனர். இந்நிலையில், இந்திய காப்பீட்டு ஒழுங்குமுறை மற்றும் மேம்பாட்டு ஆணையம் ( IRDAI ) தனது அதிகாரப்பூர்வ காப்பீட்டு குறைதீர்ப்பு தளமான ‘ Bima Bharosa ‘ வெப்சைட்டைப் போலவே தோற்றமளிக்கும் ஒரு போலி இணையதளம் குறித்து காப்பீட்டுதாரர்களை எச்சரித்துள்ளது. “igmsirdai.online” என்ற பெயரில் ஒரு புகார் அளிக்கும் பக்கம் உருவாக்கப்பட்டுள்ளது. இது IRDAI அமைப்பின் அதிகாரப்பூர்வ இணையதளம் என்று மக்களை நம்ப வைத்து ஏமாற்றுவதாக எச்சரிக்கப்பட்டுள்ளது.
போலி இணையதளங்கள் குறித்து எச்சரிக்கை!
‘igmsirdai.online’ என்பது IRDAI அமைப்பின் அதிகாரப்பூர்வ இணையதளம் அல்ல என்று ஆணையம் தெளிவுபடுத்தியுள்ளது. எனவே, மக்கள் இந்த இணையதளத்தைப் பார்வையிடுவதையோ, இதில் புகார்களைப் பதிவு செய்வதையோ அல்லது தனிப்பட்ட மற்றும் நிதிசார் தகவல்களை வழங்குவதையோ தவிர்க்க வேண்டும் என்று கேட்டுக்கொள்ளப்பட்டுள்ளது. இத்தகைய போலி இணையதளங்கள் முக்கியமான தகவல்களைத் திருடவோ அல்லது மக்களை ஏமாற்றவோ பயன்படுத்தப்படலாம். குறிப்பாக, பெயர், மொபைல் எண், பாலிசி விவரங்கள், வங்கி விவரங்கள், KYC ஆவணங்கள், கடவுச்சொற்கள் அல்லது OTP போன்ற தகவல்களை எந்தவொரு சந்தேகத்திற்குரிய இணையதளத்திலும் உள்ளிடுவதை காப்பீட்டுதாரர்கள் தவிர்க்க வேண்டும் என்று எச்சரிக்கப்பட்டுள்ளது.
‘Bima Bharosa’ என்றால் என்ன?
‘Bima Bharosa’ என்பது IRDAI அமைப்பின் அதிகாரப்பூர்வ காப்பீட்டு குறைதீர்ப்பு தளமாகும். இது காப்பீட்டுதாரர்கள் தங்கள் காப்பீட்டு நிறுவனங்களுக்கு எதிராகப் புகார்களைப் பதிவு செய்யவும், அவற்றின் தற்போதைய நிலையை அறியவும் உதவுகிறது. பொதுமக்கள் புகார் அளிப்பதற்கு முன் இணையதள முகவரியைச் சரிபார்ப்பது அவசியம். அதிகாரப்பூர்வ ‘Bima Bharosa’ இணையதள முகவரி ‘bimabharosa.irdai.gov.in’ ஆகும். மின்னஞ்சல், SMS, வாட்ஸ்அப் செய்தி அல்லது தொலைபேசி அழைப்பு மூலம் பெறப்படும் இணைப்பைப் (link) பயன்படுத்தி நேரடியாக இணையதளத்திற்குச் செல்வதை விட, அதிகாரப்பூர்வ இணையதள முகவரியை நீங்களே நேரடியாகத் தட்டச்சு செய்து செல்வது பாதுகாப்பானது என்று ஆணையம் கூறியுள்ளது.
தகவல்களை பகிரக் கூடாது!
IRDAI அமைப்பின் பிரதிநிதி என்று கூறிக்கொள்ளும் எந்தவொரு நபரிடமோ அல்லது இணையதளத்திடமோ தங்களின் வங்கி விவரங்கள், கிரெடிட் அல்லது டெபிட் கார்டு தகவல்கள், KYC ஆவணங்கள், கடவுச்சொற்கள் மற்றும் OTP நம்பர்களைப் பகிர வேண்டாம் என்று IRDAI பொதுமக்களுக்கு அறிவுறுத்தியுள்ளது. மேலும், காப்பீட்டுப் புகாரைத் தாக்கல் செய்வதாகவோ அல்லது தீர்ப்பதாகவோ கூறி யாராவது உங்களிடம் பணம் டெபாசிட் செய்யக் கேட்டால் முதலில் அவர்களின் அடையாளத்தையும் அதிகாரப்பூர்வ மூலத்தையும் சரிபார்க்க வேண்டும். IRDAI அமைப்பின் பெயர், சின்னம் அல்லது சொற்களைப் பயன்படுத்தும் ஒவ்வொரு இணையதளமும் அல்லது நபரும் அதிகாரப்பூர்வமானவர்கள் என்று நினைக்கக்கூடாது.
தகவல் ஏற்கனவே வழங்கப்பட்டிருந்தால் என்ன செய்வது?
சந்தேகத்திற்கிடமான இணையதளத்தில் உங்கள் தனிப்பட்ட, பாலிசி அல்லது நிதித் தகவல்களைத் தற்செயலாகப் பகிர்ந்திருந்தால் உடனடியாகத் தேவையான முன்னெச்சரிக்கை நடவடிக்கைகளை எடுக்க வேண்டும். வங்கி தொடர்பான தகவல்கள் பகிரப்பட்டிருந்தால் உடனடியாக உங்கள் வங்கி அல்லது நிதி நிறுவனத்தைத் தொடர்பு கொள்ள வேண்டும். உங்கள் வங்கிக் கணக்கு மற்றும் கார்டு பரிவர்த்தனைகளைக் கண்காணிக்க வேண்டும். மோசடி நடந்ததாகச் சந்தேகித்தால் சம்பந்தப்பட்ட சைபர் கிரைம் அல்லது சட்ட அமலாக்க முகமையிடம் இதுகுறித்துப் புகாரளிக்க வேண்டும்.
பாதுகாப்பாக இருக்க என்ன செய்ய வேண்டும்?
ஆன்லைனில் காப்பீடு தொடர்பான புகாரைத் தாக்கல் செய்யும்போது அதிகாரப்பூர்வ போர்ட்டலை மட்டுமே பயன்படுத்த வேண்டும். தெரியாத மின்னஞ்சல்கள், SMS, வாட்ஸ்அப் செய்திகள் அல்லது தொலைபேசி அழைப்புகளில் வரும் இணைப்புகளைக் கிளிக் செய்வதைத் தவிர்க்க வேண்டும். OTP, கடவுச்சொற்கள் மற்றும் வங்கிச் சான்றுகளை யாருடனும் பகிரக்கூடாது. அங்கீகரிக்கப்படாத அல்லது மோசடியான இணையதளங்களுடனான தொடர்புகளால் ஏற்படும் எந்தவொரு இழப்புகளுக்கும் அல்லது தகவல் கசிவுக்கும் தாங்கள் பொறுப்பேற்க மாட்டோம் என்றும் IRDAI அமைப்பு தெளிவுபடுத்தியுள்ளது.
Source link